Vukei Ira na Dravudravua
1 Dua na ka nona dau kauaitaki ira na dravudravua o Jisu. A vakarautaka vakacakamana e so na veivuke qai vakabulai ira na tauvimate, ia e dau vakaliuca tu ga na vunautaki ni “[i]tukutuku-vinaka” vei ira na dravudravua. (Maciu 11:5) Na cakacaka vakavunau tale ga nikua e sa yaga tiko vei ira na dravudravua kei na so tale.—Maciu 24:14; 28:19, 20, VV.
2 Nuinui Dina: O ira na italatala ni lotu ni Veivanua Vakarisito nikua era dau yalataka vei ira na dravudravua nira na vutuniyau ke ra dau soli vakalevu e valenilotu. Ia na iVolatabu e tukuna ni Matanitu ga ni Kalou ena mai walia vakadua na bula dravudravua kei na leqa kece eda sotava tu na kawatamata. (Same 9:18; 145:16; Aisea 65:21-23) Noda vakaraitaka vei ira na dravudravua na ka sara ga e kaya na iVolatabu, eda sa wasea tiko vei ira na inuinui dina, da qai vakaceguya tale ga nodra gagadre vakayalo.—Maciu 5:3, NW.
3 O ira na Farisi ena gauna i Jisu era dau raici ira sobu na dravudravua, ra dau kacivi ira ena iru ni veibeci na ‘am-ha·’aʹrets, se “kawa ni qele.” Ia o Jisu e raica na nodra “dra” se nodra bula me “ka talei.” (Same 72:13, 14) Rawa tale ga nida vakatotomuri Jisu ena noda “dokai” ira na dravudravua ena noda kauaitaka sara ga na leqa era sotava tiko. (Vkai. 14:31) Meda kua gona ni vosa beci ira na vakaitikotiko ena vanua era tu kina na dravudravua, se meda vuturitaka na vunau vei ira. Ni levu sara ga vei ira na dravudravua era dau rogoca na itukutuku vinaka.
4 Vukei Ira: Noda vakavulica na yavu ni ivakavuvuli ena iVolatabu vei ira na dravudravua era tu ena noda yalava, ena rawa ni vukei ira. Kena ivakaraitaki, e vakacala na iVolatabu na mateni, veimauilavo, vucesa, na vakatavako, kei na levu tale na ka e dau vakavuna na dravudravua. (Vkai. 6:10, 11; 23:21; 2 Kor. 7:1; Efeso 5:5) E vakavulici keda na iVolatabu meda daudina, da qai cakava mai ‘vu ni lomada’ noda cakacaka—itovo e vinakati tu vei ira na tamata cakacaka. (Kolo. 3:22, 23; Iper. 13:18) E laurai ena dua na vakadidike ni levu na itaukei ni cakacaka era dau qarai ira ga na tamata cakacaka era daudina ra qai yalodina—itovo era taleitaka.
5 E kauaitaka o Jiova na ka era sotava tiko na dravudravua. Ia, sa voleka sara na gauna me na vakabulai ira kina na ‘dravudravua era sa tagi’ o Jisu. (Same 72:12) Nida se waraka tiko na kena yaco oqori, e noda itavi dokai meda wasea yani na itukutuku veivakacegui mai na iVolatabu vei ira na dravudravua kei na so tale.