Na Cakacaka Vakavunau e Vukei Keda Meda Vosota
1 E uqeti keda na Vosa ni Kalou meda “ciciva tikoga na cere sa tu e matada.” (Iper. 12:1) Me vaka ga ni gadrevi me vosota na daucici me rawa kina ni yacova na tepi, e gadrevi tale ga meda vosota meda yacova kina na icovi ni bula tawamudu. (Iper. 10:36) Ena vukei keda vakacava na cakacaka vakavunau meda yalodina tiko ga me yacova na icavacava?—Maciu 24:13.
2 Vakaukauataki Keda Vakayalo: Noda kacivaka yani na ka totoka e yalataka tu na iVolatabu me baleta na vuravura era na taukena na yalododonu, ena vukea me bulabula tiko ga kina na noda inuinui. (1 Ces. 5:8) Nida vakaitavi wasoma ena cakacaka vakavunau eda sa wasea tiko kina na ka dina eda vulica ena iVolatabu. Eda rawa kina ni vakamacalataka noda vakabauta, ena rawa ni vakaukauataki keda tale ga vakayalo.
3 Me laulau na noda veivakavulici, e dodonu meda kila vinaka na ka dina vakaivolatabu. Meda vakekeli da qai vakasamataka vakatitobu na ka eda vulica. Na sasaga eda cakava ena vakatitobutaka noda kilaka, vakaukauataka noda vakabauta, qai vakacegui keda vakayalo. (Vkai. 2:3-5) Noda vukei ira tale e so oqo e dua na sala eda sa vakaukauataki keda tiko kina.—1 Tim. 4:15, 16.
4 E tiki bibi ni “[i]yaragi kecega ni Kalou” na noda gugumatua ena cakacaka vakavunau, na ka eda gadreva meda taqomaki kina ena ilawaki kece ga ni Tevoro kei ira na timoni. (Efeso 6:10-13, 15) Noda vakaogai keda ena cakacaka tabu ena uqeta noda vakasama ina veika e veitarai cake, ena sega tale ga ni rawai keda kina na vuravura i Setani. (Kolo. 3:2) Nida vakatavuvulitaka tiko na sala i Jiova vei ira tale e so, eda sa vukei keda sara tiko ga meda muria dei na ivalavala savasava.—1 Pita 2:12.
5 Vakaukauataki Keda na Kalou: Kena ilutua na noda vunautaka na itukutuku vinaka e vakavulici keda meda vakararavi vei Jiova. (2 Kor. 4:1, 7) Sa dua dina na ka ni veivakalougatataki! Noda bucina na veinuitaki vaka oqori, ena sega wale ga nida vakayacora vinaka kina na cakacaka vakavunau, eda na tudei tale ga nida sotava na veituvaki dredre ena noda bula. (Fpai. 4:11-13) Io, e tiki bibi ni vosota na noda dau nuitaki Jiova vakatabakidua. (Same 55:22) E levu gona na sala e vukei keda kina na cakacaka vakavunau meda vosota.