Wase 9—Na Ka me Caka Mera Toso Kina Noda Vuli iVolatabu
Vakarautaki Ira na Gonevuli Mera Vunau Tawalokuci
1 Ni rau sa kila o Adriu kei Filipi ni o Jisu na Mesaia yalataki, rau sega tale ni qai tu vakasuka na tukuna yani na itukutuku marautaki oqo. (Joni 1:40-45) E vaka tale ga oqori nikua, ni gauna ga era vakabauta kina na noda vuli iVolatabu na ka era sa vulica tiko, e uqeti ira sara ga mera tukuna yani na veika oya. (2 Kor. 4:13) Ia, eda rawa vakacava ni vakarautaki ira na noda vuli iVolatabu mera vunau tawalokuci, mera vakayacora tale ga vakavinaka?
2 De dua o rawa ni tarogi koya na nomu vuli iVolatabu se sa bau tukuna tale vua e dua na ka e sa vulica tiko. E rawa tale beka ga ni sureti ira na nona itokani se o ira na lewe ni nona vuvale mera tiko ena gauna e vuli kina. Tarogi koya se sa bau taleitaka na itukutuku vinaka e dua erau cakacaka vata, rau vuli vata, se dua tale erau veikilai. Sa rawa sara ga ni tekivu vunau vei ira o koya. Vukei koya me yalomatua, me veidokai qai vakaitovo ena gauna e vakamacalataka kina na veika e baleta na Kalou o Jiova kei na nona inaki.—Kolo. 4:6; 2 Tim. 2:24, 25.
3 Mera Vakamacalataka Nodra Vakabauta: E bibi mera tuberi na noda vuli iVolatabu mera vakayagataka na Vosa ni Kalou nira vakamacalataka na nodra vakabauta. Ena gauna veiganiti ni vakacagau tiko na vuli tarogi koya: “O na taurivaka vakacava na iVolatabu mo vakamacalataka kina na ka dina oqo vei ira na wekamu?” se “Na tikinivolatabu cava o na taurivaka mo vakadinadinataka kina na tikina oqo vua nomu itokani?” Raica se sauma vakacava, qai uqeti koya me dau yavutaka vakaivolatabu na nona ivakamacala. (2 Tim. 2:15) Ena nomu cakava oqo, o sa na vakarautaki koya tiko kina me vunau tawalokuci, kei na nona sa na cakacaka vakavunau kei na ivavakoso ni sa rawata na ivakatagedegede e gadrevi vua.
4 E vinaka me tukuni rawa toka vei ira na vuli iVolatabu nira na tusaqati. (Maciu 10:36; Luke 8:13; 2 Tim. 3:12) E gauna vinaka me vunau tawalokuci kina o koya oya ni dua e vakataroga na noda vakabauta se kaya e dua na ka me baleti keda na iVakadinadina i Jiova. Na brochure iVakadinadina i Jiova ena iKaruasagavulu ni Senitiuri ena rawa ni vakarautaki ira na vuli iVolatabu mera ‘tu vakarau ni vakamacala’ vei ira na tamata yadua. (1 Pita 3:15, VV) Era tu ena brochure oqori na ivakamacala dodonu, ra qai rawa ni vakayagataka na noda vuli iVolatabu mera vunau kina vei ira na nodra itokani kei ira na wekadra mera kila na noda vakabauta vakaivolatabu kei na noda cakacaka.