Porokaramu ni Siga ni Soqo Lavotaki ni 2010

1. (a) Na usutu vakaivolatabu cava era vakamacalataki ena soqo siga dua ena veiyabaki sa oti? (b) E dua beka na tikina a vakabibitaki ena soqo siga dua sa ra vakayacori oti e yaga ena nomu cakacaka vakaitalatala?

¹ “Digitaka na Veika e Uasivi Sara,” “Tu Dei Me Vaka e Dua na Qelenisipi,” “Dau Tukuna na Ka Dina,” ‘O Keda na Qele​​—⁠E Tuli Keda o Jiova.’ (Fpai. 1:​9, 10, VV, 27; Joni 18:37; Aisea 64:⁠8) Qori e vica na usutu a veivosakitaki ena so na soqo siga dua era sa vakayacori oti. Vakacava na kena ena vakayacori ena yabaki vakacakacaka ni 2010, o nanamaki mo na tiko kina? E kena usutu na ka e vakamacalataki ena 1 Korinica 7:​29: “Sa Vakalekalekataki na Gauna sa Vo.”

2. Eda na nanamaki tiko ga vakacava ina soqo siga dua e tarava?

² Ena gauna ga sa kacivaki kina na tikinisiga ni noda soqo siga dua, meda veivosakitaka sara na porokaramu me rawa nida nanamaki tiko ga kina. Era vakanamata tale ga na gone nira dau veiuqeti nodra itubutubu mera vola ena ivolanivula vakavuvale na tikinisiga, ra vola tale ga na veika era vinakata, oti ra qai wilika tiko e vica na siga sa vo me yacova sara na siga ni soqo. De dua o na vinakata mo dou veivosakitaka ena nomudou Sokalou Vakavuvale na veika dou a vakavola ena soqo siga dua sa ra vakayacori oti. Ena rawa tale ga mo vagolea na lomamu ena soqo qo ke o wilika tale na ivola Me Yaga Nomu Curu ena Koronivuli ni Vuli Vunau, tabana e 13-​16, ena yaga vei kemudou vakavuvale mo dou ‘qarauna nomudou vakarorogo.’​​—⁠Luke 8:​18.

3. Na cava meda cakava me yaga kina na ka ena talaucaki ena soqo siga dua?

³ Bulataka na Ka Eda Rogoca: E dau rogoci vakalevu ni vakayacori oti e dua na soqo siga dua, “Sa totoka dina na porokaramu!” E dina kece ya, qo e dua na isolisoli e vakavutuniyautaki keda kina o Jiova. (Vkai. 10:22) Me vua na ka eda rogoca, e dodonu meda dau vakasamataka vakatitobu da qai dei kina. (Luke 8:​15) Nida lesu tiko vakavuvale ni oti na soqo se so tale eda lako vata tiko, ena vinaka meda veivosakitaka na porokaramu. E rawa nida veivosakitaka na noda isausau yadua kei na veitikina bibi ena yaga ena noda cakacaka vakaitalatala. Nida cakava ya, na ka eda rogoca ena yaga vei keda ena dua na gauna balavu.​​—⁠Jeme. 1:​25.

4. Na cava e lavotaki kina na soqo siga dua e tarava?

⁴ Ni soli vei keda e dua na iloloma e yaga, sa dua na ka noda marau. Eda nanamaki beka ina veika e vakarautaka tu o Jiova me baleti keda ena soqo siga dua e tarava? Eda kila ni na yaga na veika qori ena basoga ni noda bula kece. Eda vakanamata ina nona veivakayaloqaqataki kei na veivakavulici na Tamada vakalomalagi o Jiova, me rawa nida cakava na itavi e lesia vei keda, ya na iloloma e yaga dina.​​—⁠2 Tim. 4:2; Jeme. 1:​17.