E Uasivi na Vuli Vakalou
“Au sa okata me sega ni yaga na ka kece ga e na kena talei na kilai Karisito Jisu.”—FPAI. 3:8, VV.
1, 2. Na cava era vakatulewa eso na lotu vaKarisito, na vuna?
E GONE vuku o Robert e koronivuli. Ni se yabaki walu a sikovi koya i vale e dua nona qasenivuli qai tukuna vua ni na rawaka sara vakalevu. E kaya vua ni rawa ni vuniwai ena dua na siga. Nona rawaka vakavuli ena sekeneri, a rawata kina na ivakatagedegede me curu ena univesiti vinaka duadua ena nona vanua. Ia a vinakata o Robert me vakuai koya mai na vuli qori, dina ni levu era nanuma ni kunekunei dredre me dua e rawata na vuli va qori. A vakatulewataka ga me painia tudei.
2 Me vakataki Robert, e levu na lotu vaKarisito—gone kei na qase—a rawa sara ga nira rawaka ena veika ni vuravura qo. Eso era vakatulewataka mera vakuai ira mai na veika qori, mera sauva kina nodra isausau vakayalo. (1 Kor. 7:29-31) Na cava e uqeti ira na lotu vaKarisito vakataki Robert mera vakalevutaka nodra cakacaka vakavunau? E vu vakalevu qori ena nodra lomani Jiova, kei na nodra sa mai kila na yaga ni vuli vakalou. O bau vakasamataka se na vakacava tu na ivakarau ni nomu bula ke o sega ni kila na ka dina? Nida vakasamataka eso na veivakalougatataki eda marautaka ena vuku ni nona veivakavulici o Jiova, ena uqeti keda meda taleitaka tiko ga na itukutuku vinaka da qai gumatua na wasea yani.
Ka Dokai ni Vakavulici Keda na Kalou
3. Eda vakadeitaka vakacava ni tu vakarau o Jiova me vakavulici keda na kawatamata ivalavala ca?
3 Ena nona yalovinaka, e tu vakarau o Jiova me vakavulici keda na kawatamata ivalavala ca. Ni parofisaitaki ira tiko na lotu vaKarisito lumuti, e kaya na Aisea 54:13: “A luvemu kecega ena vakavulici ira ko Jiova, ena ka levu talega na nodra vakacegu na luvemu.” Na vosa qori e vakaibalebaletaki tale ga vei ira na ‘so tani tale na sipi’ i Karisito. (Joni 10:16) E matata na tikina qo nida raica e dua na parofisai sa vakayacori tiko ena noda gauna. A raivotutaka o Aisea na nodra tabili mai na tamata mai na veivanua kece ga ina sokalou dina. E vakamacalataka nira tukuna tiko: “Me da mai la’ki cabe cake ki na ulu-ni-vanua i Jiova, ki na vale ni Kalou i Jekope; ena vakavulica vei keda ko koya na nonai valavala, ia eda na muria na nona sala.” (Aisea 2:1-3) Sa dua dina na ka dokai ni vakavulici keda na Kalou!
4. Na cava e vinakata o Jiova vei ira e vakavulica?
4 Na cava meda cakava me rawa ni vakavulici keda kina o Jiova? Dua na ka bibi me laurai vua e dua oya me yalomalumalumu qai rawarawa ni vakavulici. E vola na daunisame o Tevita: “Sa yalovinaka ka yalododonu ko Jiova. . . . Ena vakavulici ira na yalomalumalumu e na nona sala.” (Same 25:8, 9) E kaya o Jisu: “Au sa vakavinavinaka vei kemuni, Tamaqu, na Turaga ni lomalagi kei vuravura, ni ko sa vunia na veika oqo vei ira na vuku kei na yalomatua, ko ni sa vakatakila ga vei ira na gone lalai.” (Luke 10:21) Sega li ni o na volekata na Kalou, e dau “solia nai solisoli loloma vei ira na yalomalumalumu”?—1 Pita 5:5.
5. Eda mai kila vakacava na Kalou dina?
5 Nida dauveiqaravi i Jiova, eda na tukuna beka ni noda mai kila na ka dina e vu mai na noda vuku vakatamata? Sega. Ke va qori, eda na sega sara ga ni kila na Kalou. E kaya o Jisu: “E sega ni lako rawa mai vei au e dua na tamata, kevaka sa sega ni vakayarayarataki koya ko Tamaqu sa talai au mai.” (Joni 6:44) E vakayagataka o Jiova na cakacaka vakavunau kei na yalona tabu me vakayarayarataki ira mai era vaka na sipi, qo o ira “na ka sa domoni e na veimatanitu kecega.” (Akeai 2:7) Sega li ni o marautaka ni vakayarayarataki iko mai o Jiova vua na Luvena?—Wilika Jeremaia 9:23, 24.
