Na Veivuke e Tu Vakarawarawa
1. Na cava e dau vakavuna nona malumu vakayalo e dua?
1 O Anna e dua na tacida yalewa e sega ni tiko ena dina na watina, e dau osooso tale ga ena nona cakacaka. E dredre kina me tiko wasoma ena soqoni vakarisito, vakaitavi ena cakacaka vakavunau, kei na nona vulica na Vosa ni Kalou. Dina ni se lomani Jiova tiko, ia e sa malumu ga vakayalo. E marautaki nira qai vukei koya vakayalo na qase ni ivavakoso dauveikauaitaki.
2. Sala cava e rawa kina nira tu vakarau na lotu Vakarisito kece mera veivuke?
2 Noda ciqoma na veivuke vakayalo e vakarautaki ena ivavakoso vakarisito e vakaraitaka noda vakararavi vakatabakidua vei Jiova. Era vakadamurimuria na loloma i Jisu Karisito na tacida tagane qase ena ivavakoso ena nodra qara na sala mera dau veivakayaloqaqataki kina, ra qai vukei ira na sotava tiko na dredre ena nodra qaravi Jiova. (1 Ces. 5:14) Ena so na gauna na ka ga e gadrevi oya na vosa ni veivakayaloqaqataki e tau ena yalovinaka qai salavata kei na tikinivolatabu veiuqeti. Noda vakaliuliu meda uqeti ira era malumalumu tu vakayalo e sega wale ga ni nodra itavi na qase, e noda itavi na lotu Vakarisito kece. Sega ni vakabekataki nida sa vakila kece na kaukaua ni ‘vosa e taudonu.’—Vkai. 25:11; Aisea 35:3, 4.
3, 4. Na cava e okati ena nodra vukei na malumalumu tu vakayalo? Eda na cakava vakacava?
3 Vakaliuliu: Noda vakaraitaka noda kauaitaki ira dina era gadreva tu na veivuke ena vinakati kina meda vakaliuliu, dau loloma, kei na noda yalodina. Ni sa kila o Jonacani na leqa sa tu kina o Tevita, ‘a lako i veikau me lai vakaukauataki koya.’ (1 Sam. 23:15, 16) Meda vukei ira gona na tacida ena sala malumu. Na vosa e tau ena veikauaitaki dina e dau cakayaco sara ga. E vakaraitaka tale ga vakamatata o Jisu ni gadrevi me vakainaki noda sasaga da qai mamakutu, me rawa nira vakabulabulataki tale kina na tacida vakayalo. (Luke 15:4) Ke vu dina mai lomada noda gadreva meda vukea e dua na tacida ena uqeti keda meda veivuke tiko ga, kevaka mada ga e taura na gauna me qai vakavatukana.
4 E veivakayaloqaqataki dina ke da vakaliuliu ni sureti ira eda vulivola vata meda veitomani ena cakacaka vakavunau! Nida vukea e dua na tacida vakayalo ena cakacaka vakavunau, rawa nida vakayagataka na gauna oqori meda vakaukauataki koya kina. Na gauna marautaki vaka oqori e dau vakayaloqaqataki ira sara ga na tacida era saga tiko mera tomana tale nodra veiqaravi vakayalo.
5. Ena so na ituvaki, na veivuke cava e rawa nira vakarautaka na qase?
5 Na Veivuke Vakayalololoma: O ira era sa sega tu ni cakacaka vakavunau se vakasosoqoni ena dua na gauna, era na gadreva vakalevu na veivuke me vakaukauataki tale kina na nodra vakabauta. Nodra vukei mera vulica na ivola Qarava na Kalou Dina, Toro Voleka Vei Jiova, se Na Cava Sara Mada e Kaya na iVolatabu? ena rairai vinaka sara ga vei ira. Ena sega ni gadrevi me taura e dua na gauna balavu na vuli nira sa papitaiso oti na tacida oqo. E bibi me ratou yadrava tiko na Komiti ni Cakacaka se o cei ena yaga vua na veivuke vaka oqo.—Raica na Kato ni Taro ena Noda Cakacaka Vakaitalatala, Noveba 1998 kei na Noveba 2000.
6. E vakaukauataki vakayalo vakacava e dua na tacida yalewa?
6 O Anna e sa cavuti oti, e ciqoma na nodra veivuke na qase me dua na tacida yalewa matua me vukei koya ena nodrau vulica vata na iVolatabu. Ena ikava ga ni nodrau vuli e vukei koya me toro volekati Jiova tale. Tekivu lako ena soqoni, qai bucina tale na gagadre me vakalagilagia na Kalou o Jiova e matanalevu. E vukei Anna tale ga na tacida matua oya ena nodrau lako vata ina nona vuli iVolatabu me yacova ni sa kaukaua tale me vunau e veivale. E gadreva ga na veivuke vakayalololoma me rawa ni tomana tale na nona veiqaravi vei Jiova!
7. Na cava na yaga ni nodra vukei vakayalo na tacida?
7 Na nodra vakaukauataki o ira era gadreva tu na veivuke e vu ni veivakalougatataki vei keda kece. O koya e vukei e marautaka ni sa toro volekati Jiova tale, sa rawa ni vakaitavi ena Nona isoqosoqo. Era dau reki na qase nodra raica na toso vaka oqo. (Luke 15:5, 6) Ena nodra dau veikauaitaki na lewe ni ivavakoso era na veivolekati ra qai duavata kina. (Kolo. 3:12-14) E tu vei keda na vuna vinaka meda vakadamurimuri Jiova, nona veivuke e tu vakarawarawa!—Efeso 5:1.