Vidio e Vakamacalataka na iWalewale Vou ni Veiqaravi Vakavuniwai
O ira na vakailesilesi ni tabana ni lawa kei na tabana ni bula era kauaitaka vakalevu ena gauna oqo na nodra rai kei na nodra dodonu na qaravi vakavuniwai. E vakarautaki kina e so na iwalewale vou ni veiqaravi ena rawa ni yaga sara ga vei keda na iVakadinadina i Jiova. (Caka. 15:28, 29) Oqo na ka e vakaraitaki ena vidio Transfusion-Alternative Health Care—Meeting Patient Needs and Rights. Sarava, qai railesuva na ka o raica.—Nanuma Matua: Era vakadreti na itubutubu mera lewa vakamatau nira sarava kei luvedra na vidio oqo, ni vakaraitaki kina vakalekaleka na veisele.
(1) Na cava era sa dikeva tale tiko kina e so mai na tabana ni bula na vakayagataki ni dra? (2) Tukuna e tolu na ivakaraitaki ni veisele vereverea e sega ni vakayagataki kina na dra. (3) E vica na vuniwai kei ira na dauveisele e vuravura era vakaraitaka na nodra tu vakarau mera qaravi ira na sega ni via taura na dra? Na cava na vuna e vaka kina oya na nodra rai? (4) Na cava e kune ena so na vakadidike e caka ena vica na valenibula me baleta na vakayagataki ni dra? (5) Na cava e so na leqa e rawa ni yaco ena veiqaravi vakavuniwai e vakayagataki kina na dra? (6) Na cava era sa vakadeitaka e levu na kenadau me baleta na yaga ni veiqaravi e sega ni taurivaki kina na dra? (7) Na cava e dau vakavuna na anemia? Ni dua e tauvi koya na anemia na ivakatagedegede cava ena rawa ni qai tukuni kina ni sa leqataki sara ga na nona bula? Na cava e rawa ni caka me wali kina? (8) Na cava e rawa ni caka me vukea na yago me bulia vakalevu na red-cell? (9) Na iwalewale cava soti era dau vakayagataka na vuniwai me kua ni levu na dra e vakayali ena gauna ni veisele? (10) E rawa tale beka ga ni yaga vei ira na gone kei ira na tauvimate bibi se mavoa vakaca na veiqaravi vakavuniwai e sega ni vakayagataki kina na dra? (11) Na ka bibi duadua cava me yavutaki kina na veiqaravi vakavuniwai? (12) Na cava e bibi kina vei keda na lotu Vakarisito meda vakasamataka rawa tu se veiqaravi vakavuniwai cava eda na vakadonuya me caka vei keda? Eda na cakava vakacava oqo?
Noda digia se sega na veiqaravi vakavuniwai e vakaraitaki ena vidio e noda vakatulewa sara ga, ia me salavata kei na noda lewaeloma e vakavulici ena iVolatabu. O sa vakatulewataka oti beka na veiqaravi o vakadonuya me caka vei iko vaka kina vei ira na luvemu? E dodonu mo vakamacalataka tale ga vakavinaka vei ira na nomu lewenivuvale era sega ni iVakadinadina na ka o sa vakatulewataka kei na vuna.—Raica na “Taro na Dauwiliwili” ena Vale ni Vakatawa, 15 June, 2004, kei na 15 Okotova, 2000.