Mera ‘Vakayadrati Mai na Moce’
“Ni oni kila na gauna, ni sa gauna moni yadra kina mai na moce.”—ROMA 13:11.
O RAWA NI VAKAMACALATAKA?
Na cava e bibi kina me yadra tiko vakayalo na lotu vaKarisito?
Na cava e bibi kina vua na lotu vaKarisito me kauaitaka na ka e raica kei na ka e rogoca?
E yaga vakacava na yalovinaka kei na yalomalua ena cakacaka vakavunau?
1, 2. Na cava e vinakati kina mera vakayadrati e levu?
ERAUTA ni vica vata na udolu na lewenivanua era mate e veiyabaki nira sosovu se moce ena gauna era draiva tiko kina. Eso tale era vakacegui mai na nodra cakacaka nira sega ni yadrava na gauna e dodonu mera tekivu kina, se ra moce ena gauna ni cakacaka. Ia na sosovu vakayalo e veivakaleqai sara vakalevu. Qori na vuna e vakabibitaki kina ena iVolatabu: “E marau o koya e yadra tiko.”—Vkta. 16:14-16.
2 Ni roro tiko mai na siga levu i Jiova, e levu na lewe i vuravura era moce tu vakayalo. Eso mada ga na iliuliu ni Lotu ni Veivanua Vakarisito era vakatokai ira na nodra lewe ni lotu mera ‘tuwawa daumoce.’ Ia na cava na moce vakayalo? Na cava e bibi kina mera yadra tiko na lotu vaKarisito dina? Eda na vukei ira vakacava e levu mera yadra mai na moce?
NA CAVA NA MOCE VAKAYALO?
3. Na cava na moce vakayalo?
3 Ni dua e moce ena sega ni cakava rawa e dua na ka. Ia e duidui na moce vakayalo, ena rairai ogaoga vakalevu e dua, ena sega ga ni ogaoga ena veika vakayalo. De dua ena cumuaqara me qara na ka ni bula ni veisiga se qarai ni marau, rogo, se iyau. Qori ena sega ni ogaoga kina vakalevu ena veika vakayalo. Ia o ira na yadra tiko vakayalo, era kila nida sa bula tu “ena iotioti ni veisiga,” rai qai ogaoga vakalevu ena vakayacori ni loma i Jiova.—2 Pita 3:3, 4; Luke 21:34-36.
4. Na cava e bibi kina na ivakasala: “Meda kua ni moce me vakataki ira na kena vo”?
4 Wilika 1 Cesalonaika 5:4-8. E vakasalataki ira tiko e keri na tacina vakayalo o Paula mera kua ni “moce me vakataki ira na kena vo.” Na cava e vakaibalebaletaka? Dua na sala eda rawa ni “moce” kina oya na noda sega ni kauaitaka na ivakatagedegede savasava ni Kalou. Dua tale oya na noda vakalecalecava ni sa voleka na gauna me na vakarusa kina o Jiova na ituvaki ca. Meda qarauna mada ga meda kua ni rawai ena nodra sala kei na nodra ivalavala o ira na sega ni qaravi Kalou.
5. Na itovo cava e dau laurai vei ira na moce tu vakayalo?
5 Eso era nanuma ni sega ni tiko e dua na Kalou me lewai ira. (Same 53:1) Eso tale era nanuma ni sega ni kauaitaki keda na Kalou, sega tale ga na betena meda kilai koya. Ia eso era nanuma ni nodra lewena e dua na matalotu era na veitokani kina kei na Kalou. O ira qori era moce tu vakayalo. E vinakati mera vakayadrati. Eda na vukei ira vakacava?
