Soqo ni Tabacakacaka ena Uqeti Keda Meda Taqomaka Noda Bula Vakayalo
1. Na cava e dua na isolisoli e vakarautaka o Jiova ena yaga ena noda vunautaka na itukutuku vinaka?
1 E dusimaki keda vakayalololoma o Jiova, e vakavulici keda, qai vakayaloqaqataki keda meda cakava na itavi e lesia, oya meda vunautaka na itukutuku vinaka. (Maciu 24:14; 2 Tim. 4:17) E dua gona na sala e cakava kina qori, na noda soqo ni tabacakacaka vakayabaki. Na porokaramu vou ni yabaki vakacakacaka ni 2010 e kena ulutaga “Taqomaka Nomu Bula Vakayalo,” e yavutaki ena Roma 8:5 kei na Juta 17-19. E tuvanaki me tekivu na soqo ena imatai ni macawa ni Sepiteba, 2009.
2. (a) Ena yaga vakacava vei keda na soqo ni tabacakacaka? (b) E yaga vakacava ena nomu cakacaka vakaitalatala na soqo ni tabacakacaka era sa vakayacori oti?
2 Yaga ni Soqo: Ena uqeti keda na porokaramu meda yadrava tiko na ka e veivakaleqai, me vaka na ka e veivakawelei se vakaoti gauna, da sega ni kauaitaka kina na veika e bibi cake. Eda na vulica meda kua ni vakaweleweletaka na ivalavala ca, vaka kina na ibalebale ni matua vakayalo. Ena vakamacalataki ena vosa veitaravi ena Sigatabu na veika eda rawa ni cakava yadudua se vakavuvale meda kaukaua tiko kina vakayalo nida sotava na veika dredre kei na veivakatovolei. Ena uqeti keda tale ga meda taqomaka na lomada, kei na noda bula vakayalo, qai makaresese tiko ga vei keda na nodra na vakalougatataki o ira era taqomaka na nodra bula vakayalo.
3. Ena vakayacori ena gauna cava noda soqo ni tabacakacaka, na cava mo lalawataka?
3 Ni kacivaki ga na gauna ena caka kina noda soqo ni tabacakacaka tarava, meda lalawataka sara meda tiko ena siga ruarua da qai vakatudaliga matua. Meda nanuma tiko ni o Jiova ena vakalougatataki ira na gugumatua.—Vkai. 21:5.
4. Ena yaga vakacava na noda soqo ni tabacakacaka tarava?
4 Io, e vakarautaka o Jiova na isolisoli vinaka qo. Ena yaga sara ga na porokaramu e vakarautaka na dauveiqaravi yalodina meda vakayacora tiko ga noda itavi na italatala lotu vaKarisito. Eda vakavinavinakataka na isolisoli kece e vakarautaka o Jiova ni rawa kina “meda gumatua tiko ga ni tukuna yani na noda inuinui, meda kua ni yavalati.”—Iper. 10:23-25, NW; Jeme. 1:17.