“Vua Vakalevu”

“Ni dou sa vua vakalevu: ka dou na qai noqu tisaipeli.”​—JONI 15:8.

1. (a) Na cava e kaya o Jisu vei iratou na nona yapositolo ena vinakati vei ira na via nona tisaipeli? (b) Na taro cava meda dui tarogi keda kina?

NA IOTIOTI ni yakavi oqo vei Jisu ni se bera ni vakamatei. Dua na iwase ni gauna vinaka sa vakayagataka ena nona dabe sara ga kei iratou nona yapositolo me vakayaloqaqataki iratou. Sa voleka na bogilevu tutu, ia e vosa tiko ga vei iratou na nona itokani voleka ena levu ni nona lomani iratou. Ena nona vosa tiko oya, sa qai tokaruataka e dua tale na ka ena vinakati ke ratou via nona tisaipeli tiko ga. E kaya: “A ka oqo sa vakarokorokotaki kina ko Tamaqu, ni dou sa vua vakalevu: ka dou na qai noqu tisaipeli.” (Joni 15:⁠8) Vakaevei o keda nikua, e kune tale ga vei keda na ka e vinakati oqori meda dua kina na tisaipeli? Na cava na kena ibalebale ni tukuni meda “vua vakalevu”? Me saumi na taro oqo, meda lesuva tale mada na veika e veivosakitaki ena yakavi oya.

2. Na cava na vosa vakatautauvata i Jisu ena bogi ni se bera nona mate?

² Nona vakadreta o Jisu mera vua nona imuri e tiki ni dua na vosa vakatautauvata e cavuta vei iratou nona yapositolo. E kaya: “KOI au na vaini dina, ka sai vakatau-ni-were [se, “ivakatawa ni were,” NW] ko Tamaqu. A tabaqu kecega sa sega ni vua, sa kauta laivi yani ko koya: ia na tabaqu kecega sa vua, sa samaka ko koya, me vua vakalevu sara. Dou sa qai samaki e na vuku ni vosa ka’u a vosataka vei kemudou. Dou tu vei au, ka’u na tu vei kemudou. Me vaka sa sega ni vua rawa na tabana vakai koya, kevaka sa sega ni tu vata kei na vaini; ena vaka talega kina koi kemudou, kevaka dou sa sega ni tu vei au. Oi au na vaini, koi kemudou na tabaqu. . . . A ka oqo sa vakarokorokotaki kina ko Tamaqu, ni dou sa vua vakalevu: ka dou na qai noqu tisaipeli. Me vaka sa lomani au ko Tamaqu, au sa lomani kemudou vaka talega kina: dou tiko ga e na noqu loloma. Kevaka dou sa talairawarawa ki na noqu vunau, dou na tiko ga e na noqu loloma.”​​—⁠Joni 15:​1-​10.

3. Na cava mera cakava na imuri i Jisu mera vua tiko ga kina?

³ Ena vosa vakatautauvata oqo, o Jiova na iVakatawa ni were, o Jisu na vaini, ratou qai tabanivaini na nona yapositolo e vosa tiko vei iratou. Ena gauna kece eratou na “tu vei” Jisu na yapositolo, eratou na vua tiko ga. Sa qai vakamacalataka vei iratou na sala me ratou vaqaqacotaka tiko ga kina na isema bibi ni duavata oqo: “Kevaka dou sa talairawarawa ki na noqu vunau, dou na tiko ga e na noqu loloma.” E muri, a qai vola na vakasama vata ga oya na yapositolo o Joni vei ira na nona itokani lotu Vakarisito: “Sa tu dei vei koya [vei Karisito] ko koya sa muria na nona vunau.”a (1 Joni 2:​24; 3:​24) O koya gona, era na tudei se duavata kei Karisito na nona imuri kevaka era muria tiko ga na nona ivakaro, ia na ka oqori ena vukei ira mera vua tiko ga. E vakacava sara tu mada na vua meda vuataka?

Rawa Nida Toso Tiko Ga

4. Na cava eda vulica rawa mai na nona “kauta laivi” o Jiova na tabanivaini e sega ni vua?

⁴ Ena vosa vakatautauvata me baleta na vaini, e “kauta laivi” se taya laivi o Jiova na taba e sega ni vua. Na cava eda raica e ke? Taumada, e gadrevi mera vua na tisaipeli kece. Kena ikarua, e rawa nira vua tiko ga na tisaipeli kece se mani duidui vakacava na kedra ituvaki. Ena veicalati sara ga kei na ivakarau i Jiova ni Kalou dau loloma, me “kauta laivi” se vakacala e dua na tisaipeli i Karisito ke sega ni cakava rawa e dua na ka e sega ni yacova na nona igu.​​—⁠Same 103:14; Kolosa 3:​23; 1 Joni 5:⁠3.

