Noda Vosota na Ka ni Veivakatovolei Nida Vunau e Veivale

“Keitou sa qai doudou ga e na vuku ni neitou Kalou me tukuna sara vei kemudou nai tukutuku-vinaka ni Kalou, a sa ka levu na veivorati.”​—1 CES. 2:2.

1. Na ka ni veivakatovolei cava a sotava o Jeremaia, a vosota vakacava?

E VAKATAKI keda ga o Jeremaia. Ena gauna e lesi koya kina o Jiova me “nodra parofita na veimatanitu,” a tukuna o koya: “Isa, noqu Turaga Jiova! raica, ka’u sa sega ni kila vosa: ni’u sa gone ga koi au.” Ia a nuitaki Jiova ga, mani cakava na ka e lesi kina. (Jere. 1:​4-​10) Ena sivia na 40 na yabaki, a vosota tiko na nodra sega ni kauai na tamata, sega ni veiciqomi, ra veivakalialiai, ra ivalavala kaukaua mada ga vua. (Jere. 20:​1, 2) Ena so na gauna, sa via tinia sara ga na nona veiqaravi. Ia a vosota qai vunau tiko ga, dina ni sega ni taleitaki na itukutuku ra qai sega ni kauai kina e levu. Ena kaukaua i Jiova, a cakava kina o Jeremaia na ka a sega ni cakava rawa ena nona kaukaua ga.​—Wilika Jeremaia 20:​7-9.

2, 3. Me vakataki Jeremaia ga, era vakatovolei vakacava na dausokalou vei Jiova nikua?

² Era vakila e levu na dausokalou vei Jiova nikua na ka vata ga a vakila o Jeremaia. Na imatai ni gauna eda vakasamataka kina noda lai vunau e veivale, eda a rairai nanuma: ‘Au sa na sega tu ga ni rawata qori.’ Ia ena gauna eda vulica kina ni inaki i Jiova meda vunautaka na itukutuku vinaka, sa da sega tale ni lomalomarua, eda mani ogaoga sara ena vunau. Levu vei keda e vakadinadinataka ni dau yaco e so na ituvaki e vakavuna me dredre kina noda vunau ena so na gauna. E ka ni bolebole dina na noda se qai tekivu vunau e veivale, kei na noda saga meda vunau tiko ga me yacova na ivakataotioti.​—Maciu 24:13.

³ Vakacava ke o lomalomarua tiko na lai vunau e veivale, dina ni o vulica tiko na iVolatabu kei ira na iVakadinadina i Jiova, o sa dau tiko tale ga ena so na soqoni? Vakacava ke dau dredre mo vunau e veivale, dina ni o dua na iVakadinadina papitaiso qai vinaka tu na kemu ituvaki vakayago? Mo nuidei nira vosota tale tiko ga na ka ni veivakatovolei va qori me baleta na vunau e veivale o ira na veimataqali tamata e duidui vakalevu na nodra isususu. O rawa ni vosota tale ga ena veidusimaki i Jiova.

Meda Doudou

4. Na cava a doudou kina o Paula me vunautaka na itukutuku vinaka?

⁴ Sega ni vakabekataki ni o sa vakadinata ni vunautaki tiko na itukutuku vinaka e vuravura raraba ena kaukaua ni yalo ni Kalou, sega ni kaukaua se vuku vakatamata. (Saka. 4:6) Qori tale ga na ka e yaco ena nodra cakacaka vakaitalatala na lotu vaKarisito yadua. (2 Kor. 4:7) Vakasamataka na ka e vola na yapositolo o Paula ena gauna a nanuma lesu kina na nodrau tusaqati kei na nona itokani daukaulotu: “Ni keitou a vakararawataki mada eliu, ka vakacacani sara mai Filipai, . . . keitou sa qai doudou ga e na vuku ni neitou Kalou me tukuna sara vei kemudou nai tukutuku-vinaka ni Kalou, a sa ka levu na veivorati.” (1 Ces. 2:2; Caka. 16:​22-​24) So na gauna, a dredre sara ga vei Paula me vunau, dina ni dua na daukaulotu gugumatua. Me vakataki keda ga, a vakararavi vei Jiova o Paula me vunau tiko ga kina ena doudou. (Wilika Efeso 6:​18-​20.) Eda na vakatotomuri Paula ena sala cava?

