Mo Lesu Dina!
1 “E totoka dina na neirau veitalanoa! Au na saga sara ga meu na sikovi koya lesu.” Dau nomu vosa beka oya, ia e muri o qai guileca na vanua e tiko kina o koya drau a veitalanoa? Ke vaka kina, na sala ga mo na lesu dina kina oya mo vola na kena ivakamacala.
2 Vola Kece: Ni drau se qai veitalanoa oti ga kei koya e tataleitaki, vola kece sara na tikina veiganiti me baleti koya. Vola na yacana, kei na ivakatakilakila e so mo na nanumi koya tale kina. Vola na nona itikotiko dina, sega ni ka ga o nanuma—vakadeitaka ni sa dodonu na ka o sa vola oya. Me volai tale ga na ulutaga drau a veitalanoa kina, na tikinivolatabu drau a wilika, kei na ivola o solia.
3 Ke dua na taro o taroga toka me qai saumi ena gauna o lesuvi koya kina, mo vola tale ga oya. O taura rawa beka e so na ka me baleti koya, na nona vuvale, se na nona lotu? Ke vaka kina, mo vola tale ga oqori. Ni o kauta cake mai oqo ena gauna o lesuvi koya kina, ena vakaraitaka vua ni o kauaitaki koya dina. Qai iotioti ni ka o vola na siga kei na gauna drau veitalanoa taumada kina, kei na gauna cava o nakita mo lesuvi koya kina. Ke matata na veika o vola, o na nanuma vinaka na ka e vauci koya na tataleitaki, o na sega tale ga ni guilecava nomu a yalataka mo na lesuvi koya tale.—1 Tim. 1:12.
4 Ni o sa vola oti na ka kece sara, qai tugana kei na nomu iyaya ni cakacaka vakavunau—na nomu kato ni ivola, iVolatabu, ivola na Reasoning, kei na ivola ena soli—me rawarawa kina na nomu na raica. Me baleta na tikidua eda dau volai ira kina na veivale e lala, e vinaka me duidui na kena o vakayagataka me baleta oya, mai na kena o volai ira kina na nomu veisikovi lesu. Ia, na tikina e bibi duadua, oya mo lesu dina, me na qai taucoko kina na veika kece o vakavola me baleta na veisikovi lesu!
5 Vakasamataki Koya O na Lesuva: Ni o sa vakavakarau tiko ina cakacaka vakaitalatala, raica lesu tale na veika o a vola me baleti ira na nomu veisikovi lesu. Vakasamataki ira yadua kei na sala vinaka cava ni veivosaki mo na vakayagataka ena nomu veisiko e tarava. Vakasamataka se mo bucina vakacava na nona tataleitaki me vuli iVolatabu rawa kina. Na vakavakarau vaka oqo ena vuavuaivinaka sara kina na nomu cakacaka vakaitalatala ni itukutuku vinaka, o na marautaka sara tale ga.—Vkai. 21:5a, NW.
6 O koya gona, ni o sotava tale e dua e via rogoca na noda itukutuku, e sega ni vinaka mo vakananuma wale tu ga. Ena vinaka mo vola sara, raica lesu tale na veika o a vola, vakasamataki koya o na lesuva, qai kena ilutua mo lesu dina!