Vukei Ira na Vuli iVolatabu Mera Dautukutuku
1 E rabailevu na ivakaro i Jisu vei ira nona tisaipeli me vaka e vakamacalataki ena Maciu 28:19, 20, VV. Era vakaroti na imuri i Karisito mera vukea e so tale mera tisaipeli, ra qai tomana tiko ga na nodra cakacaka. Tiko na yavu vinaka ni kena kacivaki na itukutuku vinaka ni Matanitu ni Kalou ena gauna ni ivakataotioti eda sa bula donuya tu qo.—Maciu 24:14.
2 Rawa ni noda vuli iVolatabu o ira ga na luveda se o ira na tataleitaki. Me vu dina mai lomada na noda vukei ira mera vukea e so tale mera tisaipeli i Jisu Karisito.—Luke 6:40.
3 Uqeti Ira Mera Vunau: Meda uqeti ira noda vuli iVolatabu mera tukuna yani na veika era sa vulica. Tukuna vei ira e dua na tikina veiuqeti o sotava ena cakacaka vakavunau. Vakavulici luvemu me yaga nona vakaitavi ena cakacaka vakavunau ena gauna e se gone sara kina, me salavata ga kei na ka e rawata. (Same 148:12, 13) Me laurai ena nomu vosa kei na nomu ivakaraitaki ni bibi vei iko na cakacaka vakavunau.—1 Tim. 1:12.
4 O Jiova e vakayagataki ira ga na muria nona ivakatagedegede dodonu. Era sega ni tautauvata na dautukutuku vou kei ira na dautukutuku matua, ia e dodonu ga mera na vakamacalataka rawa na dautukutuku vou na yavu ni ivakavuvuli vakaivolatabu. (Raica iSoqosoqo, t. 79-82.) Mera tawasei ira tani mai vei ‘Papiloni na Ka Levu’ kei na veika kece e vauca na politiki, mera dau tiko tale ga ena soqoni.—Vkta. 18:2, 4; Joni 17:16; Iper. 10:24, 25.
5 Na gauna ga o kila kina ni sa ganiti nomu vuli iVolatabu me dua na dautukutuku bera ni papitaiso, mo tukuna sara vua na ivakatawa daulewa. Ena lesia e rua na qase ni ivavakoso mo dou na veivosakitaka vata ke sa ganiti koya dina me dua na dautukutuku bera ni papitaiso. Ni oti oya sa na qai nomu itavi mo vakavulici gonevuli ena cakacaka vakavunau.