5. Na cava e dua na sala eda na rawa ni doudou kina meda vunau?

⁵ Na masu e dua na sala eda na rawa ni doudou kina meda vunau. A kaya e dua na painia: “Au dau masu meu vosa kina ena nuidei, meu uqeta na lomadra na vakarorogo, meu marautaka tale ga na cakacaka vakavunau. Qo na cakacaka i Jiova, sega ni noda, eda na sega gona ni rawata e dua na ka ke sega ni tokoni keda o koya.” (1 Ces. 5:​17) E bibi gona meda masuta tiko ga na veidusimaki ni yalo tabu ni Kalou, meda vunau kina ena doudou.​—Luke 11:​9-​13.

6, 7. (a) Na cava a raivotutaka o Isikeli, cava na kena ibalebale? (b) Na cava eda vulica na dausokaloutaki Jiova nikua me baleta na raivotu i Isikeli?

⁶ E vakamacalataki ena Isikeli e dua tale na ivukevuke meda vosa kina ena doudou. Ena raivotu, a solia o Jiova vei Isikeli e dua na ivolavivigi e sinai kina “na lele, kei na tagi yaso, kei na vakaulei,” qai tukuna vua me kania: “Ko iko na luve ni tamata, mo ia mada na kana, ia mo vakamamautaka na ketemu e nai vola vivigi oqo ka’u sa solia vei iko.” Na cava na ibalebale ni raivotu qori? E dodonu me tiki sara ga ni bula i Isikeli na itukutuku e vakarau kacivaka, me uqeta na lomana, me vaka sara ga e curumi koya. Mani kaya na parofita: “Au a qai kania; ia ni sa tiko e na gusuqu sa vaka na oni na kena kamikamica.” E talei dina qai kamica vei Isikeli na kacivaka na itukutuku ni Kalou e matanalevu, e vaka sara ga na kana oni. E itavi dokai vua me matataki Jiova, vakayacora tale ga na ilesilesi vaKalou, dina ni okati kina nona vakasavuya na itukutuku warumisa vei ira na sega ni kauai.​—Wilika Isikeli 2:8–​3:​4, 7-9.

⁷ Eda rawa ni vulica tale ga e dua na ka bibi mai na raivotu qori na dausokaloutaki Jiova nikua. Eda vunautaka tale tiko ga na itukutuku warumisa vei ira na sega ni kauaitaka na bibi ni noda cakacaka. E dodonu gona meda wilika, da qai vulica tiko ga na iVolatabu me vinaka tiko ga kina na noda rai me baleta na cakacaka vakaitalatala​—oya ni ilesilesi vaKalou. Ena sega ni taucoko na noda kila na Vosa ni Kalou ke vakavudua ga noda vuli, qai sega ni vulici na veika titobu ni Kalou. O rawa beka ni vakavinakataka nomu wilika kei nomu vulica na iVolatabu, qai saga me caka wasoma? Vakacava mo vakalevutaka na gauna o dau vakasamataka kina vakatitobu na ka o wilika?​—Same 1:​2, 3.

Noda Tekivuna na Veivosaki ena iVolatabu

8. Na iwalewale cava e yaga vei ira e so na dautukutuku ena nodra tekivuna na veivosaki ena iVolatabu nira vunau e veivale?

⁸ E ka dredre duadua vei ira e levu na dautukutuku era vunau e veivale, na nodra tekivuna na veivosaki kei itaukeinivale. Sega ni vakabekataki ni dau ka ni bolebole ena so na yalava meda tekivuna na veivosaki kei itaukeinivale. E rawarawa cake vei ira e so mera tukuna taumada e vica na vosa vakavure vakasama, ra qai solia vei itaukeinivale e dua na ivolacebaceba, me vaka ga e vakamacalataki ena kato. De dua ena taleitaka na ulutaga ni ivolacebaceba se na iyaloyalo duiroka ena tabana, rawa kina meda tukuna ga vakalekaleka na inaki ni noda cakacaka da qai taro tale ga. Dua tale na iwalewale oya meda vakaraitaka vua e tolu se va na ivolacebaceba, da qai tarogi koya me digia e dua e taleitaka. E sega ni noda inaki meda solia wale ga na ivolacebaceba se meda vakayagataka ena veivale eda vunau kina, ia e dodonu meda tekivuna na veivosaki ena iVolatabu me rawa ni tauyavu kina na vuli.

