Vakatotomuri Karisito ena Cakacaka Vakavunau
1 E dodonu meda vakatotomuria na ivakaraitaki vinaka i Jisu ena cakacaka vakavunau. E vakaraitaka ena levu na gauna kei na duidui ituvaki na nona lomana dina na Kalou kei ira na tamata. E vakavulica na ka dina vei ira na yalomalumalumu, e vakacegui ira na rarawa, e vakabulai ira tale ga na tauvimate.—Maciu 9:35.
2 iVakaraitaki kei na iVakavuvuli i Jisu: E sega ni vakaitavitaki koya o Jisu ena ka vakapolitiki, se so na sasaga me vakatorocaketaki kina na nodra bula na lewenivanua. E sega tale ga ni vakaogai koya ena so tale na ka e kena irairai nira sasaga vinaka me vakataotaka na cakacaka bibi e mai cakava. (Luke 8:1) E vakabibitaka ga na kacivaki ni itukutuku vinaka ni Matanitu ni Kalou me iwali duadua ga ni leqa eda sotava tu na kawatamata. Dua na ka na levu ni cakacaka me mai cakava o Jisu ena loma ga ni dua na gauna lekaleka. Gauna mada ga ra vinakata kina na lewenikoro e Kapenaumi me tiko ga vata kei ira, a qai kaya vei iratou na nona tisaipeli: “Tou lako ki na veikoro sa voleka, me’u vunau talega kina: sa ka ga oqo ka’u sa lako mai kina.”—Mari. 1:38.
3 Ni sa vakavulici iratou oti nona tisaipeli, sa qai vakaroti iratou ena ka me ratou kaya: “Mo dou vunau, ka kaya, Sa voleka mai na matanitu vakalomalagi.” (Maciu 10:7) E vakavulici iratou nona imuri me liumata ena nodratou bula na veika e vauca na Matanitu ni Kalou. (Maciu 6:33) E vakamatatataka vei iratou nona tisaipeli na ka me ratou cakava ena iotioti ni nona vosa ni itatau. E kaya: “Dou lako yani ka qisi ira me ra noqu tisaipeli na lewe ni veivanua kece ga.”—Maciu 28:19, VV.
4 Yaga ni Matanitu ni Kalou: Na usutu ni nona cakacaka o Jisu na Matanitu ni Kalou, e uqeti ira kina nona tisaipeli mera muria nona ivakaraitaki. Sa sega tu ga ni rawa vei keda meda walia na leqa ni kawatamata, se mani vakacava na noda sasaga. (Jere. 10:23) Na Matanitu ga ni Kalou e vakarokorokotaki kina na yacana, ena kauta mai na bula vakacegu e tawamudu. (Maciu 6:9, 10) Noda vakavulica na veika dina ni Matanitu ni Kalou vei ira era “vutugu ka qoqolou e na vuku ni ka vakasisila kecega sa caka,” ena vakamarautaki ira, ena vinaka na ivakarau ni nodra bula, ena dei tale ga na nodra inuinui me baleta na veika totoka sa tu oqo e matada.—Isik. 9:4.
5 Me yacova mai oqo se gumatuataka tiko ga o Jisu na kena kacivaki na itukutuku vinaka ni Matanitu ni Kalou, qai vakadeitaka vei keda ni na tokoni keda kina. (Maciu 28:20, VV) Vakacava noda cakacaka vakavunau, eda raica beka ni lakolakovata kei na ivakarau e kotora o Jisu? (1 Pita 2:21) Ena iotioti gona ni veisiga oqo, meda saga ena noda vinaka kece meda vakatotomuria vakavoleka sara na ivakaraitaki e kotora o Jisu ena cakacaka vakavunau!