Na Vuli e Veisautaka na Bula
6. Ena yaga vakacava na “veikilai kei Jiova”?
6 E vakayagataka o Aisea na vosa vakatautauvata rogo vinaka ena nona parofisai, me vakamacalataka kina na kena sa veisau tiko na itovo ni tamata ena gauna qo. Sa ra yalomalua o ira na tamata voravora. (Wilika Aisea 11:6-9.) Era sa vulica mera bula veiyaloni o ira na dau veicati tu ena vuku ni matatamata era lewena, nodra mataqali kei na itovo vakavanua. E vaka sara ga era sa ‘tukia na nodra iseleiwau me bati ni siviyara.’ (Aisea 2:4) Na cava e vakavuna na veisau vakasakiti qo? Era sa “veikilai kei Jiova” ra qai bulataka sara ga na ka era vulica. Dina nida sega ni uasivi na dauveiqaravi ni Kalou, ia eda lewe kece ni mataveitacini e vuravura raraba. Na kena taleitaki na itukutuku vinaka e vuravura raraba kei na vuavuaivinaka ni cakacaka e vakadinadinataka na cecere ni vuli vakalou.—Maciu 11:19.
7, 8. (a) Na cava eso na “bai ni valu kaukauwa” e veisereki kina na vuli vakalou vei ira na tamata? (b) E vakacaucautaki vakacava o Jiova ena vuli vakalou?
7 E vakatauvatana na yapositolo o Paula na nodra cakacaka vakaitalatala na dauveiqaravi ni Kalou ina vala vakayalo. E vola: “Ni sa sega ni ka vakayago na neitoui yaragi, ia sa kaukauwa ga e na vuku ni Kalou me talaraki kina na bai ni valu kaukauwa: sa talaraka sobu kina na veinanuyaki, kei na ka cecere kecega sa vakalevulevui me vorata na vuku ni Kalou.” (2 Kor. 10:4, 5) Na cava eso na “bai ni valu kaukauwa” e veisereki kina na vuli vakalou? Qori na ivakavuvuli ni lotu lasu, vakatevoro, kei na ivakavuvuli vakatamata, me tukuni ga kina eso na kena ivakaraitaki. (Kolo. 2:8) Na vuli vakalou e uqeti ira na tamata mera biuta nodra ivakarau ca, ra qai bulataka na itovo vakalou. (1 Kor. 6:9-11) E vakavinakataka na bula vakavuvale. E vakainaki kina nodra bula o ira era sega tu nodra nuinui. Qo na vuli e vinakati tu ena gauna nikua.
8 Na dau dina e dua na itovo e vakavulica vei keda o Jiova, me vaka e vakadinadinataki ena ivakaraitaki e tarava. (Iper. 13:18) A vakadonuya e dua na marama mai Idia me vuli iVolatabu, rawata tale ga na ivakatagedegede me dua na dautukutuku bera ni papitaiso. Dua na siga ni lesu tiko i vale mai na tara Kingdom Hall, a kunea e dua na itaube koula volekata na ikelekele ni basi, e rauta toka ni walunadrau na dola na ilavo ni Mereke na kena isau. Dina ni dravudravua, a kauta ga na itaube qori ina siteseni ni ovisa. E kurabuitaka na ovisa na ka a cakava na marama qo! E muri, a tarogi koya e dua tale na ovisa, “Na cava o mai biuta kina ina siteseni na itaube qo?” E sauma, “E veisautaka noqu rai na ivakavuvuli ena iVolatabu, au sa dau dina ena gauna qo.” A qoroya dina na ovisa na ka e tukuna na tacida, mani tukuna sara vua na qase ni ivavakoso rau veitomani tiko yani ena siteseni: “E sivia na 38 na milioni era tiko ena vanua qo. Ke o rawa ni vukea e le tini tale mera vakataki koya na marama qo, sa na bau totoka sara ga ya.” Nida vakasamataka na yaga ni vuli vakalou ena nodra bula e lewe milioni, sega li ni uqeti keda qori meda vakacaucautaki Jiova?
