Uqeti Ira e So Tale Mera Talairawarawa ‘Mai Vu ni Lomadra’
1. Na cava e gadreva o Jiova vei ira na sokalou vua?
1 Na talairawarawa e yavu bibi ni qaravi Jiova. (Vkru. 12:28; 1 Pita 1:14-16) Sa voleka na gauna me cudruvi ira kina na Kalou o ira ‘era sega ni kila na Kalou, ra qai sega ni vakabauta nai tukutuku vinaka.’ (2 Ces. 1:8) Eda na vukei ira vakacava e so mera talairawarawa ‘mai vu ni lomadra’ ina ivakavuvuli ni Vosa ni Kalou?—Roma 6:17.
2. Na cava e bibi kina meda vukei ira e so tale mera yavutaka dei na nodra vakabauta?
2 Veivuke ena Kena Tarai Cake na Vakabauta kei na Loloma: Rau dau veisemati ena iVolatabu na talairawarawa kei na vakabauta. A cavuta na yapositolo o Paula “na lewa ni Kalou sa tawa mudu na nona bula me rawa ni ra vakabauta ka talairawarawa kina na tamata kece ga.” (Roma 16:26, VV) E volai ena Iperiu wase 11 e levu na ivakaraitaki vinaka ni vakabauta, e levu vei ira oqori e salavata sara ga kei na loma i Jiova. (Iper. 11:7, 8, 17) Ena yasana adua, na talaidredre e salavata kei na lailai ni vakabauta. (Joni 3:36; Iper. 3:18, 19) E dodonu gona meda kenadau ni vakayagataka na Vosa ni Kalou meda vukei ira kina e so tale mera bucina na vakabauta e rawati kina na talairawarawa.—2 Tim. 2:15; Jeme. 2:14, 17.
3. (a) E veisemati vakacava na talairawarawa kei na loloma? (b) Eda na vukei ira vakacava na vuli iVolatabu mera bucina na lomani Jiova?
3 Na talairawarawa e veisemati tale ga kei na noda lomana na Kalou. (Vkru. 5:10; 11:1, 22; 30:16) “Sa i koya oqo na lomana na Kalou,” e kaya na 1 Joni 5:3, (VV), “me da muria na nona i vakaro; a sa sega ni i colacola bibi na nona i vakaro.” Eda na vukei ira vakacava na vuli iVolatabu mera lomani Jiova? Saga ena nomudrau vuli mo dau vakaraitaka vua na talei ni itovo i Jiova. Vakaraitaka vua na nomu dau vakavinavinakataka na Kalou. Vukei gonevuli me dau vakasamataka na sala me na bucina tiko ga kina na nona veiwekani kei Jiova. O koya e bibi duadua, noda lomani Jiova ena vukei keda, vaka kina e so tale, mera talairawarawa vua na Kalou mai vu ni lomadra.—Maciu 22:37.
4. (a) Na cava e bibi kina na noda ivakaraitaki? (b) Na cava meda cakava meda bucina na talairawarawa ‘mai vu ni lomada’?
4 Noda iVakaraitaki: Me qai rawa nida uqeti ira e so tale mera muria na itukutuku vinaka, e bibi me vinaka na noda ivakaraitaki. E gadrevi gona meda dau saga tiko ga ni bucina na talairawarawa ‘mai vu ni lomada.’ (1 Tui 3:9; Vkai. 4:23) Ia na cava e okati kina? Noda vakania na lomada ena noda vuli vakataki keda kei na noda tiko wasoma ena soqoni. (Same 1:1, 2; Iper. 10:24, 25) Veimaliwai kei ira e duavata na lomadra ena sokalou dina. (Vkai. 13:20) Meda vakaitavi vakalevu ena cakacaka vakavunau ena noda gadreva dina meda vukei ira era tiko ena noda yalava. Kerea na veivuke i Jiova ena masu me vakavinakataka na ivakarau ni lomada. (Same 86:11) Meda biuta laivi na veika e rawa ni vakacaraka na lomada me vaka na iyaloyalo vakasisila, kei na iyaloyalo e vakaraitaki kina na itovo kaukaua. Meda vakaliuca na veika ena kauti keda voleka vua na Kalou, ena vakaukauataka tale ga na noda veiwekani.—Jeme. 4:7, 8.
5. Era vakalougatataki vakacava o ira na talairawarawa?
5 A vakadeitaka vei ira na nona tamata ena gauna makawa o Jiova nira na vakalougatataki ke ra rogoca na nona vosa. (Vkru. 28:1, 2) E vaka tale ga kina nikua, o Jiova ena vakalougatataki ira era “talairawarawa vua.” (Caka. 5:32) Meda vukei ira mada ga e so tale mera talairawarawa mai vu ni lomadra ena noda vakavulici ira, kei na noda ivakaraitaki vinaka.