9. Na cava e bibi kina na vakavakarau vinaka?

⁹ Se mani iwalewale cava o vakayagataka, na nomu vakavakarau vinaka ena uqeti iko mo nuidei, bulabula tale ga nomu vunau e veivale. E vakadinata e dua na painia: “Au dau marau vakalevu niu vakavakarau vinaka. E dau uqeti au sara ga meu vakayagataka na vakatutu au sa vakatovotovotaka mai.” Kaya e dua tale na painia, “Keu kila vinaka na lewe ni ivola au na solia, au dau nanamaki sara ga meu vakayagataka.” Dina ni yaga toka meda railesuva lo na ka eda na lai vakamacalataka, era vakadinadinataka e levu ni vinaka cake meda dau vakatovotovo vakadomoilevu. Noda cakava qori ena uqeti keda meda qaravi Jiova ena noda vinaka taucoko.​—Kolo. 3:​23; 2 Tim. 2:​15.

10. Na cava e rawa ni caka me yaga kina qai veiuqeti na sota ena cakacaka vakavunau?

¹⁰ E dau yaga vakalevu noda sota ena cakacaka vakavunau nida marau kina vakalevu, qai laulau tale ga noda vunau. E rawa ni veivosakitaki vakalekaleka na tikinivolatabu ni siga oya ke salavata kei na cakacaka vakavunau. Ia, o koya na tacida e veilesi ena cakacaka vakavunau e dodonu me veivosakitaka se vakatasuasuataka sara ga e dua na iucu se iwalewale ni vunau rawarawa e ganita na yalava, se so tale na idusidusi ena yaga ena cakacaka vakavunau ena siga ya. Qo ena uqeti ira na tiko ena sota me laulau nodra vunau. Ke ra dau vakavakarau vinaka na qase kei ira na so tale era dau veilesi ena cakacaka vakavunau, ena veiuqeti na sota qai sega ni sivia na gauna e caka kina.​—Roma 12:8.

Na Yaga ni Vakarorogo

11, 12. E yaga vakacava noda vakarorogo vakayalololoma nida vunautaka na itukutuku vinaka? Tukuna e so na ivakaraitaki.

¹¹ E sega ni yaga wale ga na vakavakarau vinaka, ia e bibi tale ga na noda veikauaitaki vakayalololoma vei ira na itaukeinivale meda tekivuna kina na veivosaki ena iVolatabu, qai veiuqeti noda vunau. Dua na sala ena laurai kina noda veikauaitaki oya na noda vakarorogo. E vakadinata e dua na ivakatawa dauveilakoyaki: “Noda yalovosovoso kei noda yalorawarawa meda rogoci ira na tamata e dau uqeti ira sara ga mera kauai ena itukutuku vinaka, e vakaraitaka tale ga nida kauaitaki ira yadua vakayalololoma.” Noda vakarorogo ena yalololoma ena uqeti ira mera taleitaka na veivosakitaki ni iVolatabu, me vaka e laurai ena ivakaraitaki e tarava.

¹² A tabaki e dua na ivola ena niusiveva na Le Progrès, e Saint-Étienne, e Varanise, qai vakamacalataka kina e dua na marama na nodrau veisiko yani e rua, ni mate oti ga na luvenayalewa vulatolu. E vola, “Au kila ni rau iVakadinadina i Jiova ena gauna ga au raici rau kina. Au qai kauai ena ivola rau veisoliyaka tiko, dina niu a via vakatalai rau. Na ivola e baleta na nona vakatara tiko na Kalou me yaco na veika rarawa. Au mani sureti rau mai vale niu via vakacala ga na nodrau ivakamacala. . . . Mani sivia na dua na aua nodrau tiko. Rau rogoci au ena yalololoma kei na veikauaitaki. Ena gauna rau biubiu kina, au vakadonuya me rau qai veisiko tale mai baleta niu lomavakacegu sara ga.” (Roma 12:15) Toso na gauna, sa tekivu vuli iVolatabu na marama qo. Eda rawa ni vuli mai na ka e vola na marama qo me baleta nodrau veisiko na iVakadinadina ya, ni sega ni uqeti koya na ka rau kaya, ia nodrau vakarogoci koya ga vakayalololoma.

