Porokaramu Vou ni Siga ni Soqo Lavotaki

Kevaka eda raica se rogoca e dua na ivakasala, da qai sega ni cakava kina e dua na ka, e rawa sara ga ni vakaleqai keda. Sa qai bibi sara na noda muria na veidusimaki vakayalo i Jiova. Oqo ena veivosakitaki ena porokaramu ni siga ni soqo lavotaki ena yabaki vakacakacaka mai oqo. Na kena usutu “Qarauna na Nomu Dau Vakarorogo.”​​—⁠Luke 8:​18, VV.

Ena nona imatai ni vunau na mata mai na valenitabana, ena veivosakitaka na yaga ni noda muria nikua na ivakasala veiuqeti i Paula e koto ena itekivu ni nona ivola vei ira na Iperiu. Na iotioti ni vunau, “Vakatudaliga Matua ena Veivakavulici ni Kalou,” ena vukei keda kece meda dikeva se da vakarorogo dina tiko vei Jiova, vaka kina vei Luvena, kei koya na “dauveiqaravi yalo dina ka vuku.”​​—⁠Maciu 24:​45, VV.

E vica na itavi ena porokaramu ena yaga sara vei ira na vuvale. Na ulutaga “Vuvale Era Dei tu ga ena Nodra Rogoca na Vosa ni Kalou” ena vukei keda meda qarauna na veika ni vuravura me kua ni kidomoki keda vakayalo. Ena okati ena itavi oqo na nodra vakatarogi o ira era veisautaka nodra bula mera vakaliuca na veika vakayalo. Na ulutaga “Era Vakadeitaki na Noda iTabagone ena Nodra Rogoca na Vosa ni Kalou” ena okati kina nodra vakatarogi na itabagone era tutaka na ka dina e koronivuli, vei ira nodra icaba, se ena cakacaka vakavunau. Na ulutaga “O Ira na Lalai Era Vakarorogo Vua na Kalou, Era Vuli Tale ga Vua” eda na vulica kina meda kua ni dau beca na nodra rawa ni vulika na gone. Eda na vulica ena nodra vakatarogi na itubutubu kei na luvedra na yaga ni nodra vakavulici na gone ena vunau i Jiova nira se gonedramidrami.

O Setani e ‘temaki ira tiko na kai vuravura kece,’ ia ena gauna vata oqori o Jiova e dusimaki ira tiko nona dauveiqaravi yalodina ena sala mera gole kina. (Vkta. 12:9; Aisea 30:21) Na noda vakarorogo matua ina nona ivakasala, da qai yalomalumalumu ni muria, ena vakavukui keda, eda na marau kina, eda na rawa tale ga ni bula tawamudu.​​—⁠Vkai. 8:​32-​35.