Vunau Vei Ira na Levu ga ni Tamata e Rawa
1. Na cava era cakava na lotu Vakarisito taumada mera vakatetea kina na vunautaki ni itukutuku vinaka?
1 Era saga vakaukaua na imuri taumada i Jisu mera vakatetea na itukutuku ni Matanitu ni Kalou. Era vakayagataka na kena iwalewale kece ga e rawa me rogoci raraba kina na itukutuku vinaka. Era vola na lotu Vakarisito na ivola era uqeti mera vola ena vosa vakirisi e kilai levu, na vosa a vakayagataki ena matanitu o Roma. Kuria oqori, era rairai tekivutaka na dauvunau gugumatua ni ikarua kei na ikatolu ni senitiuri S.K. na kena vakayagataki na codex se ivola vakatabana, ni rawarawa cake na kena vakayagataki ni vakatauvatani kei na ivolavivigi.
2, 3. (a) E vakayacori vakacava na Aisea 60:16 ena gauna oqo? (b) E vakayagataki tiko vakacava na veimisini vovou me vakatetei kina na sokalou savasava?
2 Vakayagataki ni Misini Vovou: E parofisaitaka o Jiova ena gusu i Aisea: “Ko na sucuma na nodra wai-ni-sucu na veimatanitu tani.” (Aisea 60:16) E vakayacori na parofisai oqo ena noda gauna nira vakayagataka na tamata i Jiova na veika era bulia na veimatanitu. Oqo ena vukea na kena vakatetei na cakacaka vakavunau. Me kena ivakaraitaki, ena 1914, ni se vo e vica na yabaki me qai saravi raraba na iyaloyalo yavala e vosa, era sa tekivu vakaraitaka tiko na Gonevuli ni iVolatabu na “Photo-Drama of Creation.” Na iyaloyalo yavala kei na iyaloyalo veicavuyaki oqo e rokataki qai vosa, e walu na aua na kena balavu. A dua dina na ivakadinadina levu vei ira na vica na milioni era sarava.
3 Ena gauna oqo era sa vakayagataka tiko na tamata ni Kalou na misini ni tabaivola totolo kei na veiyaya vakompiuta mera tabaka kina na iVolatabu kei na ivola vakaivolatabu ena vica na drau na vosa. Na sala totolo ni vakauiyaya ena gauna oqo sa veikauyaka tiko na ivola vakaivolatabu ina 235 na vanua. E vakayagataka o Jiova na yalona tabu me uqeti ira nona tamata mera vakayagataka na veimisini vovou ni gauna oqo me rawa kina ni kilai vakalevu na ka dina ena iVolatabu ni vakatauvatani kei na gauna sa oti.
4. Era veisautaka vakacava e so na ivakarau ni nodra bula mera vakatetea kina na nodra vunautaka na itukutuku vinaka?
4 Veisautaka na iVakarau ni Nomu Bula: Era dau uqeti tale ga na sokalou dina tiko mera veisautaka na ivakarau ni nodra bula me rawa kina nira vakatetea na nodra vunautaka na itukutuku vinaka. Levu era sa bula rawarawa ga me rawa kina nira vakaitavi vakalevu ena cakacaka vakavunau. So era toki ina vanua e vinakati vakalevu kina na dautukutuku ni Matanitu ni Kalou. So tale era vakarabailevutaka na nodra cakacaka vakaitalatala ena nodra vulica e duatani na vosa.
5, 6. Na cava eda rawa ni cakava meda vunau vakalevu kina vei ira ena noda yalava?
5 E rawa tale ga nida vunau vei ira e levu na tamata nida vakaraitaka na itukutuku vinaka vei ira nira tiko e vale se ena vanua ga era kune kina. Ke ra sega ni dau tiko e vale ena siga, e rawa beka mo lai vunau vei ira ena yakavi bogi? E tiko beka e so na vanua e dau soqovi e rawa meda vunau kina? O sa tovolea mo vunau ena talevoni se yalava ni bisinisi? O dau saga mo vunau tawalokuci?
6 Eda kalougata dina ni rawa meda vakaitavi tiko ena cakacaka levu ni noda vakadinadinataka na yaca i Jiova kei na nona Matanitu! Meda tomana tiko mada ga na noda wasea tiko na ka dina e veivakabulai ena Vosa ni Kalou nida vunau vei ira na levu ga ni tamata e rawa.—Maciu 28:19, 20.