Vakavulica na Luvemu me Vakalagilagi Jiova
1. Rawa beka nira vakalagilagi Jiova na gone?
1 Era uqeti na gone ena Same 148:12, 13 “mera vakavinavinaka [vakalagilagia] ki na yaca i Jiova.” E volaitukutukutaki tu ena iVolatabu na nodra ivakaraitaki na gone era a cakava vaka kina. Kena ivakaraitaki, “Sa ia tiko na nonai tavi e na mata i Jiova ko Samuela ni sa gone.” (1 Sam. 2:18) E tukuna e dua na “goneyalewa lailai” vua na wati Neamani ni na rawa ni vakabulai watina mai na nona vukavuka, e dua na parofita i Jiova. (2 Tui 5:1-3) Gauna a curu kina ena valenisoro o Jisu qai vakayacora na cakacaka mana, era kailavaka na ‘gone lalai, Osana vua na Luve i Tevita!’ (Maciu 21:15) O na vakavulica vakacava na luvemu me vakalagilagi Jiova?
2. Na cava e bibi kina mo ivakaraitaki vei ira na luvemu?
2 Nomu iVakaraitaki: Era vakaroti taumada na tama e Isireli mera lomani Jiova mai vu ni lomadra, mera muria tale ga na nona ivakaro, oti ra qai vakavulici luvedra ena ka dina. (Vkru. 6:5-9) Kevaka gona o dau uqeta na cakacaka vakavunau e veimacawa, o qai liu sara tiko ga kina, era na raica tale ga na luvemu me cakacaka bibi qai veivakacegui na cakacaka oqo.
3. E yaga vakacava vua e dua na tacida yalewa na nodrau ivakaraitaki na nona itubutubu?
3 E nanuma lesu e dua na tacida yalewa: “Niu tubu cake tiko, e sa ivakarau ga ni neitou bula vakavuvale na cakacaka vakavunau e veimacawa. Au raica ni rau dau marautaka sara ga noqu itubutubu na cakacaka oqo. Ni keitou sa uabula, e sa vaka tale ga oya na neitou rai, keitou raica na cakacaka vakavunau me cakacaka marautaki.” A dautukutuku bera ni papitaiso na tacida oqo ni se qai yabaki 7, ia sa 33 na yabaki na nona veiqaravi vakatabakidua.
4. Na cava na kena ibalebale ni tukuni mera vakavulici vakaikabakaba na gone?
4 Me Vakaikabakaba Nomu Veituberi: Vakayagataki ira na luvemu ena cakacaka vakavunau. Vakacava me tukuni vei ira mera tukia na katuba, solia na ivolacebaceba, se wilika e dua na tikinivolatabu? Era na marautaka kina na cakacaka vakavunau, era na doudou tale ga ni vakaitavi. Nira sa qase cake mai, era na matau sara ena cakacaka vakavunau. Mo tuberi ira vakaikabakaba, qai vakasamataka na isausau vakayalo mera sauva ena cakacaka oqo.
5. Na cava e gadrevi vei luvemu me dua na dautukutuku bera ni papitaiso?
5 Raici iratou na qase ke o nanuma ni sa rawata na luvemu na ivakatagedegede me dautukutuku bera ni papitaiso, ke sa nona gagadre tale ga me kakavaka na isausau oqori. Ke ra dautukutuku na gone, era na raica ni nodra itavi sara ga mera vakalagilagi Jiova. Nanuma tiko ni sega ni gadrevi me tautauvata sara na ka era kila na luvemu kei ira na dautukutuku era sa papitaiso mera qai rawata kina na ivakatagedegede ni dautukutuku. E sa kila beka o luvemu na yavu ni ivakavuvuli vakaivolatabu? Sa bulataka tiko na ka e vulica mai na iVolatabu? E sa lomana beka me vakaitavi ena cakacaka vakavunau, me kilai tale ga ni dua o koya na iVakadinadina i Jiova? Ke vaka kina, era na qai raica na qase se sa rawata o koya na kena ivakatagedegede me dua na dautukutuku bera ni papitaiso.—Raica na ivola iSoqosoqo e Cakava na Loma i Jiova, t. 79-82.
6. Na cava na yaga ni nomu vakavulici luvemu?
6 Sega ni cakacaka rawarawa mo vakavulici luvemu me vakalagilagi Jiova mai vu ni lomana. Ia o na rekitaka dina na nomu raica nona toso vakayalo na luvemu. O koya e bibi, ena marau sara vakalevu o Jiova ni raici ira na gone nira tukuna yani na nona cakacaka uasivi.