5. (a) E dusia vakacava na vosa i Jisu ni rawa nida toso ena noda vua tiko ga? (b) Na cava na rua na mataqali vua eda na vakarau raica?

⁵ E dusia tale ga na vosa vakatautauvata i Jisu baleta na vaini, ni dodonu meda tosoya tiko ga noda itavi vakatisaipeli se mani vakaiyalayala vakacava na ka eda rawa ni cakava. Raica mada se tukuna vakacava o Jisu na tikina oqori: “A tabaqu kecega sa sega ni vua, sa kauta laivi yani ko koya: ia na tabaqu kecega sa vua, sa samaka ko koya, me vua vakalevu sara.” (Joni 15:⁠2) Ena icavacava ni nona vosa vakatautauvata, a uqeti ira nona imuri o Jisu mera “vua vakalevu.” (Tikina e 8) Na cava e vakabibitaki e ke? Nida tisaipeli, meda kua sara ni vakasavuliga. (Vakatakila 3:​14, 15, 19) Meda qara na sala meda rawa ni vua tiko ga kina. Na mataqali vua cava meda vuataka vakalevu? Oqori (1) “na vua ni yalo tabu” kei (2) na vua ni Matanitu ni Kalou.​​—⁠Kalatia 5:​22, 23; Maciu 24:⁠14.

Noda Vuataka na iTovo Vakarisito

6. A vakabibitaka vakacava o Jisu Karisito na yaga ni vua ni yalo tabu e cavuti duadua e liu?

⁶ Na loloma na imatai ni “vua ni yalo tabu.” Na yalo tabu ni Kalou e teivaka na loloma vei ira na lotu Vakarisito, nira muria na ivakaro i Jisu a cavuta ni se bera toka ga ni kauta cake mai na vosa vakatautauvata me baleta na vaini e vakavuana. A kaya vei iratou nona yapositolo: “E dua na vunau vou ka’u sa solia vei kemudou, Mo dou veilomani.” (Joni 13:34) Io, ena iotioti ni bogi oya ni nona bula e dela i vuravura, a sega ni cegu o Jisu ni vakadreti iratou nona yapositolo me ratou vakaitovotaka na loloma.​​—⁠Joni 14:​15, 21, 23, 24; 15:​12, 13, 17.

7. E vakaraitaka vakacava na yapositolo o Pita ni ka e vuataki e baleta tiko na bulataki ni itovo vakarisito?

⁷ E kila vinaka o Pita, a tiko tale ga ena bogi oya, ni dodonu mera bulataka na tisaipeli dina i Karisito na loloma vakarisito kei na so tale na itovo vaka oya. Vica tale na yabaki e muri, sa qai uqeti ira na lotu Vakarisito o Pita mera teivaka na itovo e so me vaka na ivalavala malua, na veilomani vakaveitacini, kei na yalololoma. E qai kaya nira na sega “ni vucesa se tawa vua” nira cakava oqori. (2 Pita 1:​5-8) Se mani vakacava tu na ituvaki ni nona bula e dua, ena sega ga ni dredre vua me vuataka na vua ni yalo tabu. Meda saga meda dau vakaitovotaki keda vakalevu ena loloma, yalovinaka, yalomalua, kei na so tale na itovo vakarisito vaka oya, ni sa “sega na lawa me vakacalai kina na veika oqo,” se me vakaiyalayalataki. (Kalatia 5:​23) Io, meda “vua vakalevu.”

Vuataki na Vua ni Matanitu ni Kalou

8. (a) Erau sema vakacava na vua ni yalo tabu kei na vua ni Matanitu ni Kalou? (b) Na taro cava e ganiti me dikevi?

