Toroya Cake na Nomu Rekitaka na Vunau
1 E ka rekitaki na wasea na itukutuku vinaka—o vakila tiko beka oya ena nomu cakacaka vakavunau? Ia, ke da sega ni qaqarauni, na vuravura ca eda bula tu kina oqo e rawa ni vakavuna meda rere, me sega nida rekitaka kina na noda vunau. E rawa tale ga ni vakayalolailaitaki keda na vunau ena yalava e sega nira dau vakarorogo na vakaitikotiko kina. Na cava e rawa nida cakava me toroya cake na noda rekitaka na vunau?
2 Me Donu na Noda Rai: Ena vukei keda vakalevu ke dau donu na noda rai. E dua na sala meda cakava kina, oya na noda dau vakasamataka vakabibi ni noda cakava na itavi dokai oqo eda “sa daucakacaka vata [tiko kina] kei koya na Kalou.” (1 Kor. 3:9) O Jisu tale ga e tokoni keda tiko ena noda cakacaka oqo. (Maciu 28:20) Qai vakayagataki ira na ilawalawa agilosi mera cuqeni keda. (Maciu 13:41, 49) Meda nuidei gona ni dusimaki tiko mai vakalou na noda sasaga. (Vkta. 14:6, 7) Ke mani vakacava na nodra rai na tamata me baleta na noda cakacaka, e rekitaki vakalevu ga mai lomalagi!
3 Vakavakarau Vinaka: Ke da vakavakarau vinaka e rawa nida na rekitaka na noda vunau. E sega ni cakacaka levu na noda vakarautaki keda ina cakacaka vakavunau. E taura e vica wale ga na miniti na noda wilika e dua na tikina vinaka ena ivoladraudrau vou meda lai vakayagataka, se ena ivola cava ga e soli tiko ena vula oya. De rawa ni o vakayagataka e dua na iwalewale mai na ulutaga “Ka Mo Kaya me Baleta na iVoladraudrau,” ena Noda Cakacaka Vakaitalatala ni Matanitu. Rawa ni o raica tale mada na ulutaga “E So na iWalewale ni Vunau e Veivale” ena itoma ni Janueri 2002, o rawa tale ga ni taura mai na ivola na Reasoning e dua na iwalewale maqosa ni vunau. Ke o sega ni kila na ka mo kaya me baleta e dua na iulubale era dau vakayagataka vakalevu na itaukeinivale, vakarautaka rawa na ka mo kaya me okata na iulubale oya, qai vakamuai koya ina dua na ulutaga totoka. E yaga e ke na ivola na Reasoning. Nida vakayagataka vinaka na ivukevuke kece oqo eda na yalodei, da qai rekitaka na noda vunau.
4 Masu Vagumatua: E bibi na masu meda reki tiko ga kina. Oqo na cakacaka i Jiova, o koya gona, meda masuti koya me sobuti keda mai na yalona, ni dua na vua ni yalo tabu na reki. (Kala. 5:22) Ena vakaukauataki keda o Jiova meda vunau tiko ga. (Fpai. 4:13) Nida masulaka tale ga na noda cakacaka vakavunau ena vukei keda me dodonu tiko ga na noda rai, vakabibi ke da sotava kina na veika drakidrakita. (Caka. 13:52; 1 Pita 4:13, 14) Ke da rere, ena vakayalodoudoutaki keda na masu meda rekitaka tiko ga na noda vunau.—Caka. 4:31.
5 Vaqara na Gauna Vinaka: Sa macala ga nida rekitaka vakalevu na cakacaka vakavunau ke da sotavi ira na itaukeinivale, da qai vunau vei ira. O koya gona, de rawa ni o na sotavi ira ke o veisautaka na gauna ni nomu vunau e veivale ina yakavi, se mani yakavibogi sara. Ia eda sotavi ira na tamata ena gauna kece ga eda taubale kina ena salatu, nida lai volivoli, vodo basi, se ena lomaniba ni gade. Vakacava mo vakarautaka rawa e dua na iwalewale lekaleka ni vunau mo qai saga mo vosa vei ira era bau matadredredre toka? Se o cakacaka saumi beka, se o vuli, o na dau talanoa kina kei ira na tani. De rawa ni o vunau ena nomu kauta cake mai e dua na ulutaga vakaivolatabu ena uqeta na tataleitaki. E totoka tale ga na vakatutu era koto ena itoma ni Noda Cakacaka Vakaitalatala ni Matanitu, Janueri 2002, taqana 3. Ke da saga meda vakamuria e dua mada ga vei ira na ka e vakaturi e ke, e sega ni vakataratutu ni na toroya cake na noda rekitaka na vunau.
6 Na reki ena uqeti keda meda vosota, e bibi gona meda saga meda reki tiko ga! Ke da vakayacora vaka kina, ena gauna ena vakacavari kina na cakacaka e sega ni na tokaruataki oqo, eda na kalougata vakalevu. Oya e vuna vinaka meda toroya cake kina na noda rekitaka na vunau.—Maciu 25:21.