Vakamolimoli Vei Jiova ena iSoqosoqo Levu
1 Na noda soqo ni tikina ena veiyabaki e dau gauna vinaka meda vakacaucautaki Jiova kina. E tautauvata noda rai kei na rai i Tevita ena nona lagata: “Au na vakamolimoli vei kemuni e nai soqosoqo levu; ka’u na vakavinavinaka vei kemuni e na kedra maliwa na lewe vuqa.” (Same 35:18) Eda na vakaraitaka vakacava ena Soqo ni Tikina “Talairawarawa Vua na Kalou” sa roro mai na noda na duavata ena vakacaucautaki Jiova?
2 Dua na sala e rawa ni raici kina na noda vakacaucautaki Jiova oya ena noda itovo. E kaya e dua na vakailesilesi ena dua na vanua e caka kina na soqo ni tikina: “Ena vuku ni ka e dau yaco ena nomuni soqo, keitou sa tukuna vei ira na isoqosoqo ni lotu tale e so era via vakayagataka na vanua oqo mera mai raica mada na nomuni cicivaka na iVakadinadina i Jiova na nomuni soqo, ni dau tuvai vakamatau.” Ena keda irairai, noda duavata, kei na noda itovo, eda sa vakaraitaka yadudua sara tiko ga kina na veivakacaucautaki e dodonu me caka vua na Kalou.—1 Pita 2:12.
3 Keda iRairai: Nida vakaisulu da qai sauni keda me vakacaucautaki kina o Jiova ena gadrevi meda yalolokomi. (1 Tim. 2:9) E kaya na ivola Vuli Vunau, tabana 132: “Na tamata e lokomi ena sega ni malewa na nona itovo, ena sega tale ga ni cakava na ka me saravi kina.” Sa takalevu tu ena vuqa na vanua na isulusulu e sega ni rakorako. Ia, e marautaka o Jiova na noda dau saga meda matataki koya vakavinaka. (Caka. 15:14) Dina ni na vakayagataki beka na rara ni qito me caka kina na soqo ni tikina, ia ena yaco na vanua oqori me vaka e noda “[i]soqosoqo levu” se ivavakoso levu ena siga tolu eda na vakayagataka tiko kina. O koya gona, nida na soqoni ena mata i Jiova, e dodonu meda tokara na isulu e veiganiti kei na Kalou cecere duadua ni lomalagi kei vuravura.—1 Vei. 29:11.
4 Meda kauaitaka tale ga na keda irairai ni oti na soqo e veisiga. De dua eda na via tokara e so na isulu ni gade nida lai kana e valenikana, ia e se bibi tiko ga me kilikili na keda irairai kei na ka eda tokara, me ganiti ira “era sa lotu.” (1 Tim. 2:10) E sega ni vakatau na isulu e kilikili ena isulu e sa ciqomi raraba tu e vuravura. (1 Joni 2:16, 17) Era tu ena noda ivola na itaba ni isulusulu e kilikili mera tokara na tagane kei na yalewa ena veigauna e so. Na noda dau tokara tale ga na noda ivakatakilakila ena korolevu e caka kina na soqo ni tikina ena dei tiko kina vei keda nida italatala lotu Vakarisito ena veigauna kece.—2 Kor. 6:3, 4.
5 Doka na Kakana Vakayalo e Vakarautaka o Jiova: Sa vakarautaka tu vei keda na Turaga Cecere ni lomalagi kei vuravura e dua na magiti. (Aisea 25:6; 1 Kor. 10:21) Ke bibi vei keda na noda lai kania na kakana vakayalo e vakarautaka o Jiova, eda na saga meda tiko ena siga tolutolu ni soqo ni tikina. Vakacava, o sa veivosakitaka na vanua mo na vakaicili kina, nomu sala ni veitosoyaki kei na nomu na vagalalataki mai na nomu cakacaka? Sa veirauti beka na gauna mo vakarau kina kei na nomu yaco totolo yani ena vanua ni soqo mo lai raica na nomu idabedabe, o veimaliwai kei ira na tacimu, qai tokoni ira ena lagati ni sere ni vakavinavinaka vei Jiova kei na masu e tekivutaki kina na soqo?—Same 147:1.
6 Noda doka na kakana e vakarautaki ena teveli i Jiova ena uqeti keda meda rogoca matua na porokaramu, da kua ni veitalanoa, kana, se veilakoyaki voli ena pasese. Sa vakarautaka tu o Jiova na keda kakana vakayalo ena gauna oqo ni vakayagataka na dauveiqaravi yalodina ka vuku. (Maciu 24:45, VV) Meda kua ni calata e dua mada ga na porokaramu oqori. Mera dabe vata na itubutubu kei na luvedra, ra qai vukei luvedra me yaga vei ira na ka e tukuni tiko mai.—Vkru. 31:12.
7 E kerei meda kauta ga mai na keda ivaqa, meda kua ni biuta na vanua ni soqo meda lai vaqara keda ivakasigalevu. E vakavinavinakataki ni levu era muria na veidusimaki oqo ena soqo ni tikina ena yabaki sa oti. Sa na bau totoka dina ke muri tale ena yabaki oqo! (Iper. 13:17) Ni muri na ituvatuva oqori eda na marautaka kina noda veimaliwai kei ira na tacida, da vukea tale ga na kena vakilai na duavata kei na lomavakacegu e dokai kina o Jiova.—Same 133:1.
