Lesuvi Ira Kece na Bau Tataleitaki Toka

¹ Levu vei keda nikua e mai kila na ka dina ena vuku ni nodra siqema e so na dautukutuku nida tataleitaki ra qai lesuvi keda vakavica mera vakauqeti keda. E dodonu meda cakava tale ga oqori ena noda lesuvi ira kece eda siqema nira bau tataleitaki toka. Io, na veisikovi lesu e okati tiko ena ilesilesi meda ‘qisi ira na tamata mera tisaipeli.’​​—⁠Maciu 28:​19, 20, VV.

² Mo Siqema ke Tataleitaki: Kevaka mada ga era sega ni taleitaka na noda ivola na itaukeinivale, eda rawa ga ni siqema ena irairai ni matadra, na rorogo ni domodra, se na nodra ivosavosa nira kauaitaka toka na itukutuku eda kauta tiko yani. E dodonu meda lesuvi ira. A cakava oqo e dua na tacida tagane ena nona sikova vakalima e dua na turaga e sega ni taura na noda ivola. Ena ikaono ni nona veisiko, sa qai taura na ivola na turaga oya, tekivu sara na vuli iVolatabu.

³ Ke da siqema ni bau tataleitaki toka e dua, meda lesuvi koya ena loma ni vica ga na siga. Meda kua ni vakawalena de na mai kovea na “vu-ni-ca” na ka e sa kaburaki e lomana. (Maciu 13:19) Ia meda dina ina noda yalayala ena noda lesuvi ira ena gauna eda lokuca.​​—⁠Maciu 5:​37.

⁴ E Gaunisala: Eda dau saga beka meda lesuvi ira na tataleitaki eda sotava e gaunisala se o ira eda sotava nida vunau tawalokuci? Ni oti na noda veitalanoa, rawa nida kaya: “Au marautaka sara ga na nodaru veitalanoa. Oni taleitaka me daru veivosaki tale?” E so na dautukutuku era dau solia nodra naba ni talevoni, se ra kerea tale ga na nodra naba na tataleitaki. E so era na solia nodra naba ni talevoni se vanua era tiko kina kevaka era raica nida dau cakacaka vakawasoma ena gaunisala oya. Ia ke ra sega ni via solia, rawa nida vakauqeti ira tiko ga nida sotavi ira tale.

⁵ Dua na ka noda marau nida raica na kena tubu na kau eda karona tiko mai da qai vakasuasuataka. Ena vaka tale ga oqori na noda marau nida lesuvi ira na tataleitaki da qai vukei ira mera toso vakayalo. (1 Kor. 3:⁠6) Me noda isausau mada ga meda lesuvi ira kece na bau tataleitaki toka.