MEDA YADRA TIKO GA
6. Na cava e bibi kina meda yadra tiko vakayalo?
6 Ni bera nida vakayadrati ira eso tale, e vinakati meda yadra rawa tiko. Na cava e vauci kina? Na Vosa ni Kalou e vakatauvatana na moce ina “cakacaka ni butobuto,” qori na marau vakalialia, na gunu ni vaqara mateni, veiyacovi tawakilikili, ivalavala vakasisila, veivala kei na vuvu. (Wilika Roma 13:11-14.) E sega ni rawarawa meda vorata na itovo kece qori. E bibi dina meda qaqarauni. Ena rawa ni vakayalia nona bula e dua na draiva ke vakalecalecava na rerevaki ni sosovu ena gauna e draiva tiko kina. Ia e bibi sara meda qaqarauni na lotu vaKarisito ni rawa ni veivakaleqai na moce vakayalo!
7. Na cava e rawa ni yaco ke cala na noda rai me baleti ira ena yalava?
7 Kena ivakaraitaki, e rawa ni nanuma e dua na lotu vaKarisito nira na sega tu ga ni ciqoma na itukutuku vinaka o ira ena yalava. (Vkai. 6:10, 11) Ena rairai tukuna, ‘Ke sega ni dua e via vakarorogo, na cava meda gumatua kina ni vukei ira?’ E macala ga ni levu era moce tu vakayalo ena gauna qo, ia e rawa ni veisau na kedra ituvaki kei na nodra rai. Eso mada ga era sa yadra mai na moce ra qai ciqoma na itukutuku vinaka. Eda na vukei ira ga ke da yadra tiko, qori ena noda tovolea eso na iwalewale vou me laulau kina na noda vunautaka na itukutuku ni Matanitu ni Kalou. E okati ena noda yadra tiko na noda kauaitaka na vuna e bibi kina na noda cakacaka vakaitalatala.
VUNA E BIBI KINA NODA CAKACAKA VAKAITALATALA
8. Na cava e rui bibi kina na noda cakacaka vakaitalatala?
8 Meda nanuma tiko ke mani ciqomi se sega na noda itukutuku, ena vakalagilagi ga o Jiova ena noda cakacaka vakavunau, ena vakayacori tale ga kina na nona inaki. Sa voleka mera na lewai o ira na sega ni kauaitaka na itukutuku vinaka. Na nodra lewai ena yavutaki mai na nodra ciqoma se sega na itukutuku vinaka. (2 Ces. 1:8, 9) E sega ni ka vakayalomatua ke nanuma na lotu vaKarisito ni sega ni veiganiti meda gumatua ena vunau baleta “nira na vakaturi mai na mate na yalododonu kei ira na sega ni yalododonu.” (Caka. 24:15) Eda vulica ena iVolatabu ni o ira na okati mera “me” era na lewai mera “muduki tawamudu.” Na noda vunau e vakaraitaka na loloma ni Kalou, e vakarautaka na sala mera veisau kina e levu, mera rawata tale ga na “bula tawamudu.” (Maciu 25:32, 41, 46; Roma 10:13-15) Era na rogoca vakacava na tamata na itukutuku ni veivakabulai ke da sega ni vunau vei ira?
9. Nida vakaitavi ena vunautaki ni itukutuku vinaka, ena yaga vakacava vei keda kei ira na rogoca?
9 Ena yaga tale ga vei keda na noda vunautaka na itukutuku vinaka. (Wilika 1 Timoci 4:16.) Nida tukuni Jiova kei na inuinui ni Matanitu ni Kalou, ena vakaukauataka dina na noda vakabauta kei na noda lomani koya, se vakaevei? E sega ni vakabekataki ni a vukei keda qori meda bucina na itovo vaKarisito. Eda marau tale ga vakalevu nida qaravi Jiova ena noda vakaitavi ena cakacaka vakavunau. O ira era veivakavulici ena ka dina era marautaka na veisau era cakava na gonevuli ena veivuke ni yalo tabu ni Kalou.
MO DAU KAUAI
10, 11. (a) Erau vakaraitaka vakacava o Jisu kei Paula ni rau yadra tiko rau qai kauai? (b) Ena yaga vakacava ena noda cakacaka vakavunau ke da yadra tiko qai dau kauai?
