‘Dou Vua Vakalevu’
1 O Jisu a vakatauvatani koya kei na vu ni vaini dina, o Jiova me iVakatawa ni were, o ira na nona imuri lumuti mera taba ni vaini vuavuaivinaka. A vakabibitaka o Jisu ni dodonu mera vuavuaivinaka na tabanivaini ena gauna a tukuna tiko kina na cakacaka i koya na iVakatawa ni Were. (Joni 15:1-4) Eda raica e ke ni o ira kece era veiwekani voleka kei Jiova e dodonu mera vua vakalevu me vaka na taba ni vu ‘ni vaini dina,’ o Jisu. E bibi meda vuataka tiko ga vakalevu “na vua ni Yalo Tabu” kei na vua ni Matanitu ni Kalou.—Kala. 5:22, 23; Maciu 24:14; 28:19, 20, VV.
2 Vua ni Yalo Tabu: E vakilai noda toso vakayalo ni laurai ena noda bula na vua ni yalo tabu. Vakacava, eda dau saga meda bulataka na vua ni yalo tabu ena noda vulica vakawasoma na iVolatabu da qai vakasamataka vakatitobu? (Fpai. 1:9-11) Meda kua ni tu vakasuka ni kerea na yalo tabu i Jiova me vukei keda meda bulataka na itovo ena vakalagilagi kina o koya, da qai toso tiko ga kina vakayalo.—Luke 11:13; Joni 13:35.
3 Na noda bulataka na vua ni yalo tabu eda na gumatua kina na cakacaka vakavunau. Me kena ivakaraitaki, ke tiko vei keda na vua ni yalo tabu na loloma kei na vakabauta, veitalia sara ke da osooso, eda na biuta vakatikitiki ga na gauna meda vunau kina vakawasoma. Ena vaka tale ga kina na vua ni yalo tabu na vakacegu, vosota vakadede, yalomalua, yalomalumalumu, kei na ivalavala malua, ke da bulataka, eda na kila na ka meda cakava nida tusaqati. Ni tiko vei keda na vua ni yalo tabu na reki eda na lomavakacegu, dina ga ni sega ni ciqomi na itukutuku eda kauta tiko yani.
4 Vua ni Matanitu ni Kalou: E bibi tale ga meda vua ena cakacaka vakavunau. Oqo e okati kina na ‘noda cabora na imadrali ni vakavinavinaka vua na Kalou ena vua ni tebenigusuda nida tusanaka na yacana.’ (Iper. 13:15) Eda cakava oqo ena noda kacivaka tiko ga na itukutuku vinaka. Vakacava, eda sa saga tiko meda vua vakalevu ena noda vakavinakataka na ivakarau ni noda cakacaka vakavunau?
5 A kaya o Jisu ni na duidui na ka era vuataka na nona imuri yalodina. (Maciu 13:23) Oya na vuna meda kua kina ni vakatauvatani keda kei ira na tacida, ia meda solia ga vei Jiova na noda vinaka kece ena ka eda dui rawata. (Kala. 6:4) Ke da vinakata meda vakalagilagi Jiova tiko ga ena noda “vua vakalevu,” meda vakayagataka na Vosa ni Kalou meda vakalewa vinaka kina na keda ituvaki.—Joni 15:8.