13. Eda na veisautaka vakacava na noda iwalewale ni vunau me ganiti ira na itaukeinivale?

¹³ Nida vakarorogo vakayalololoma, ena rawarawa vei ira na itaukeinivale mera tukuna na vuna ra gadreva kina na veiliutaki ni Matanitu ni Kalou. Ena rawarawa kina meda vunautaka vei ira na itukutuku vinaka. O sa rairai vakadinata nira dau kenadau ena vakarorogo o ira na dauveivakalotutaki vinaka. (Vkai. 20:5) Era dau kauaitaki ira dina na itaukeinivale era sotava ena cakacaka vakavunau. Era dau vola na yacadra, nodra itikotiko, vaka kina na ka ra taleitaka, kei na ka era gadreva. Era dau lai vakekeli ke dua e lomatarotarotaka e dua na ka, ra qai lesu ena gauna totolo duadua mera tukuna vua na ka ra vulica. Me vakataka na yapositolo o Paula, ra dau veisautaka na nodra iwalewale ni vunau me ganiti ira na itaukeinivale. (Wilika 1 Korinica 9:​19-​23.) Na veikauaitaki e vu mai lomada ena uqeti ira na tamata mera kauai ena itukutuku vinaka, e vakavotuya vinaka tale ga ni “nona loloma levu na noda Kalou.”​—Luke 1:​78.

Me Donu Tiko ga Noda Rai

14. Eda na vakatotomuria vakacava na itovo i Jiova ena noda cakacaka vakavunau?

¹⁴ E okati keda o Jiova meda ka talei ena nona solia vei keda na galala ni vakatulewa. Dina ni Kalou Kaukaua Duadua, e sega ni vakasaurarataki keda meda qaravi koya, ia e uqeti keda ga baleta ni lomani keda vakalevu, e vakalougatataki keda tale ga na vakavinavinakataka na nona isolisoli talei kece. (Roma 2:4) Nida nona italai, e dodonu meda tu vakarau meda vunautaka na itukutuku vinaka ena sala me lagiti kina na noda Kalou yalololoma. (2 Kor. 5:​20, 21; 6:​3-6) Eda na qai vunau ga va qori ke donu se vinaka tiko na noda rai me baleti ira na tiko ena noda yalava. Na cava ena uqeti keda meda cakava qori?

15. (a) Na cava e tukuna o Jisu me ratou cakava na yapositolo ke ra sega ni taleitaka na itukutuku vinaka e so? (b) Na cava ena uqeti keda meda kauaitaki ira ga na via kila na ka dina?

¹⁵ A vakasalataki ira na nona imuri o Jisu mera kua ni leqataka vakasivia na nodra sega ni taleitaka na itukutuku vinaka e so, ia mera kauaitaki ira ga na via kila na ka dina. (Wilika Maciu 10:​11-​15.) Ena yaga gona meda tekia e so na isausau lalai e sega ni dredre me rawati. E vakatauvatani koya e dua na tacida tagane ina dua e dau vakasaqara na vatutalei. E nona ivosavosa talei: “Au namaka meu kunea na koula nikua.” E nona isausau e dua tale na tacida tagane me “sotava e dua e tataleitaki ena veimacawa, me qai lesuvi koya ni oti ga e vica na siga me tomani nodrau veivosaki.” E nodra isausau e so na dautukutuku mera veivosakitaka e dua mada ga na tikinivolatabu kei na itaukeinivale kece ra sotava. Na isausau veiganiti cava o na tekia?