⁸ Totoka dina na irairai ni dua na vunikau nida raica nira sobi tu kina na vuata dreu e lumisa na kedra irairai. Ia na vuata e sega ni tu wale tu ga me vakarairaivinakataka e dua na vunikau. E tiko ena vuata na sorenikau me na bula kina vakalevu e dua na mataqali kau. E via vaka tale ga oqori na vua ni yalo tabu, ni sega ni tu me vakarairaivinakataka wale ga na noda itovo vakarisito. Na rua na itovo oqo, na loloma kei na vakabauta e tosoi keda meda kaburaka na sorenikau se itukutuku ni Matanitu ni Kalou e kune ena nona Vosa. Dikeva mada nona vakabibitaka o Paula na isema oqo. E kaya: “Au sa vakabauta [e dua na vua ni yalo tabu], sa i koya gona au vosa kina.” (2 Korinica 4:​13, VV) Ena vuku ni ka oqo, e kaya tale o Paula, eda “vakacabora tikoga nai madrali ni vakavinavinaka vua na Kalou e na vukuna, oqori na vua ni tebenigusuda”​​—⁠oqori na ikarua ni ka meda vuataka. (Iperiu 13:15) Se tu tale e so na ka e rawa nida cakava ena noda bula meda vua kina vakalevu, io meda “vua vakalevu” ena vuku ni kena kacivaki yani na Matanitu ni Kalou?

9. Vakaevei na vua meda vuataka, e sa baleta sara ga na noda vukea e so mera tisaipeli? Vakamacalataka.

⁹ Me saumi vakadodonu na taro oqori, taumada e bibi me kilai se cava sara mada na vua ni Matanitu ni Kalou. Ena donu beka ke nanumi ni noda vuataka na vua oqori ena vauci kina noda vukea e so mera tisaipeli? (Maciu 28:19) Vakacava na vua eda vuataka, e baleti ira beka ga na tamata eda vukei ira mera papitaiso mera mai qaravi Jiova? Sega. Kevaka e dina oqori, sa na bau veivakayalolailaitaki dina vei ira na iVakadinadina yalodina sa yabaki vicasagavulu nodra kacivaka voli na itukutuku ni Matanitu ni Kalou ena yalava era sega ni via vakarorogo na lewena. Ke vakaibalebaletaki na vua ni Matanitu ni Kalou e dodonu meda vuataka vei ira ga na tisaipeli vou eda vukea, kena ibalebale o ira na iVakadinadina yalodina oya era na vaka tu na tabanivaini tawavua ena vosa vakatautauvata i Jisu! Ia e sega ni vaka oqori na kena ibalebale. Na cava ga na vua taumada sara ga meda vuataka mai na noda kacivaka yani na Matanitu ni Kalou?

Eda Vua ena Noda Kaburaka na iTukutuku ni Matanitu

10. E rawa ni kilai vakacava mai na vosa i Jisu me baleta na daukakaburaki kei na vica na mataqali qele se cava sara mada na vua ni Matanitu ni Kalou? Ia e sega ni dusia na cava na vua oqori?

¹⁰ Na isaunitaro e tiko ena vosa vakatautauvata i Jisu me baleti koya na daukakaburaki kei na vica na mataqali qele​​—⁠na isaunitaro oqori ena vakayaloqaqataki ira dina era vunau tiko ena yalava e sega ni vua vakalevu. A kaya o Jisu ni sorenitei na itukutuku vinaka ni Matanitu ni Kalou e kune ena iVolatabu, ia na qele e dusia na loma ni tamata. Ni sa caka na kakaburaki, “sa lutu e so e na qele vinaka, ka ra sa tubu cake, ka ra mani vua.” (Luke 8:​8, VV) Vuataka na cava? Ni sa tubu cake qai matua na vuniwiti, na ka e vua mai e sega ni vuniwiti lalai, na soreniwiti ga. Na ka tale ga ena vuataka mai na lotu Vakarisito e sega ni kainaki sara me dua na tisaipeli vou, ia na sorenitei vou ga me baleta na Matanitu ni Kalou.

11. Vakamacalataka mada na vua ni Matanitu ni Kalou.

¹¹ Ena ituvaki gona oqo, na ka e vuataki e sega ni dusi ira na tisaipeli vou se itovo talei vakarisito. Me vaka ni ka e kaburaki na vosa ni Matanitu ni Kalou, kena ibalebale, na vosa vata tiko ga oya e qai vuataki sara mai vakalevu. Kena ibalebale na vua oqo e dusia na veika eda vosataka se tukuna me baleta na Matanitu ni Kalou. (Maciu 24:14) Vakacava na vuataki ni vua oqo ni Matanitu​​—⁠oya na kena kacivaki na itukutuku vinaka me baleta na Matanitu ni Kalou​​—⁠e ka beka eda na rawata kece se mani vakacava tu na ituvaki ni bula eda kunei keda kina? Io, e rawa! E vakamacalataka na vuna o Jisu ena vosa vakatautauvata tiko ga oqori.

