Meda Vunau Vakacava Vei Ira na Wekada?

1. Na cava e bibi kina na yalomatua nida vunau vei ira na wekada?

¹ Ena marautaki dina meda bula ena vuravura vou kei ira na wekada nida duavata ni qaravi Jiova! E rawa ni vakavatukana dina oqori ke da vunau vei ira na wekada. E vinakati na yalomatua me maqosa kina noda vunau vei ira. E dikeva e dua na ivakatawa ni tabacakacaka: “E dau mana nodra cakacaka o ira era uqeti ira na wekadra mera tataleitaki ena nodra dau vunau vakalekaleka qai wasoma.” Eda na cakava vakacava oqori?

2. Nida kauaitaki ira dina na wekada eda na uqeti ira vakacava mera tataleitaki?

² Uqeti Ira Mera Tataleitaki: Vakasamataka vinaka na sala meda uqeti ira kina na wekada. (Vkai. 15:​28) Na cava era dau kauaitaka? Na ka dredre cava era sotava tiko? Rawa nida vakaraitaka e dua na ulutaga ena noda ivola se dua na tikinivolatabu veiuqeti e salavata sara ga kei na ulutaga era dau kauai kina. Ke da veiyawaki, e rawa nida volavola se talevoni vei ira. Ia meda kua ga ni veivakasosataki nida kaburaka na sore ni ka dina, meda vakararavi ga vei Jiova me vakatubura na sore ni ka dina oqori.​​—⁠1 Kor. 3:⁠6.

3. E rawa vakacava nida vunau vei ira na wekada ena nodra kauai ena so na ka eda dau cakava?

³ A vakasalataka e dua na turaga o Jisu ni oti nona vakabulai koya mai na levu na timoni: “Mo lako ki na nomudou, vei ira na wekamu, ka tukuna vei ira na levu ni veika sa cakava vei iko na Turaga, ka ni sa lomani iko.” (Mari. 5:​19) Vakasamataka mada na ka ena cakava oqori vei ira na wekana! Ena sega ni tautauvata beka oqori kei na ka eda na sotava, ia era na rairai kauaitaka ga na wekada na ka eda dau cakava se na ka era cakava na luveda. Noda talanoataka beka na noda itavi ena Koronivuli ni Vuli Vunau, na ka eda vulica ena soqo ni tikina, veisiko e Peceli, se na noda rawata e dua na ka eda a lalawataka, oqo ena rawa kina nida tukuna vei ira e so tale na ka me baleti Jiova kei na nona isoqosoqo.

4. Na cava meda kua ni cakava nida vunau vei ira na wekada?

⁴ Mo Yalomatua: Nida vunau vei ira na wekada, e vinaka meda kua ni tukuna e levu na ka ena dua ga na gauna. A nanuma lesu e dua na tacida ena gauna se qai vulica kina na iVolatabu: “Au dau tukuna vei tinaqu na ka kece au sa vulica tiko ena iVolatabu, e dau vakavuna vakalevu na veiba, vakauasivi vei tamaqu.” Ke dua na wekada e vakaraitaka nona taleitaka na itukutuku ena iVolatabu, meda sauma ena sala ena via kila tale kina e levu na ka ena iVolatabu. (Vkai. 25:⁠7) Meda dokai ira, da lomani ira, qai yalomalumalumu me vaka ga eda dau cakava nida cakacaka vakavunau.​​—⁠Kolo. 4:⁠6.

5. Na cava meda cakava ke ra sega ni taleitaka na wekada na itukutuku vinaka eda tukuna vei ira?

⁵ Ena dua na gauna eratou sa nanuma na weka i Jisu ni lialia o koya. (Mari. 3:​21) Ia era qai vakabauta e muri e so na wekana. (Caka. 1:​14) Ke sega ni ciqomi na noda sasaga meda wasea na ka dina vei ira na wekada, meda kua ni soro. E rawa ni veisau na kedra ituvaki kei na nodra itovo na wekada. Meda qara tiko ga na sala meda tukuna kina vei ira e dua na ka me uqeti ira mera tataleitaki. E rawa nida vukea e so na wekada mera tekivu muria na sala e basika ina bula tawamudu.​​—⁠Maciu 7:​13, 14.