Wase 6—Na Ka me Caka Mera Toso Kina Noda Vuli iVolatabu
Ni Taro o Gonevuli
1 Ni sa toso vinaka na nona vuli iVolatabu e dua, e vinaka me vulici ga na veitaravi ni ivakavuvuli vakaivolatabu, me kua ni veiladeyaki mai na dua na ulutaga ina dua tale. Ena yavutaki vinaka kina na nona kilaka o gonevuli, ena tubu tale ga kina vakayalo. (Kolo. 1:9, 10) Levu na gauna era dau taroga na gonevuli e so na taro me baleta e so na ulutaga ena gauna sara ga ni vuli. Na cava meda cakava?
2 Meda Yalomatua: Na taro e salavata kei na ka e vulici tiko e rawa ni saumi ga ena gauna ni vuli. Kevaka e taroga e dua na taro e tiko ena ulutaga drau na qai vulica vakamalua, e vinaka mo tukuna vua. Ia kevaka e sega ni salavata kei na ka drau vulica tiko na nona taro, se gadrevi tale kina na vakekeli, e vinaka mo drau qai veivosakitaka ni oti na vuli se ena dua tale na gauna. Era raica e so ni nodra dau vola na taro, era kila kina na gonevuli ni kauaitaki na nodra taro, ena sega tale ga ni vagolei tani kina na vuli.
3 E so na ivakavuvuli vakaivolatabu e dau veivosakitaki ga valeleka ena ivola eda dau veivakavulici kina. Vakacava ke dredre vei gonevuli me ciqoma e dua na ivakavuvuli, se vakabauta tiko ga na ivakavuvuli lasu? Ena yaga sara ke raici tale e so na ikuri ni ivakamacala e vakamatatataka na rai ni iVolatabu ena ulutaga oya. Ke se sega tiko ga ni lomavakacegu o gonevuli, biuta vakatikitiki me qai veivosakitaki ena dua tale na gauna, drau tomana ga nomudrau vuli. (Joni 16:12) Ni sa na tubu tiko na nona kilaka vakayalo ena iVolatabu, de dua ena qai kila o gonevuli na ivakamacala ni ivakavuvuli vakaivolatabu oya.
4 Meda Yalomalumalumu: Ke o sega ni kila na isau ni dua na taro, kua ni tukuna na nomu nanuma ga. (2 Tim. 2:15; 1 Pita 4:11) Tukuna ni o na vakekeli mai mo na qai vakamacalataka vua na kena isau. O rawa sara ga ni vakayagataka na gauna oqori mo vakaraitaka kina vua na icakacaka ni vakekeli. Vakaraitaka tiko vakamalua vua na ivakavakayagataki ni ivukevuke ni vakekeli e vakarautaka na isoqosoqo i Jiova. Ena sala oqo, ena rawa ni qai sauma ga kina vakataki koya o gonevuli na nona taro.—Caka. 17:11.