10 E duidui na sala era vakayadrati kina e levu mera rogoca na itukutuku vinaka. E vinakati gona me dau kauai na lotu vaKarisito ena ka e raica kei na ka e rogoca. O Jisu e noda ivakaraitaki. Ni uasivi, e rawa ni kila na nodra lomaca na Farisi, na nona veivutuni dina na yalewa ivalavala ca, kei na nona lomasoli na yada. (Luke 7:37-50; 21:1-4) A rawa sara ga ni vukei ira kece vakayalo na kawatamata. Ia e sega ni gadrevi sara meda uasivi na lotu vaKarisito meda qai vakaraitaka na kauai dina. E vakadinadinataka qori na yapositolo o Paula. E veisautaka na nona iwalewale ni vunau me rawai ira kina e duidui na nodra ivakarau ni bula kei na nodra itovo.—Caka. 17:22, 23, 34; 1 Kor. 9:19-23.
11 Nida yadra tiko me vakataki Jisu kei Paula, eda na kila vinaka na ka meda cakava mera tataleitaki kina o ira eda sotava. Kena ivakaraitaki, ni o vosa vua e dua, tovolea mo kila na ka e kauaitaka, na vanua e cavutu mai kina se nona vuvale. Se kauaitaka na ka e cakava tiko ena gauna drau sota kina, qai tukuna eso na ka vinaka me baleta na ka e cakava tiko ni tekivu na nomudrau veivosaki.
12. Na cava meda qarauna kina na ivakarau ni noda veitalanoa ena gauna ni cakacaka vakavunau?
12 O koya e kauaitaka na ka e raica kei na ka e rogoca ena sega ni vakalaiva me vakawelei. Nida vunau tiko, ena rawa ni veivakayaloqaqataki na noda veitalanoa kei koya eda cakacaka vata. Ia meda nanuma tiko na inaki ni noda cakacaka vakavunau, oya meda vunau vei ira eso tale. (Dauv. 3:1, 7) Meda qarauna na noda veitalanoa ena gauna eda biubiu mai kina ena dua na vale ina dua tale, me kua ni vakawelei keda qori ena cakacaka vakavunau. E vinaka meda veitalanoataka na ulutaga eda na veivosakitaka kei ira na tataleitaki, ni na vukei keda meda yadrava tiko ga na inaki ni noda vunau. Ena so na gauna ena yaga ena cakacaka vakavunau na mobail, ia meda qarauna me kua ni veivakasosani ena gauna eda vosa tiko kina vua na itaukeinivale.
DAUVEIKAUAITAKI
13, 14. (a) Eda na kila vakacava na ka e kauaitaka na itaukeinivale? (b) Eda na vukei ira vakacava e levu mera taleitaka eso na ulutaga vakaivolatabu?
13 Na lotu vaKarisito e yadra tiko ena vakarorogo vinaka ena gauna e vosa tiko kina o itaukeinivale. Na taro cava o na taroga mo rawa ni kila kina na ka e tu e lomana? Vakacava e kauaitaka na levu ni matalotu, na ivalavala kaukaua ena nona yasayasa se na nodra guce na veimatanitu? Vakacava mo vukei koya me taleitaka eso na ulutaga vakaivolatabu, vakamacalataka na totoka ni nodra buli na veikabula se vakaraitaka na yaga ni ivakasala vakaivolatabu? E levu na matatamata nikua era kauaitaka na masu, wili mada ga kina o ira na sega ni vakabauta na Kalou. Levu era vaqaqa se o cei e daurogo masu. Eso tale era na via kila: E rogoca na masu kece na Kalou? Ke sega, na cava meda cakava me rogoca na Kalou na noda masu?
