Porokaramu Vou ni Siga ni Soqo Lavotaki

Na matada e dua na ibulibuli vakasakiti. (Same 139:14) E rawa ni vakaraica matua e dua na ka ena dua na gauna. E vakilai vakayago, vakayalo tale ga. Me vinaka na noda rai vakayalo, e dodonu meda vakaraica matua na kena vakayacori na loma ni Kalou. Ni sa qai levu tiko ga na veika e veivakacalai ena vuravura i Setani, e veiganiti kina na porokaramu ni siga ni soqo lavotaki ena yabaki vakacakacaka ni 2006, e kena usutu “Me Vinaka na Matada”!​​—⁠Maciu 6:​22.

Na cava eda rawa ni cakava me vakalougatataki keda kina o Jiova? (Vkai. 10:22) Na taro oqo ena veivosakitaki ena ulutaga “Eda na Kalougata ke Vinaka na Matada.” Ena veivosakitaki ena veitarotarogi na yaga ni noda muria na ivakasala vakaivolatabu. Na imatai ni nona vunau na mata mai na valenitabana, “Me Vinaka na Matada ena Vuravura Ca Oqo” eda na vakadreti kina ena veika e rawa ni vakaosoosotaki keda, e rawa ni tini vakaleqai keda vakayalo. Eda na vulica tale ga na ka e okati ena noda digia “nai votavota vinaka.”​​—⁠Luke 10:⁠42.

E rawa vakacava vei ira na itubutubu kei ira tale e so mera uqeti ira na itabagone lotu Vakarisito mera vakaliuca na ka vakayalo ena nodra bula? Na vosa “Na iTubutubu e Vanataka Vinaka Nona Gasau” kei na “O Ira na iTabagone Era tadolova na iSausau Vakayalo,” ena rogoci tale ga kina na nodra ivakamacala na itubutubu kei ira na itabagone ena taro bibi oya. (Same 127:⁠4) Na iotioti ni nona vunau na mata mai na valenitabana, ena vakaraitaki kina na ka meda cakava meda toso vata kina kei na isoqosoqo i Jiova, o keda yadudua, vakavuvale, se vakaivavakoso.

Se da ka vou ena dina se sa dede na noda qaravi Jiova tiko, e bibi me ‘vinaka na matada.’ Na porokaramu ni siga ni soqo lavotaki ena uqeti keda meda cakava sara ga vaka kina.