‘Qaravi Jiova ena Reki’

1. Na cava e vakavureki vakalevu vei ira na dauveiqaravi i Jiova?

¹ “Dou reki tikoga vua na Turaga,” e vola na yapositolo o Paula. “Au sa kaya tale, Dou reki.” (Fpai. 4:4) E vakavureki vakalevu na wasei ni tukutuku vinaka kei na nodra vukei o ira era vaka na sipi mera qaravi Jiova. (Luke 10:17; Caka. 15:3; 1 Ces. 2:19) Ia, na cava eda na cakava ke da vakila ena so na gauna nida sa sega ni rekitaka tiko na noda cakacaka vakavunau?

2. E kuria vakacava noda reki nida vakasamataka na vanua e taka mai kina na noda ilesilesi?

² Na Cakacaka Lesi Vakalou: Meda nanuma ni noda cakacaka vakavunau e lesi mai vei Jiova. Io, eda kalougata dina nida “daucakacaka vata kei koya na Kalou” ena kacivaki ni tukutuku ni Matanitu kei na veivakatisaipelitaki! (1 Kor. 3:9) E tiko vata kei keda o Karisito Jisu ena cakacaka e sega ni na tokaruataki oqo. (Maciu 28:18-20) O ira tale ga na agilosi era vakaitavi ra qai cakacaka vata kei keda ena cakacaka vakaitamera ni tatamusuki vakayalo sa vakayacori tiko nikua. (Caka. 8:26; Vkta. 14:6) E vakadinadinataki ena iVolatabu, vaka tale ga kina na veika era sotava na tamata ni Kalou, ni tokona tiko o Jiova na cakacaka oqo. O koya gona nida vunau, eda ‘talai mai vua na Kalou, da qai vosa ena yaca i Karisito ena mata ni Kalou.’ (2 Kor. 2:17, VV) Oqo e dua na vuna levu meda reki kina!

3. E yaga vakacava na masu meda rekitaka tiko ga kina na cakacaka ni Kalou?

³ E bibi na masu meda rekitaka tiko ga kina na cakacaka ni Kalou. (Kala. 5:22) E rawa ga nida cakava na cakacaka ni Kalou ena nona kaukaua, ia ena gadrevi meda kerea na yalona tabu, ni na solia o koya vei ira era kerea vua. (Luke 11:13; 2 Kor. 4:1, 7; Efeso 6:18-20) Nida masulaka tale ga na noda cakacaka vakavunau ena vukea me dodonu tiko ga noda rai ke mani vakacava na ituvaki eda sotava. Ena rawa tale ga nida na vunau tiko ga kina ena doudou kei na reki.​—Caka. 4:29-31; 5:40-42; 13:50-52.

4. E toroya cake vakacava noda reki ena cakacaka vakavunau na vakavakarau vinaka? Na cava e so na sala e rawa nida vakavakarau kina?

⁴ Vakavakarau Vinaka: Dua na sala e rawa ni toroi cake kina noda reki ena noda vakaitavi ena cakacaka vakavunau, oya na vakavakarau vinaka. (1 Pita 3:15) Na vakavakarau vaka oqo e sega ni dodonu me taura vakalevu na gauna. Ena taura ga e vica na miniti mo railesuva kina e so na vakatutu ni kena soli na ivoladraudrau se iwalewale veiganiti ni ivola o nanuma mo na solia. Rawa ni o wilika na ivola Na Sala me Tekivu qai Tomani Kina na Veivosaki ena iVolatabu, se na ilavelave makawa ni Noda Cakacaka Vakaitalatala mo digia kina na iucu ni vosa e veiganiti. E so na dautukutuku era raica ni veivuke vakalevu nodra dau vola e dua na ivakamacala lekaleka ena dua na tikinipepa. Ra qai dau raica ena so na gauna me rawa nira nanuma kina na ka mera na tukuna. Oqo e vukei ira mera kua kina ni taqaya, ra qai nuidei ni vunau tiko ga ena doudou.

5. E yaga vakacava vei keda kei ira tale e so na reki?

⁵ E levu na ka vinaka e kauta mai na reki. Dua, ena vukea me taleitaki kina na noda itukutuku, ena vakaukauataki keda tale ga meda vosota. (Niem. 8:10; Iper. 12:2) Koya e bibi sara, na noda veiqaravi ena reki e lagiti kina o Jiova. O koya gona meda ‘qaravi Jiova mada ga ena marau [se, “reki,” NW].’​—Same 100:2.