14 Eda rawa ni vulica vinaka na sala me tekivu kina na veivosaki ena noda vuli sara ga vei ira na dautukutuku matua. Raica na ka era cakava mera kua kina ni siova na ka e baleti ira na itaukeinivale se mera veivaqaqai. Kauaitaka tale ga na rorogo ni domodra kei na irairai ni matadra nira vosa tiko me vakaraitaka nodra kauaitaka na rai itaukeinivale.—Vkai. 15:13.
YALOVINAKA QAI MAQOSA
15. Na cava e yaga kina na yalovinaka ena noda cakacaka vakavunau?
15 Vakacava o dau taleitaka mo vakayadrati ni o moce lutu? Levu era sega ni dau taleitaka mera vakayadrati vakasauri. Ena vinaka mera vakayadrati vakamalua. E va tale ga qori na noda veivakayadrati vakayalo. Kena ivakaraitaki, vakacava ke cudruvi iko e dua ni o vunau vua, na iwalewale vinaka cava o na cakava? Vakavinavinakataka na nona rai kei na nona vosa vakadodonu, oti mo biubiu sara. (Vkai. 15:1; 17:14; 2 Tim. 2:24) Na nomu yalovinaka ena rawa ni veisautaka na nona rai ena gauna e gole tale yani kina e dua na iVakadinadina.
16, 17. Na cava e vinakati kina na lewamatau ena cakacaka vakavunau?
16 Ena so tale na ituvaki, o rawa ni cakava eso na ka. Ena rairai tukuna e dua, “Sega, vinaka. Sa tiko na noqu lotu” se, “Sega sa rauta” me rawa ga ni tinia kina na veivosaki. Ia ena nomu yalovinaka kei na nomu maqosataka eso na taro mo tarogi itaukeinivale kina, ena rawa ni vakayadrati koya me taleitaka eso na ulutaga vakaivolatabu.—Wilika Kolosa 4:6.
17 Ena so na gauna eda na sotava eso era na rairai osooso, e vinaka meda biubiu ga. Ia ena so tale na gauna e rawa ni o vakamacala ga vakalekaleka qai momona. Eso na mataveitacini era dau wilika e dua na tikinivolatabu e vakavure vakasama, ra qai laiva e dua na taro. Era cakava qori ena loma ga ni dua na miniti. Na iwalewale qori era vakayadrati kina e levu mera tataleitaki, dina ga nira osooso. Vakacava mo cakava tale ga qori?
18. Na cava eda rawa ni cakava me laulau kina na noda vunau tawalokuci?
18 E levu eda dau sotava e veisiga. Eda rawa gona ni vakayadrati ira mera taleitaka na itukutuku vinaka ke da tu vakarau meda vunau tawalokuci. E levu na mataveitacini era tawana eso na ivola vakaivolatabu ena nodra taga se beki. Era na rairai vakasamataka tiko e dua na tikinivolatabu mera vakamacalataka ke ra veivosaki kei na dua. De dua o rawa ni raica na ivakatawa ni cakacaka se o ira na painia ena ivavakoso mera vukei iko.
KAUAITAKI IRA TIKO GA NA WEKAMU
19. Na cava meda kauaitaki ira tiko ga kina na wekada?
19 E macala ga nida vinakata mera ciqoma na itukutuku vinaka o ira na wekada. (Josua 2:13; Caka. 10:24, 48; 16:31, 32) Eda rawa sara ga ni yalolailai ke ra sega ni taleitaka na noda itukutuku ena imatai ni gauna. De dua eda nanuma nida na sega tu ga ni cakava se tukuna e dua na ka me veisautaka kina na nodra ivakarau ni rai. Ia e rawa ni veisautaka na nodra rai eso na ituvaki e dau yaco. Se era na rairai ciqoma na dina baleta ni sa vinaka sara na iwalewale ni nomu vakamacalataka na ka dina.
