Mo Yalomalumalumu
1 E nuitaki Jiova e dua na cauravou dau vakatawa sipi qai vakadruka e dua na qaqa. (1 Sam. 17:45-47) A vosota voli ga e dua na turaga vutuniyau na leqa e sotava tiko. (Jope 1:20-22; 2:9, 10) E vakavinavinakataki Tamana ga na Luve ni Kalou ena vuku ni nona veivakavulici. (Joni 7:15-18; 8:28) E bibi ena ivakaraitaki taucoko oqori na yalomalumalumu. E vaka kina edaidai, e gadrevi na yalomalumalumu ena ituvaki eda dau sotava.—Kolo. 3:12.
2 Ena Cakacaka Vakaitalatala: Nida italatala lotu Vakarisito, eda na tukuna na itukutuku vinaka ena yalomalumalumu vei ira na duikaikai, veitalia se ra matatamata cava, se ituvaki ni bula se vanua vakacava era cavutu mai kina. (1 Kor. 9:22, 23) Ke so era cudrucudru se ra sega ni via rogoca na itukutuku ni Matanitu, eda na sega ni sauma lesu, ia eda na qarai ira tiko ga e yaga mera vukei. (Maciu 10:11, 14) Ia, eda na sega ni saga mera vakadrukai na tamata ena noda kilaka se noda ivakatagedegede ni vuli, eda na vakabibitaka ga na Vosa ni Kalou nida kila ni na veiuqeti cake mai na noda nanuma ga. (1 Kor. 2:1-5; Iper. 4:12) Ena noda vakatotomuri Jisu eda na vakacaucautaki Jiova kina.—Mari. 10:17, 18.
3 Ena iVavakoso: Na lotu Vakarisito dina era na ‘vakaisulutaki ira ena yalomalumalumu.’ (1 Pita 5:5, VV) Kevaka eda dau raici ira tiko ga na tacida mera uasivi vei keda, eda na vakasaqara na sala mera qaravi kina, sega nida namaka mera qaravi keda. (Joni 13:12-17; Fpai. 2:3, 4) Eda na sega kina ni nanuma ni lolovira e so na itavi eda vakacolati kina me vaka beka na samaki ni Kingdom Hall.
4 Na yalomalumalumu ena vukei keda meda ‘veivosoti ena loloma’ da qai guta na veiyaloni kei na duavata ena ivavakoso. (Efeso 4:1-3) Ena vukei keda tale ga meda vakamalumalumutaki keda vei ira era sa lesi mera veiliutaki. (Iper. 13:17) Ena uqeti keda ena noda ciqoma na ivakasala se veivakadodonutaki cava ga e soli. (Same 141:5) Na yalomalumalumu ena vukei keda tale ga meda nuitaki Jiova ena noda cakava na itavi ena lesi vei keda ena ivavakoso. (1 Pita 4:11) Me vakataki Tevita, eda kila ni noda rawaka e vu mai na veivakalougatataki ni Kalou sega ena noda kauakaua ga.—1 Sam. 17:37.
5 Ena Mata ni Kalou: O koya e bibi sara oya ni dodonu meda ‘vakamalumalumutaki keda ena ruku ni liga kaukaua ni Kalou.’ (1 Pita 5:6) Ke da vosota tiko na ituvaki dredre, eda na diva tu beka na vakacegu ena kauta mai na Matanitu ni Kalou. Ia e dodonu meda vosota tiko ga ena yalomalumalumu, da qai waraki Jiova me vakayacora nona yalayala ena nona gauna lokuci. (Jeme. 5:7-11) Me vaka ga a vakadinadinataki vua na turaga yalodina o Jope, eda na kauai vakabibi ena ‘vakavinavinakataki ni yaca i Jiova.’—Jope 1:21.
6 Na parofita o Taniela a ‘vakamalumalumutaki koya ena mata ni Kalou’ qai vakalougatataki koya o Jiova ena levu na itavi dokai. (Tani. 10:11, 12) Meda dau yalomalumalumu mada ga nida kila tiko ‘ni isau ni yalomalumalumu kei na rerevaki Jiova na iyau, kei na vakarokoroko, kei na bula.’—Vkai. 22:4.