Tukuna na Lagilagi i Jiova
1 A tukuna na daunisame: “Dou sere vei Jiova na vuravura kecega. . . . Dou tukuna na nona lagilagi ki na veimatanitu, na nona cakacaka mana vei ira na veimataqali kecega.” Nida vakasamataka na veika sa cakava oti o Jiova, na veika e cakava tiko oqo, kei na veika e se bera ni cakava, oqo e uqeti keda meda vakalagilagi koya!—Same 96:1, 3.
2 Ena Cakacaka Vakavunau: E ka dokai dina vei keda na iVakadinadina i Jiova meda vakatokayacataki vua na Kalou kei na noda vakalagilagi koya e veiyasa i vuravura. (Mala. 1:11) E veibasai sara kei ira na italatala ni lotu ni Veivanua Vakarisito, nira kauta tani na yaca ni Kalou ena nodra ivakadewa ni iVolatabu! E sa vakatotolotaki na cakacaka ni kena kuruvaki na yaca ni Kalou, me rawa kina vei ira na tamata mera masuta ena vakabauta na yaca oqo me rawa kina nira vakabulai ena veivakararawataki levu e sa voleka. (Roma 10:13-15) Na vakacegu ni lomalagi kei na vuravura, vaka kina na nodra veisaututaki na lewe i vuravura ena vakatau tiko ena vakacerecerei ni yaca ni Kalou. Io, na cakacaka kece ni Kalou e vauci tiko kina na yacana.
3 “Sa levu ko Jiova, ka sa dodonu me vakavinavinakataki vakalevu.” Ni bera nira ‘vakarokorokotaka na yaca i Jiova’ na tamata, e dodonu mera kila mada e liu na ka dina me baleti koya. (Same 96:4, 8) Ia e so era sega ni vakabauta ni bula tiko na Kalou. (Same 14:1) E so tale era vakalolovirataki koya nira kaya ni sega ni Kalou kaukaua, e sega tale ga ni kauaitaka na veika era cakava na tamata. Nida vukei ira na yalodina mera rawata na kilaka dodonu me baleti koya na Dauveibuli, nona inaki, kei na nona itovo vinaka, eda sa vakalagilagi Jiova tiko.
4 Ena Noda iTovo: E vakacaucautaki tale ga na Kalou nida muria nona ivakatagedegede dodonu. E dau laurai oqo ena noda itovo vinaka. (1 Pita 2:12) Kena ivakaraitaki, na savasava kei na maqosa ni keda irairai e rawa ni uqeti ira e so mera veivakacaucautaki, oqo e dua na sala eda rawa ni tukuna kina vei ira na yaga ni noda muria na ivakavuvuli ena Vosa ni Kalou. (1 Tim. 2:9, 10) Eda dau marau nira raica e so tale na noda ‘cakacaka vinaka ra qai vakarokorokotaka kina na Tamada sa tiko mai lomalagi’!—Maciu 5:16, VV.
5 Meda vakacaucautaka mada ga na lagilagi ni noda Kalou e veisiga ena ka eda cakava kei na ka eda tukuna, nida cakava oqori eda sa na sauma tiko kina na kaci ni marau oqo: “Dou sere vei Jiova, dou vakavinavinaka ki na yacana; dou tukuna voli e na veisiga kece ni sa dauia na veivakabulai ko koya.”—Same 96:2.