Wase 5—Na Ka me Caka Mera Toso Kina Noda Vuli iVolatabu
Vakadeitaka na Levu ni Ka me Vulici
1 Ni dau veivakavulici o Jisu, e dau kauaitaka na levu ni ka era rawa ni vulica na tisaipeli, e vosa vei ira “me vaka na ka e rawa ni ra kila.” (Mari. 4:33, VV; Joni 16:12) Mera vakatale ga oya na qasenivuli ni Vosa ni Kalou nikua, mera vakadeitaka tale ga na levu ni ka e rawa ni vulici ena dua na gauna ni vuli. Na levu ni ka e vulici me vakatau ina ka e rawa ni vulici kei na kedrau ituvaki o gonevuli kei qasenivuli.
2 Bucina na Vakabauta e Kaukaua: E so na gonevuli e rawa ni vulica vakarua se vakatolu na ka era rawa ni vulica ena dua ga na gauna e so tale na gonevuli. E bibi gona meda vukei ira na gonevuli mera kila vinaka na ka e vulici tiko, mai na noda vakatotolotaka tu ga na vuli. E dodonu me yavutaki vinaka kece ena Vosa ni Kalou na nodra vakabauta vou na gonevuli.—Vkai. 4:7; Roma 12:2.
3 Ni o veivakavulici e veimacawa, vakayagataka na gauna e veiganiti me rawa ni vukei kina o gonevuli me kila qai ciqoma na ka e vulica tiko ena Vosa ni Kalou. Kua ni vakatotolotaka na vuli ni na sega ni vakila kina o gonevuli na yaga ni ka e vulica tiko. Me tiko na gauna me veivosakitaki kina na tikina bibi, kei na tikinivolatabu bibi e yavutaki kina na ka e vulici tiko.—2 Tim. 3:16, 17.
4 Tosoya Tiko ga na Vuli: Dina ga nida sega ni via vakatotolotaka na vuli, e dodonu tale ga meda kua ni goleva e so tale na ivakamacala e sega soti ni bibi. Ke dau matau vei gonevuli me balavu na nona vakamacalataka na veika e sotava, e vinaka me qai veivosakitaki oqori ni oti na vuli.—Dauv. 3:1.
5 Ena yasana adua, na noda lomakatakatataka na ka dina e rawa ni vakavuna meda vakamacala vakalevu ena gauna ni vuli. (Same 145:6, 7) So na gauna ena rawa ni yaga ena vuli ke tukuni e dua na ivakaraitaki se vakasavuirogorogo, ia me kua ni vakayagataki vakalevu ni na rawa ni vakaleqa na nona vulica o gonevuli na veika dina e yavutaki ena iVolatabu.
6 Ni veivosakitaki ga ena gauna ni vuli na levu ni ka ga e veiganiti, eda sa vukei ira tiko kina na gonevuli ni iVolatabu mera “lako voli tu e na rarama i Jiova.”—Aisea 2:5.