“Vinaka, sa Rauti Au”
1 Oqo na ka era dau tukuna e so ena noda yalava. Na cava ena vukei keda meda kua ni yalolailai nida sotavi ira na vaka oqo? Eda na uqeti ira vakacava mera rogoca na itukutuku vinaka?
2 Kua ni Yalolailai: Eda na sega ni yalolailai kevaka eda kila na vuna era sega ni dau vakarorogo kina e so. Era rairai sega ni kila na itukutuku bibi ena iVolatabu nira a vakavulici ena ivakavuvuli na evolution, se ra susugi ena vuvale era sega ni vakabauta na Kalou. So tale era rarawataka na veivakaisini ni lotu. E so era na sega ni taleitaka na itukutuku vinaka baleta beka nira vuturitaka tu e so na ka, se ra yalolailai. (Efeso 2:12) So tale era ‘sega ni kila’ se kauai nira sa lomoci tu ena lomaocaoca ni bula oqo.—Maciu 24:37-39.
3 O koya gona, se mani vakacava na nodra sega ni kauai e so na itaukeinivale, meda kua ni yalolailai baleta nida sa vakarokorokotaka tiko kina na Kalou o Jiova. (1 Pita 4:11) E vakaukauataka tale ga noda vakabauta noda tukuna tiko ga na ka dina vei ira era se lecava na kena bibi. Meda saga gona me tiko vei keda na rai i Jiova me baleti ira na tiko ena yalava. A lomani ira na lewenikoro e Ninive o Jiova nira “sega ni kila rawa na ligadra i matau mai na ligadra i mawi.” (Jona 4:11) E bibi gona mera rogoca na itukutuku vinaka o ira na tiko ena noda yalava! Meda kua ni soro, meda qara tiko ga na sala e so meda uqeti ira kina mera rogoca na itukutuku veivakacegui ena iVolatabu.
4 Tukuna na Ka Sara ga e Yaco Tiko: Rawa nida tekivuna noda vakamacala nida tukuna na ka sara ga e yaco tiko ena yalava, da qai taroga na nodra nanuma. Rogoca vinaka na ka era tukuna, qai vakaraitaka vei ira na itukutuku veivakacegui ena iVolatabu me salavata kei na ka era kauaitaka. A cakava oqo e dua na tacida ni oti na vakacalaka ena dua na yalava, a cavuta e so na vosa ni veivakacegui ena vale kece a tara ena yalava oya me vakaraitaka nona kauai. “Sega ni bera na neimami sa veivosaki kei ira na sega ni dau via vosa tu e liu,” e kaya. “E toso vinaka na neimami veivosaki baleta ga na noqu a kauaitaki ira.”
5 Na leqa kece eda sotava tu na kawatamata ena walia duadua ga na Matanitu ni Kalou. Meda saga gona meda kila sara ga na ka era lomaleqataka tiko na itaukeinivale. Nida cakava oqo era na rawa ni vakadonuya na itaukeinivale meda vakamacalataka na inuinui ena iVolatabu. Ia ke sega, de ra na qai ‘vakarorogo’ tale ena dua na gauna.—Caka. 17:32.