Vakalagilagi na Kalou Nida Solia Noda Vinaka Kece

12. Rawa beka nira vuataka na lotu Vakarisito kece na vua ni Matanitu ni Kalou? Vakamacalataka.

¹² “Ko koya sa kaburaki e na vanua vinaka,” e kaya o Jisu, “sa vua, ka vuai drau eso, sa onosagavulu eso, sa tolusagavulu eso.” (Maciu 13:23) Na sorenitei kece e kaburaki ena were ena sega ni tautauvata na ka era vuataka, ni na duidui na ituvaki era tubucake kina. Ena duidui tale ga vaka kina na ka eda rawata ena kena vunautaki na itukutuku vinaka, ni sega ni tautauvata kece na keda ituvaki. E vakaraitaka o Jisu ni sega ni lecava na tikina oqo. So beka era galala cake vakalevu; so tale era kaukaua ra qai bulabula cake. O koya gona, na veika eda rawata ena rairai levu cake se lailai sobu mai na ka era rawata e so tale, ia ena marautaka ga oqori o Jiova ke da solia kina noda vinaka kece. (Kalatia 6:⁠4) Kevaka mada ga e sega ni levu soti na ka eda rawata ena cakacaka vakavunau nida sa qase sara, se tauvi keda e dua na mate bibi, ena se raici keda ga na Tamada yalololoma o Jiova meda dua vei ira na “vua tiko ga vakalevu.” Baleta? Nida solia tiko vua na noda “ka kece,” se na noda veiqaravi mai vu ni yaloda.b​​—⁠Marika 12:​43, 44; Luke 10:⁠27.

13. (a) Na cava na vuna levu duadua meda ‘vuataka’ tiko ga kina na vua ni Matanitu ni Kalou? (b) Na cava ena vukei keda meda vua tiko ga ena yalava e sega soti ni levu era dau vakarorogo kina? (Raica na kato ena tabana e 21.)

¹³ Se mani vakacava na levu ni vua ni Matanitu eda vuataka rawa, eda na “lako ka vua” tiko ga kevaka eda nanuma na vuna eda cakava tiko kina oqori. (Joni 15:16) E cavuta o Jisu na vuna levu duadua: “A ka oqo sa vakarokorokotaki kina ko Tamaqu, ni dou sa vua vakalevu.” (Joni 15:⁠8) Io, na noda cakacaka vakavunau e lagiti kina na yaca i Jiova vei ira na tamata kece ga. (Same 109:30) E kaya oqo o Honor, e dua na iVakadinadina yalodina, sa yabaki 70 vakacaca: “Ena yalava mada ga era sega ni vakarorogo kina e levu, e se ka dokai tiko ga meda matataki koya sa Cecere Sara.” Ni sa tarogi o Claudio, e dua na iVakadinadina se tekivu sara mai na 1974 nona cakacaka vagumatua, se cava e vunau tiko ga kina ena yalava era vakarorogo kina e le vica ga, e sauma ena nona cavuqaqataka na Joni 4:​34. Eda wilika kina na vosa i Jisu ni kaya: “A qau kakana me’u kitaka na loma i koya sa talai au mai; ka me’u vakaotia na nona cakacaka.” E kaya tale o Claudio: “Me vakataki Jisu, au gadreva tale ga meu vakaotia na cakacaka au sa tekivutaka rawa mai me baleta na kena kacivaki na Matanitu ni Kalou.” (Joni 17:⁠4) Era duavata kei koya na iVakadinadina i Jiova e vuravura taucoko.​​—⁠Raica na kato “Caka Vakacava Meda ‘Vua Tiko ga Kina ena Vosota’? ” ena tabana e 21.

Vunau kei na Veivakavulici

14. (a) Na inaki e rua cava e vauci ena nodrau cakacaka o Joni na Dauveipapitaiso kei Jisu? (b) O na vakamacalataka vakacava na nodra cakacaka na lotu Vakarisito nikua?

