Yaga ni Vuku Vakalou
1 E so era nanuma ni dodonu mera kauaitaka vakalevu na iVakadinadina i Jiova na kena vakaoti na leqa e bikai ira tu na kawatamata nikua. Era sega beka ni raica na yaga ni noda cakacaka ni veivakavulici ena iVolatabu. Me vaka ga a vola na yapositolo o Paula: “Ni sa ka lialia na vunautaki ni kauveilatai vei ira era sa lako sese tiko, ia sa kaukauwa ni Kalou vei keda eda sa vakabulai kina.” (1 Kor. 1:18, VV) Eda kila vinaka ni cakacaka bibi duadua na cakacaka vakavunau e sa vakayacori tiko oqo e vuravura.
2 Bula Vinaka ena Gauna Oqo: E matewale na nodra sasaga na tamata me wali na leqa e sa sotavi tiko. Na lawa e vakatabui kina na basulawa e sega ni tarova rawa na kena tubu tiko ga na itovo oqori. E sega ni vakaotia na ivalu na veidinadinati e dau sainitaki me baleta na veisaututaki kei na nodra vakayagataki na mataivalu ni veitaqomaki. E sega ni vakaotia na dravudravua na porokaramu ni veivuke e vakarautaki me vakavinakataka na bula ni tamata. (Same 146:3, 4; Jere. 8:9) Me kena veibasai, sa veisautaka na nodra bula e vica vata na milioni na itukutuku ni Matanitu ni Kalou, ni vukei ira mera vakaitovotaka na itovo vou e vakadonuya na Kalou. (Roma 12:2; Kolo. 3:9, 10) Ena nodra cakava oqori era vakila na vinaka ni nodra bula ena gauna sara ga oqo.—1 Tim. 4:8.
3 Gauna Totoka Mai Muri: Me ikuri ni veivuke e soli vei keda meda walia kina vakavinaka na noda leqa, na vuku vakalou e vukei keda meda lalawataka vinaka kina noda gauna mai muri. (Same 119:105) Ena sega ni matewale na noda sasaga, me vaka na kena e yaco ena noda via veisautaka na ituvaki dredre eda bula donuya tu. (Dauv. 1:15; Roma 8:20) Eda marau gona nida sega ni vakasabusabutaka noda bula ena noda vakabibitaka na ka e lasuwale! Ia, eda kauaitaka ga vakalevu na vosa ni yalayala dina i Jiova me baleta na “lomalagi vou kei na vuravura vou” e kune kina na ivalavala dodonu. Ena matata vakasigalevu ena siga ni veilewai i Jiova ni donu vinaka na nodra digidigi o ira era vakararavi ena vuku vakalou.—2 Pita 3:10-13; Same 37:34.
4 Ena rairai sega ni yaga beka na vuku vakalou vei ira na kauaitaka vakalevu na “vuku ni vuravura oqo,” ia e sala vinaka duadua me muri. (1 Kor. 1:21; 2:6-8) O koya gona, eda vunautaka tiko ga e vuravura taucoko na itukutuku me baleta na Kalou, ni “vuku duaduaga” o koya.—Roma 16:27.