iVola Mai na Valenivolavola ni Tabana e Viti

Vei Kemuni na Dautukutuku ni Matanitu ni Kalou:

E dau noda ivalavala ga na tamata i Jiova meda gugumatua ena noda ‘vakaogai keda ena cakacaka ni Turaga.’ E laurai vakalevu oqo ena noda vanua ena rua na yabaki sa oti. Keitou vakavinavinakataka na nodra veitokoni ena loma ni gauna oqo na tacida e ke vaka kina o ira na gole mai vanuatani ena kena vakalevutaki na valenitabana. E sa mai cava na cakacaka levu oqo. Na vale totoka oqo ena rawa ni vakarabailevutaki kina na cakacaka e vauca na Matanitu ni Kalou ena yalava e qarava tiko na valenivolavola.​​—⁠1 Kor. 15:​58, VV.

E marautaki tale ga na kena sa mai oti na Kingdom Hall levu e Ba, e sa vakatatabutaki oti tale ga. Na ivavakoso era tiko ena yasayasa vakara e Viti Levu era vakanamata mera na lai vakayagataka na Kingdom Hall oqo ni na vakayacori tiko kina na nodra siga ni soqo lavotaki kei na soqo ni tabacakacaka. Me yacova mai nikua e sa 11 na Kingdom Hall era sa tara oti, e 3 era sa vakavinakataki oti, sa qai vo tale e 3 me tara, me vaka e koto ena ituvatuva ni tara Kingdom Hall.

Noda raica na iwiliwili levu era tiko ena iVakananumi ni yabaki oqo eda rawa ni raica na vuna era tara tiko kina na Kingdom Hall. Ena yabaki oqo e rawati kina e Viti e dua na iwiliwili levu duadua era tiko ena iVakananumi, nira le 8,315. E le 306 e Kiribati, 141 e Tuvalu, qai 118 e Nauru.

Mai vanuatani, na itukutuku e tauri mai na valenivolavola ni tabana e Mereke ni sivia e 8,000 na mataveitacini era vakaitavi tiko ena cakacaka ni veivukei vei ira na tacida era vakaleqai vakaca ena cagilaba o Katrina ena vica na vula sa sivi. Era cakacaka tiko ena veiliutaki ni 60 na Regional Building Committee, era sa vakavinakataka kina se tara vou tale e 86 na Kingdom Hall kei na 4,178 na vale. Sa vo tale me vakavinakataki e 5 na Kingdom Hall kei na 722 na vale. E sa ka dokai dina na noda mai lewena tu na isoqosoqo totoka i Jiova.

Nida raica lesu na veika eda sa rawata ena yabaki vakacakacaka sa oti, eda sa raica ga kina na vakasakiti ni nona veivakalougatataki o Jiova. Nida sa tekivuna oqo na yabaki vakacakacaka vou ni 2007, meda vakadeitaka nida na vakaraitaka tiko ga noda vakavinavinaka vei Jiova ena noda gumatua ni kacivaka na itukutuku vinaka.

Tacimuni,

Valenivolavola ni Tabana e Viti