9. E rawa vakacava me veisautaka nona ivakarau ni bula e dua?
9 Na kaukaua ni Vosa ni Kalou, salavata kei na veidusimaki ni yalo tabu i Jiova, e uqeta kina e levu mera veisautaka nodra bula. (Roma 12:2; Kala. 5:22, 23) E kaya na Kolosa 3:10, (VV): “Sa vakaisulu tu e na tamata vou, o koya sa vakavoui tiko e na vuku, me veiucui kina kei koya ka a buli koya.” Na itukutuku ena Vosa ni Kalou, na iVolatabu, e rawa ni vakatakila na ka e tu e lomada, qai veisautaka na ivakarau ni vakasama kei na ivakarau ni nona rai me baleta eso na ka. (Wilika Iperiu 4:12.) Nona vulica e dua na kilaka dodonu ena iVolatabu qai muri na ivakatagedegede dodonu i Jiova, ena rawa ni itokani ni Kalou, qai nuitaka na bula tawamudu.
Vakavakarau ena Veisiga Nimataka
10. (a) Na cava e tukuni kina ni o Jiova duadua ga e rawa ni vakarautaki keda ena veisiga nimataka? (b) Na veisau levu cava sa na vakarau yaco ena vuravura taucoko?
10 O Jiova duadua ga e rawa ni vakarautaki keda ena veisiga nimataka baleta ni kila vinaka tu na veika e se bera mai. Ena sega ni daro na veika sa tuvanaka tu me baleta na noda veisiga nimataka. (Aisea 46:9, 10) E parofisaitaka ena iVolatabu ni ‘sa voleka mai na siga levu i Jiova.’ (Sefa. 1:14) Ena siga qori, ena qai dina kina na Vosa Vakaibalebale 11:4: “Sa sega ni yaga nai yau e na siga ni cudru: ia nai valavala dodonu sa ia na veivakabulai mai na mate.” Ni sa na tadu mai na siga ni veilewai i Jiova me vakarusa na vuravura i Setani, ena ka bibi ena gauna qori na noda veiwekani kei na Kalou. Ena tawayaga na ilavo. E kaya na Isikeli 7:19: “A nodra siliva era na biuta ki na sala ni koro; kei na nodra koula ena vaka na ka velavela vei ira.” Noda kila na ka ena cakava na Kalou ena uqeti keda meda vakatulewa vakavuku ena gauna qo.
11. E yaga vakacava noda vuli vakalou meda vakarautaki keda kina ena veisiga nimataka?
11 Dua na sala e vakarautaki keda kina na vuli vakalou ena siga i Jiova oya meda vakaliuca na ka e bibi cake. E vola na yapositolo o Paula vei Timoci: “Vakarota vei ira era sa vutuniyau e na gauna oqo, me ra kakua ni dokadokai ira se vakararavi e nai yau sa sega ni tu dei, vua ga na Kalou bula.” Ke da sega mada ga ni vutuniyau, e se yaga tiko ga na ivakasala vakalou qo. Na cava e okati kina? Meda kua ni binia na iyau vakayago, meda saga meda “caka vinaka” da qai cakava na “cakacaka e yaga.” Nida vakaliuca na veika vakayalo ena noda bula, eda sa ‘binia me noda na yavu ena yaga mai muri.’ (1 Tim. 6:17-19) Na noda vakuai keda va qori e vakaraitaka na vuku vakalou, me vaka ga e tukuna o Jisu, “na cava li e na kena yaga vua na tamata kevaka e rawati vuravura taucoko, ka vakayalia kina na nona bula?” (Maciu 16:26, 27, VV) Nida kila ni sa voleka na siga i Jiova, meda tarogi keda mada: ‘Au binia tiko e vei na noqu iyau? Au qarava tiko beka na Kalou se na iYau?’—Maciu 6:19, 20, 24.
12. Na cava meda kua ni yalolailai kina ke da beci ena noda cakacaka vakaitalatala,?
12 Dua vei ira na “cakacaka vinaka” e tukuni vakamatata ena Vosa ni Kalou mera vakaitavi kina na lotu vaKarisito, oya na cakacaka ni veivakabulai ni kena vunautaki na Matanitu ni Kalou kei na veivakatisaipelitaki. (Maciu 24:14; 28:19, 20) Me vaka ga na kena beci noda cakacaka vakaitalatala ena imatai ni senitiuri, e rawa ni yaco tale ga qori nikua. (Wilika 1 Korinica 1:18-21.) Ia e sega ni veisautaka qori na bibi ni itukutuku vinaka, eda na sega tale ga ni vakaweleweletaka na itavi dokai qori ni se soli tu na gauna. (Roma 10:13, 14) Eda na vakalougatataki vakalevu nida tubera eso me yaga vei ira na vuli vakalou.