8 Vunau Tawalokuci: E levu na sala eda rawa ni vakacaucautaki Jiova kina nida lako tiko ina vanua ni soqo vaka kina nida sa lesu tiko mai. (Iper. 13:15) Se da kana tiko ena valenikana se da veivosaki tiko kei ira na cakacaka ena otela, meda qara mada ga na sala meda vunau kina vei ira. Ena tawa vinaka na noda vakasama kei na lomada ena veika vakayalo eda vulica ena soqo ni tikina. Meda wasea gona na veika vinaka oqori ena noda vunau tawalokuci.—1 Pita 3:15.
9 Sega ni vakabekataki nida sa vakanamata sara tu ga oqo ena gauna meda na lai vakavinavinaka kina vei Jiova “e nai soqosoqo” levu. (Same 26:12) Meda na qai duavata mada ga ni vakamolimoli vei Jiova ena Soqo ni Tikina “Talairawarawa Vua na Kalou.”
[Taro]
1, 2. Na cava eda rawa ni cakava ena soqo ni tikina? Eda na cakava vakacava?
3, 4. Ena vukei keda vakacava na yalolokomi meda vakaisulu me ganiti ira na italatala lotu Vakarisito ena soqo ni tikina vaka kina ni oti na soqo e veisiga?
5, 6. Eda na vakaraitaka vakacava nida doka na kakana vakayalo e vakarautaki ena teveli i Jiova?
7. Na cava e kerei meda cakava me baleta na gauna ni vakasigalevu, na cava na vuna?
8, 9. Eda na vakavinavinakataki Jiova vakacava ena soqo ni tikina?
Ka me Nanumi ena Soqo ni Tikina
◼ Vanua kei na Tikinisiga ni Soqo: Ena vakayacori tiko na soqo ena yabaki oqo ena National Stadium, e Suva, ena 14-16 ni Okotova, vaka kina ena Churchill Park, e Lautoka, ena 21-23 ni Okotova. Ena rogoci na porokaramu taucoko e caka e Suva ena vosa vakavalagi kei na vosa vakaviti. Mai Lautoka ena rogoci kina na porokaramu taucoko ena vosa vakaviti kei na vosa vakaidia.
◼ Porokaramu ni Soqo: Ena tekivu tiko na porokaramu ni soqo siga tolu oqo ena 9:30 ena veimataka. Sa na dola na matamata ena 8:00 ena mataka. Ni vo e vica na miniti me tekivu na porokaramu sa na rogo mai na ivakatagi, sa na dabe tale tu ga ena buturara na jeameni. Ena gauna oqori e dodonu meda sa dabe kece kina me rawa ni tekivu vinaka na porokaramu. Ena cava tiko na porokaramu ena 5:05 ena yakavi ni Vakaraubuka kei na Vakarauwai, ia ena Sigatabu ena cava ena 4:10 ena yakavi.
◼ iDabedabe: Me maroroi ga na idabedabe me baleti ira eda vodo mai ena dua ga na motoka se o ira eda tiko vata mai vale.
◼ Cau: Dau gadrevi na ilavo ena kena tuvanaki e dua na soqo ni tikina. Eda rawa ni vakaraitaka na noda vakavinavinaka ena noda dau cau ena Kingdom Hall se nida tiko ena soqo ni tikina. Ke vakayagataki na jeke ena cau ina soqo ni tikina me qai volai na jeke ina “Jehovah’s Witnesses of Fiji.”
◼ Vakasigalevu: Yalovinaka kauta ga mai na kemu ivaqa, kua ni biuta na vanua ni soqo mo lai vaqara kemu ivakasigalevu. Ena vinaka me vakayagataki na katoniwaililiwa lalai e rawa ni biu toka ga ena ruku ni idabedabe. E sega ni vakatarai ena vanua ni soqo na bola ni kakana lelevu e dau vakayagataki ena vakatakakana, na bilo se itawatawa ni kakana lase se iloilo, na yaqona ni valagi kei na yaqona ni viti.
◼ Katokatoni: E rawa ni o kauta tiko mai na nomu misini ni katokatoni ia me kua ni vakacobari ena isucusucu ni livaliva se ina iyaya ni kakaburaki, me kua kina ni vakacaraka na vakarorogo.
◼ Veitaba: Ke o veitaba ena gauna e caka tiko kina na vunau, me kua ni vakayagataki na cina ni itaba.
◼ Pager kei na Mobile Phone: Me qarauni oqo me kua ni veivakasosataki.
◼ Vakacalaka kei na Leqa Tubukoso: Ke mani yaco e dua na vakacalaka ena soqo ni tikina, sa kerei mo ni tukutuku vua e dua na dauveivukei e tu voleka, ena qai raici iratou sara vakatotolo na tabana ni First Aid o koya, me dua na kenadau e mai dikeva na leqa kei na veiqaravi ena rawa ni caka kina.
◼ Otela: (1) Kerea ga na iwiliwili dina ni rumu o via vakayagataka, me kua ni sivia na tamata era tiko ena nomu rumu. (2) Ke o via vakasuka na nomu icili, tukuna tale ina otela ena kena gauna totolo duadua. (3) Kua ni vakasaqa ena rumu e tabu kina na vakasaqa. (4) Dau veinanumi vei ira na veiqaravi ena otela kei ira na cakacaka kina ena veisiga. (5) Ke vakarautaki na ikatalau sega ni saumi, na kofi, se veika batabata vei ira na vulagi ena otela, vakayagataka vakayalomatua. (6) Vakaraitaka na vua ni yalo tabu ni o veitaratara tiko kei ira na cakacaka ena otela, vakauasivi ena gauna osooso nira yaco tiko yani na vulagi se nira biubiu.