Porokaramu Vou ni Siga ni Soqo Lavotaki

Na usutu ni porokaramu ni soqo lavotaki ena yabaki vakacakacaka ni 2008, “O Keda na Qele​​—⁠E Tuli Keda o Jiova,” e yavutaki mai na Aisea 64:​8, (NW). Na porokaramu e yavutaki vakaivolatabu oqo, ena uqeti keda meda vakavinavinakataka nona vuku, kaukaua, lewadodonu, kei na nona loloma na Dautulituli Levu o Jiova.

Ena vosa na ivakatawa ni tabacakacaka ena ulutaga, “Veiqaravi me Vaka na Bilo Talei ena Cakacaka Vakavunau.” Ena rogoci kina na kena sa qai tubu tiko ga na kedra iwiliwili na tamata era marautaka tiko na veivakalougatataki ni nodra sa mai kila na ka dina, vaka kina na nodra wasea yani vei ira e so tale. Na ivunau “Ena Taqomaki Iko Nomu Dau Vakasamataka Vakatitobu na Ka” ena vakaraitaka na yaga ni noda dau vakasamataka vakabibi na yavu ni ivakavuvuli i Jiova me itataqomaki vei keda. Na mata mai na valenitabana ena vosa ena ulutaga “Kua ni ‘Vakaitovotaki Iko ena iTovo ni Vuravura Oqo’ ” kei na “Ciqoma Nona Veituberi na Dautulituli Levu.” Era na vakayaloqaqataki na itubutubu kei na gone ena ulutaga “iTabagone Era Yaga Vei Jiova” kei na “Bibi Nodra iTavi ni Veituberi na iTubutubu.” Eda na marautaka tale ga noda rogoca na veika era sa rawata tiko na tacida ena cakacaka vakavunau, nida raica na kena vakatasuasuataki vaka kina na veitarotarogi. O ira era gadreva mera papitaiso mera tukuna vua na ivakatawa daulewa ena nodra ivavakoso ena kena gauna totolo duadua. Nanuma mo ni kauta tiko mai na ilavelave ni Vale ni Vakatawa ena vulici tiko ena macawa ni siga ni soqo lavotaki.

Na ka kece e nakita na Dautulituli Levu ena yaco ga. Ia, ena vakatau vei keda yadua na noda ciqoma na nona veidusimaki. O ira na muria na ivakatagedegede i Jiova ra qai cakava e so na veiveisau ena nodra bula, era vaka e dua na tikiniqele ena ligai koya na dautulituli e bulia tiko vakamatau me yacova sara ni dua na bilo talei. Nida tokoni Jiova eda sa vakacerecerea tiko na dodonu ni nona veiliutaki, eda na vakalougatataki tale ga kina.