Vakalougatataki Nira Vakuai Ira
13. Na cava e vakuai koya kina na yapositolo o Paula ena vuku ni itukutuku vinaka?
13 Ni bera ni tavuki na yapositolo o Paula me lotu vaKarisito, a vakavulici taumada ena ivakarau vakaJiu. Ni sa yabaki 13, a biuta na nona vanua o Tarisu qai gole i Jerusalemi me lai vuli vua na qasenivuli rogo ni Lawa o Kamalieli. (Caka. 22:3) Ni toso na gauna, a kilaitani o Paula vei ira era tabavata, ke tomana tiko ga na vuli ya, ena rairai yacova e dua na itutu dokai vei ira na Jiu. (Kala. 1:13, 14) A vakanadakuya na veika kece qori ena gauna a ciqoma kina na itukutuku vinaka qai vakaitavi ena cakacaka vakavunau. A veivutunitaka beka o Paula nona vakatulewa? Sega. E vola: “Au sa okata me sega ni yaga na ka kece ga e na kena talei na kilai Karisito Jisu na noqu Turaga. Au sa biuta tani na ka kece ga e na vukuna; au sa okati ira kece ga me ra de ni manumanu.”—Fpai. 3:8, VV.
14, 15. Eda vakalougatataki vakacava nida ‘cakacaka vata tiko kei na Kalou’?
14 Me vakataki Paula ga, era vakuai ira tale ga ena gauna qo na lotu vaKarisito ena vuku ni itukutuku vinaka. (Mari. 10:29, 30) Eda na calata beka kina e dua na ka? E kaya o Robert, a tukuni toka ena itekivu ni ulutaga qo, e dua na ka era duavata kina kei koya e levu: “Au sega sara ga ni veivutunitaka e dua na ka. Au marau qai lomavakacegu niu cakacaka vakatabakidua, au ‘tovolea qai raica ni sa yalovinaka o Jiova.’ E dau vakalougatataki au o Jiova niu vakuai au vakayago meu sauva kina na isausau vakayalo. Sega sara ga ni dua na ka me bau yali vei au. E levu tale na ka au rawata!”—Same 34:8; Vkai. 10:22.
15 Ke o dau vakaitavi ena cakacaka vakavunau, o qai veivakavulici tale ga, e sega ni vakabekataki ni o sa tovolea, o raica tale ga na yalovinaka i Jiova. O dau vakila ena so na gauna na veidusimaki ni yalo tabu ni o tukuna tiko na itukutuku vinaka? O dau raica nodra kauai eso ni uqeta na lomadra o Jiova mera rogoca na itukutuku vinaka? (Caka. 16:14) O bau vakila na veivukei i Jiova mo vosota kina na veika dredre, rairai mo vakarabailevutaka kina nomu cakacaka vakaitalatala? O dau vakila nona veitokoni ena gauna dredre, rawa kina ni o tomana tiko ga nomu veiqaravi, dina ni o vakila ni o sa malumalumu tiko? (Fpai. 4:13) Nida vakadinata na veivukei i Jiova ena noda cakacaka vakaitalatala, eda vakila nida lakovata tiko kei koya da qai volekati koya tale ga. (Aisea 41:10) Sa dua dina na ka dokai nida ‘cakacaka vata tiko kei na Kalou’ ena cakacaka levu ni veivakavulici.—1 Kor. 3:9.
16. E yaga vakacava na nomu sasaga kei na nomu vakuai iko ena vuku ni vuli vakalou?
16 E levu era vinakata mera rawata eso na ka ena gauna era bula tu kina, me qai tawamudu na kena vakananumi. Eda sa vakadinadinataka ni dau guilecavi totolo ena vuravura qo na rawaka vakayago. Ia, na cakacaka e tokona vakalevu tiko o Jiova ena gauna qo ena kena vakarokorokotaki na yacana, ena maroroi ena ivolatukutuku ni cakacaka vakalou. Ena sega vakadua ni guilecavi me tawamudu. (Vkai. 10:7; Iper. 6:10) Meda vakamareqeta mada ga noda itavi dokai ena nodra vakavulici eso tale mera kilai Jiova. Qori gona na cakacaka ena sega vakadua ni guilecavi.
O na Sauma Vakacava?
• Na cava e vinakata o Jiova vei ira e vakavulica?
• E yaga vakacava ina noda bula na vuli vakalou?
• Eda vakalougatataki vakacava nida tubera eso me yaga vei ira na vuli vakalou?
[iYaloyalo ena tabana e 23]
Eda lewe ni mataveitacini e vuravura raraba ni vakavulici keda o Jiova
[iYaloyalo ena tabana e 24]
Sega li nida vakalougatataki nida ‘cakacaka vata kei na Kalou’?