Porokaramu Vou ni Soqo ni Tabacakacaka

Nida bula tu oqo ena “veigauna dredre,” eda gadreva na vuku vakalou meda rawata na veivakadonui i Jiova da qai saga meda dei kina. (2 Tim. 3:​1, VV) Na porokaramu ni soqo ni tabacakacaka ena yabaki vakacakacaka ni 2005, ena vakarautaki kina na ivakasala yaga qai veivakayaloqaqataki vei keda, e kena usutu “Me Nomu iDusidusi ‘na Vuku Maicake.’ ”​​—⁠Jeme. 3:​17.

Ena vukei keda na imatai ni vosa veitaravi, “Me Laurai Votu ena Noda Bula na ‘Vuku Maicake,’ ” meda kila se cava e okati ena noda savasava, veivakacegui, yalorawarawa, qai tu vakarau ni rogoca na ivakasala. Ena qai vakabibitaka na ivakatawa ni tabacakacaka e tolu tale na basoga ni vuku vakalou. Ena tinia na imatai ni siga na ivakatawa ni tikina ena nona vakamacalataka na ka mera cakava na italatala lotu Vakarisito, dina ga nira raici tu mera “sega ni vuli ka lewe ni vanua wale ga,” ia era vakarautaki mera vakatetea na vuku vakalou.​​—⁠Caka. 4:​13, VV.

Eda na vulica ena ulutaga ni vosa veitaravi ena ikarua ni siga “Kakavaka na Ka e Veivakatataki Cake” na sala meda kila kina da qai qarauna na veika e rawa ni vakamalumalumutaki keda vakayalo. Eda na vulica tale ga kina na sala meda veiuqeti kina ena soqoni, ena cakacaka vakavunau, kei na vuvale. Na vunau soqovi levu, “Yaga ni Vuku Vakalou ena Noda Bula,” ena vakatitobutaka na veika yaga eda sa vakila tiko nida muria na ivakavuvuli vakalou. Na iotioti ni vosa, “Ena Taqomaki Keda na Noda Muria na Vuku Vakalou,” ena vakataudeitaki keda meda vakararavi ga vei Jiova me solia vei keda na vuku ena iotioti ni veisiga oqo.

E dau namaki ena veisoqo kece na nodra papitaiso na tisaipeli vou. E okati tale ga ena porokaramu na Koronivuli ni Vuli Vunau kei na vulici ni Vale ni Vakatawa ni macawa oya. E vinakata o Jiova meda vakayagataka vinaka na vuku e solia mai me rawa ni yaga vei keda. Ena vakavutuniyautaki keda vakayalo na ivakasala kei na veivakayaloqaqataki ni soqo ni tabacakacaka oqo.​​—⁠Vkai. 3:​13-​18.