Cakacaka e Veivakacegui
1 Na itukutuku ena iVolatabu e vakacegui ira kece na tamata era ciqoma ra qai bulataka. (Same 19:7, 8) Ena vukea mera tagutuvi ira mai na ivakavuvuli lasu kei na itovo e veivakaleqai qai solia e dua na inuinui me baleta na veigauna mai muri. Ia, e sega ni yaga wale ga na itukutuku vinaka oqo vei ira era ciqoma. O ira sara mada ga na wasea tiko na ka dina mai na iVolatabu era na vakacegui.—Vkai. 11:25.
2 Vakabulabulataki ena Cakacaka Vakavunau: E kaya o Jisu nira na “kunea na vakacegu ni [yalodra]” o ira na colata na ivua mera tisaipeli lotu Vakarisito. E wili tiko ena ivua oya na cakacaka vakavunau kei na veivakatisaipelitaki. (Maciu 11:29) E vakabulabulataki koya mada ga na nona vunau vei ira tale e so qai vaka sara ga na kakana vua. (Joni 4:34) Ni tala yani e 70 nona tisaipeli mera vunau, era marau nira vakila na veitokoni i Jiova ena nodra sasaga.—Luke 10:17.
3 E levu tale ga na lotu Vakarisito edaidai era vakabulabulataki nira vakaitavi ena cakacaka vakavunau. E kaya e dua na tacida yalewa: “Na cakacaka vakaitalatala e veivakabulabulataki baleta ni dusimaki au qai vakainaki kina noqu bula. E seavu na noqu leqa kei na lomabibi niu vakaitavi kina.” E kaya e dua tale na tacida yalewa dau gugumatua: “Mai na noqu cakacaka vakaitalatala e veisiga, . . . au raica kina ni bula dina o Jiova, au kunea tale ga na vakacegu kei na marau e tawavakatauvatani rawa.” Sa dua dina na itavi dokai nida “cakacaka vata kei koya na Kalou”!—1 Kor. 3:9.
4 Rawarawa na iVua i Karisito: E dina nira uqeti na lotu Vakarisito mera “gumatua sara” ia e sega ni namaka o Jisu vei keda na ka eda sega ni rawata. (Luke 13:24) E sureti keda ga vakayalololoma meda ‘cola vata kei koya na nona ivua.’ (Maciu 11:29, NW, ivakamacala e ra) O ira gona era tu ena ituvaki dredre era na nuidei ga ni nodra veiqaravi mai vu ni yalodra ena marautaka na Kalou se mani vakacava na kena lailai.—Mari. 14:6-8; Kolo. 3:23.
5 E veivakacegui dina na qarava na Kalou e dau marautaka na ka eda cakava ena vuku ni yacana! (Iper. 6:10) Meda solia tiko mada ga vua ena veigauna taucoko na noda vinaka kece.