¹⁴ Na imatai ni tamata e cavuti ena Kosipeli ni kacivaka na Matanitu ni Kalou o Joni na Dauveipapitaiso. (Maciu 3:​1, 2; Luke 3:​18) Na nona inaki levu “me mai tukuna, [se, “vakadinadina,” NW] qai vakayacora oqori ena vakabauta levu kei na vakanuinui nira na “vakabauta na tamata kece ga.” (Joni 1:​6, 7, VV) E so a vunau vei ira o Joni era qai yaco e muri mera tisaipeli i Karisito. (Joni 1:​35-​37) O koya gona, a sega wale ga ni dau vunau o Joni, e vukea tale ga e so mera tisaipeli. O Jisu tale ga e dua e dau vunau, e qasenivuli tale ga. (Maciu 4:​23; 11:⁠1) Sega kina ni kurabuitaki ni a sega wale ga ni vakaroti ira nona imuri o Jisu mera vunautaka na Matanitu ni Kalou, ia mera vukei ira tale ga era ciqoma na itukutuku oqori mera nona tisaipeli. (Maciu 28:​19, 20) Na noda cakacaka gona nikua e vauci tiko kina na vunau kei na veivakavulici.

15. Ena sala cava e tautauvata kina na veika e rawati ena cakacaka vakavunau ena imatai ni senitiuri S.K. kei na kena e vakayacori nikua?

¹⁵ Vei ira na rogoci Paula ena nona vunau kei na nona veivakavulici ena imatai ni senitiuri S.K., “sa vakadinata ko ira eso na veika sa vosataki, ka so sa sega ni vakadinata.” (Cakacaka 28:24) Oqori tale ga na ka e vakilai edaidai. Ka ni rarawa ni levu na sore ni ka dina me baleta na Matanitu ni Kalou era lutu ena qele ca. Ia me vaka sa tukuna oti mai o Jisu, e so tale era lutu ena qele vinaka, era vakawakana ra qai tubu. E vuravura raraba, ena kena ivakatautauvata, e laurai tiko ena veimacawa kece ena loma ni dua na yabaki nodra sa mai tisaipeli dina i Karisito e 5,000 vakacaca! O ira na tisaipeli vou oqo era ‘vakadinata na ka e vosataki,’ dina ga ni levu tale era sega ni vakabauta. Era mai ciqoma rawa tu vakacava na itukutuku vinaka me baleta na Matanitu ni Kalou? Baleta ga nira dau veikauaitaki dina na iVakadinadina​​—⁠na nodra vakasuasuataki na sorenitei e se qai kaburaki vou e veivuke sara vakalevu. (1 Korinica 3:⁠6) Dikeva mada e rua wale ga na ivakaraitaki oqo.

Veivuke Vakalevu Noda Veikauaitaki Dina

16, 17. Na cava e bibi kina meda kauaitaki ira dina na tamata eda sotava ena cakacaka vakavunau?

¹⁶ E sikova e dua na kena marama e sega ni taleitaka na itukutuku vinaka o Karolien, e dua na iVakadinadina gone mai Belgium. A vadreti tu na liga i koya na marama oya, rau mani kaya o Karolien kei na nona itokani me rau bau veivuke mada, ia a sega ni vakadonuya. Oti tale e rua na siga, rau lesu ina vale oya, ni rau via kila ga se sa vakacava tiko o kena itaukei. “Bau veivuke vakalevu dina qo,” e kaya o Karolien. “E drukataka na marama oya ni va tu ya na levu ni neirau kauaitaki koya. E sureti keirau i loma, mani keitou vuli iVolatabu sara.”

¹⁷ O Sandi, e dua na iVakadinadina mai Mereke, e dau kauaitaki ira tale ga vakalevu na tamata e vunau vei ira. E raica ena niusiveva na tabana e volai kina na yacadra na gone era se qai sucu qai sikovi ira na itubutubu vou ena nona kauta na Noqu i Vola ni Talanoa ena i Vola Tabu.c Ni na tiko ga e vale o tinanigone qai marau me vakaraitaka na nona peipei vei nona vulagi, dau tekivu rawa sara kina na veivosaki. E kaya o Sandi: “Au dau tukuna vei ira na itubutubu ni bibi dina na wilivola vua na luvedra sucu vou mera veivolekati kina. Oti, au sa qai kauta cake mai na kena sega ni rawarawa na susu gone ena gauna oqo.” E dua na nona veisiko wale ga oqo e lai vakavuna me ratou mai qaravi Jiova e dua na tina kei na ono na luvena. De dua eda na sotava tale ga na ituvaki marautaki vaka oya ena noda cakacaka vakavunau ke da vakaliuliu da qai veikauaitaki dina.

18. (a) Na cava ena sega ni dredre kina vei keda kece meda “vua vakalevu”? (b) Na cava na tolu na ka e gadrevi vua e dua e via tisaipeli, e cavuti ena Kosipeli i Joni, o sa vakadeitaka mo na sasagataka?