20. Nida vosa vei ira na wekada, eda na vakaraitaka vakacava nida kauaitaki ira?
20 Meda kua ni beca na nodra rai na wekada. (Roma 2:4) Vakacava mo vosa vakayalovinaka vei ira me vaka ga o dau cakava ena cakacaka vakavunau? Vosa vakamalua, me veidokai tale ga. Me kua ni veivakadodonutaki na ka o tukuna, vakamacalataka ga na ka vinaka o vakila ena nomu kila na ka dina. (Efeso 4:23, 24) Vakamatatataka na sala e vakalougatataki iko kina o Jiova, o koya e “vakavulici iko mo vinaka kina.” (Aisea 48:17) Mera raica sara ga na wekamu ni o vakaraitaka na ivakarau ni bula vaKarisito.
21, 22. Tukuna e dua na ivakaraitaki me baleta na yaga ni noda vukei ira tiko ga vakayalo na wekada.
21 Ena dua na gauna wale ga qo, e vola e dua na tacida yalewa: “Au dau saga meu vunau vei ratou na 13 na taciqu, au qai vakaraitaka qori ena ka au tukuna kei na noqu itovo. E veiyabaki au dau volavola vei ratou kece. Ia ena loma ni 30 na yabaki qori, o yau duadua ga au qaravi Jiova.”
22 E tomana: “Ena dua na siga, au qirita e dua na tuakaqu e vakaitikotiko e rauta ni vicanadrau na maile mai na vanua au tiko kina. A tukuna ni a lai kerei nona italatala me vakavulici koya ena iVolatabu, ia a sega ni vakavulici koya o talatala. Au tukuna vua niu rawa ni vakavulici koya, e qai tukuna: ‘Sa donu, ia meu tukuna vakadodonu vei iko niu na sega tu ga ni dua na iVakadinadina i Jiova.’ Au vakauta sara vua na ivola Na Cava Sara Mada e Kaya na iVolatabu?, au qiriti koya tale ga ena levu na gauna. Ia e se bera ga ni wilika na ivola. Au qiriti koya tale, ia qo au sa kerei koya me taura mai nona ivola, keirau wilika qai veivosakitaka ena loma ni 15 na miniti eso na tikinivolatabu era lavetaki. Ni oti e vica na siga na noqu qiriti koya tiko, sa vinakata me sivia e 15 na miniti na nona vuli. Toso na gauna sa qiriti au mai me keirau vuli, so na gauna ena qiri mai ni bera niu yadra ena mataka, ena so tale na gauna ena qiri mai vakarua ena dua na siga. Mani papitaiso ena yabaki tarava, yaco sara me painia ni oti e dua na yabaki.”
23. Na cava meda sasaga tiko ga kina ni vakayadrati ira e levu mai na moce vakayalo?
23 E vinakati dina na maqosa kei na sasaga ena cakacaka ni veivakayadrati vakayalo, ni levu na yalomalumalumu era se ciqoma tiko ga na itukutuku vinaka. Na kena ivakatautauvata e rauta ni 20,000 na lewenivanua era papitaiso e veivula mera iVakadinadina i Jiova. Meda raica mada ga vakabibi na ivakasala i Paula vei Akipo ena imatai ni senitiuri: “Mo vakaotia sara na cakacaka vakaitalatala o ciqoma ena nomu sa mai imuri ni Turaga.” (Kolo. 4:17) Eda na veivosakitaka ena ulutaga tarava na vuna meda kua kina ni lokuyara ena noda vunau.
[Kato ena tabana e v13]
SALA MO YADRA TIKO GA KINA
▪ Ogaoga tiko ga ena cakacaka e vauca na inaki ni Kalou
▪ Kua ni cakava na cakacaka era okati mera butobuto
▪ Qarauna na rerevaki ni moce vakayalo
▪ Me donu tu ga na nomu rai me baleti ira ena yalava
▪ Tovolea eso na iwalewale vou ni vunau
▪ Nanuma tiko na vuna e bibi kina na noda cakacaka vakaitalatala