Wase 2—Na Ka me Caka Mera Toso Kina Noda Vuli iVolatabu
Vakavakarau ena Veivakavulici
1 Me yaga noda caka vuli iVolatabu, ena sega wale ga ni okati kina na kena veivosakitaki kei na wiliki ni tikinivolatabu e sega ni lavetaki. E vinakati meda vakamacalataka me na tara na lomadra na gonevuli. Oqo ena gadrevi kina na vakavakarau vinaka nida vakasamataki koya tiko na gonevuli.—Vkai. 15:28.
2 Meda Vakavakarau Vakacava: Tekivu ena nomu masulaki koya vei Jiova. Masuta tale ga na veika e gadreva. Kerei Jiova me vukei iko mo tara na lomana. (Kolo. 1:9, 10) Mo kila vinaka na usutu, vakasamataka na ulutaga se wase, ulutaga lalai, kei na iyaloyalo e koto kina. Tarogi iko, ‘Na cava e vakabibitaki tiko e ke?’ Ena vukei iko mo vakabibitaka na tikina bibi oya ni o sa veivakavulici.
3 Dikeva vinaka na veiparakaravu yadua. Tovolea mo sauma na taro e tarogi, qai toqarukutaka ga na vosa kei na matavosa bibi. Raica se sema vakacava na tikinivolatabu e sega ni lavetaki kei na tikina bibi ena parakaravu, qai digia na kena me wili ena gauna ni vuli. Ena yaga sara ke o vola ena yasa ni draunipepa ni ivola e so na ivakamacala leleka ni tikinivolatabu. Me matata vei gonevuli ni ka e vulica tiko e yavutaki ena Vosa ni Kalou.—1 Ces. 2:13.
4 Me Yaga Vua na Gonevuli: Vakasamataka se ena ganiti koya vakacava na gonevuli na ka ena vulica. Tovolea mo vakasamataka rawa na ka ena rairai taroga, kei na tikina ena via dredre me kila se ciqoma. Tarogi iko mada: ‘Na cava e gadreva me kila, se me cakacaka kina me rawa ni toso vakayalo? Au na tara vakacava na lomana?’ Qai moica na nomu veivakavulici me salavata kei na ka e gadreva o gonevuli. Ena so na gauna, o na raica ni veiganiti me vakarautaki na vosa vakatautauvata, dua na ivakamacala, se taro, me rawa ni kila vinaka kina o gonevuli na ibalebale ni ka e vulici tiko, se tikinivolatabu. (Niem. 8:8) Kua ni vakamacalataka tale e so na tikina e sega ni vukea na kena vakamatatataki na usutu. Dua na ivakamacala lekaleka me tini kina na vuli, oqo ena vukei koya me kila na veitikina bibi.
5 Eda na marau nira vuataka na yalododonu na ka vou oqo me vakalagilagi kina o Jiova! (Fpai. 1:11) Mo vukei ira mera rawata na isausau oya, vakavakarau vinaka ena gauna kece o lai veivakavulici kina ena iVolatabu.