16. Na cava meda vunau tiko ga kina?

¹⁶ Na yaga ni cakacaka vakavunau e veivale e sega ni vakatau ga ena nodra kauai se sega na itaukeinivale. Dina ni bibi na cakacaka qori ena nodra vakabulai na tamata yalomalumalumu, ia e tiko e so tale na kena inaki bibi. Eda rawa ni vakaraitaka na lotu vaKarisito nida lomani Jiova ena noda cakacaka vakavunau. (1 Joni 5:3) Ena sega ni tarogi kina vei keda na nodra dra e so tale. (Caka. 20:​26, 27) Era na vakasalataki kina na tamata ca “ni sa yaco na nona gauna [na Kalou] me lewa.” (Vkta. 14:​6, 7) Kena ilutua, e vakalagilagi na yaca i Jiova ena veiyasa i vuravura ena kena vunautaki tiko na itukutuku vinaka. (Same 113:3) O koya gona, e dodonu meda vunautaka tiko ga na itukutuku ni Matanitu ni Kalou, se ra vakarorogo na tamata se sega. E ka talei dina qai lagilagi vei Jiova na noda sasaga kece meda vunautaka na itukutuku vinaka.​—Roma 10:​13-​15.

17. Na cava sa ra vakarau vakadinadinataka na kawatamata?

¹⁷ Dina ni levu nikua era vakawaletaka se beca noda cakacaka vakavunau, ia sa na vakarau veisau na nodra rai. (Maciu 24:​37-​39) A vakadeitaka vei Isikeli o Jiova nira na qai kila na Isireli “ni sa dua na parofita ka tiko e na kedra maliwa,” ena gauna e tau kina na cudru kei na lewa a vunautaka voli. (Isik. 2:5) Ena vakasama vata ga ya, ena gauna e tauca kina o Jiova na nona cudru kei na lewa ena ituvaki ca ni vuravura qo, era na qai vakadinadinataka na tamata ni a vu dina vaKalou na itukutuku era vunautaka na iVakadinadina i Jiova e veivale se na vanua ra levu tu kina na tamata. Era na qai kila nira matataka dina na Kalou o ira na iVakadinadina i Jiova. E ka dokai dina na noda vakatokai ena yaca ni Kalou kei na noda tukuna na nona itukutuku ena gauna bibi eda bula tu kina qo! Ena kaukaua i Jiova, meda vosota tiko mada ga na veika e dau vakadredretaka na noda vunau e veivale.

O na Sauma Vakacava?

• Na sala cava eda na doudou kina meda vunau?

• Na cava ena uqeti keda meda tekivuna na veivosaki ena iVolatabu nida vunau e veivale?

• Eda na vakaraitaka vakacava nida kauaitaki ira vakayalololoma na itaukeinivale?

• Na cava ena uqeti keda me donu tiko ga na noda rai me baleti ira na itaukeinivale ena noda yalava?

[Kato/​iYaloyalo ena tabana e 9]

Dua na Sala Meda Tekivuna Kina na Veivosaki ena iVolatabu

Ni o tekivu vakamacala:

◼ Ni o kidavaka oti ga na itaukeinivale, solia vua na ivolacebaceba qai kaya, “E inaki ni noqu mai raici kemuni meu tukuna e dua na ka vakavure vakasama me baleta na iulutaga bibi qo.”

◼ Se mo solia vua na ivolacebaceba qai kaya, “Au veisiko tiko mai vakalekaleka niu via kila na nomuni rai ena iulutaga qo.”

Ke taleitaka:

◼ Taroga sara e dua na taro rawarawa me baleta na nona rai, yavutaka na taro ena iulutaga ni ivolacebaceba.

◼ Vakarorogo vinaka, saga mo kila na vuna e va kina ya na nona rai. Vakavinavinakataki koya ena nona ivakamacala, qai okata qori ena nomudrau veivosaki.

Me tomani na veivosaki:

◼ Wilika qai veivosakitaka e dua se vica tale na tikinivolatabu, veisautaka nomu ivakamacala me salavata kei na ka e taleitaka, kei na veika e gadreva tu.

◼ Ke tataleitaki, solia vua na ivola qai vakaraitaka vua na icakacaka ni vuli iVolatabu. Veivosakitaka na gauna mo lesuvi koya kina.