¹⁸ E veivakacegui dina meda kila ni o keda kece eda rawa ni “vua vakalevu” tiko ga! Se da gone se qase, bula vinaka se tautauvimate, se da vunau ena yalava era vakarorogo kina na tamata se yalava era sega soti ni vakarorogo kina, o keda kece eda rawa ni vua tiko ga. Ena sala cava? Ena noda bulataka na vua ni yalo tabu ena kena levu eda rawata kei na noda vakatetea na itukutuku ni Matanitu ni Kalou ena kena vinaka duadua eda dui rawata. Ena gauna vata oqori, eda na tovolea meda ‘muria tiko ga na vosa i Jisu’ da qai dau “veilomani.” Io, mai na noda muria na tolu na tikina bibi e gadrevi vei ira na via tisaipeli e cavuti ena Kosipeli i Joni, eda na vakavotuya kina ni o keda eda “tisaipeli dina” i Karisito. ​​—⁠Joni 8:​31; 13:⁠35.

[iVakamacala e ra]

Railesuvi

• Na mataqali vua cava meda vuataka vakalevu?

• Na cava ena sega ni dredre kina vua e dua me “vua vakalevu”?

• Me vaka eda sa dikeva, na cava na tolu na tikina bibi e gadrevi vua e dua e via tisaipeli e cavuti ena Kosipeli i Joni?

[Kato/iYaloyalo ena tabana e 21]

CAKA VAKACAVA MEDA ‘VUA TIKO GA KINA ENA VOSOTA’?

O RAWATA vakacava mo vunautaka tiko ga na Matanitu ni Kalou ena yalava e sega soti ni levu kina na tataleitaki? Oqo e so na kena ivakamacala ena yaga sara vakalevu.

“Se mani vakacava na lomadra na tamata, eda na vosota da qai vunau tiko ga ena nuidei nida kila ni o Jisu e tokoni keda.”​​—⁠Harry, yabaki 72; papitaiso 1946.

“Dau vakayaloqaqataki au na ka e kaya na 2 Korinica 2:​17 (NW). E tukuni kina nida cakacaka vakavunau tiko ‘ena mata ni Kalou, ena noda veitomani kei Karisito.’ Niu lako tiko ena cakacaka vakavunau, erau tomani au tiko na noqu itokani vinaka duadua.”​​—⁠Claudio, yabaki 43; papitaiso ena 1974.

“Meu kaya sara vakadodonu, vei au e sega ni ka rawarawa na cakacaka vakavunau. Ia au vakadinadinataka sara ga na vosa e cavuti ena Same 18:29: ‘Ia sai koya na noqu Kalou ka’u sa ladeva kina na bai.’”​​—⁠Gerard, yabaki 79; papitaiso ena 1955.

“Keu wilika rawa ena cakacaka vakavunau e dua mada ga na tikinivolatabu, dua na ka noqu marau ni sa bau ilovi rawa ena Vosa ni Kalou na lomana e dua na tamata.”​​—⁠Elenoa, yabaki 26; papitaiso 1989.

“Duidui na iwalewale au dau vakayagataka. Au kila niu na sega ni vakayagataka rawa e levu tale na iwalewale era tu ena noqu bula sa vo.”​​—⁠Paula, yabaki 79; papitaiso 1940.

“Au sega ni dau katona na vosa mawi ena tauca beka mai o itaukeinivale. Au saga meu veivosaki ga vakayalovinaka, au tovolea tale ga meu rogoca na nona vakasama.”​​—⁠Taniela, yabaki 75; papitaiso 1946.

“Au sa sotava e so era se qai papitaiso ga era kaya vei au ni noqu vunau vei ira e dua tiko na vu ni nodra yaco mera iVakadinadina i Jiova. Au sega ni kila nira qai vuli iVolatabu e muri kei na dua tale e vukei ira mera toso vakayalo. E vakavureki dina vei au na noqu kila ni noda cakacaka vakavunau e ka eda veivuketaka kece.”​​—⁠Joana, yabaki 66; papitaiso ena 1954.

Na cava e vukei iko mo ‘vua tiko ga kina ena vosota’?​​—⁠Luke 8:​15, VV.

[iYaloyalo ena tabana e 20]

Eda vua vakalevu ena noda bulataka na vua ni yalo tabu kei na noda kacivaka na itukutuku ni Matanitu ni Kalou

[iYaloyalo ena tabana e 23]

Na cava e vakaibalebaletaka o Jisu ni a kaya vei iratou nona yapositolo me ratou “vua vakalevu”?