“Dou Muria na We ni Yavana”
1. Rawa vakacava nida maqosa ena veivakavulici?
1 Dina ni a sega ni vuli ena nodra koronivuli na rapai o Jisu, ia e qasenivuli levu ena itukutuku ni veigauna. Eda marau ni a volatukutukutaki tu na ka a mai cakava meda vuli kina. E bibi meda “muria na we ni yavana” me rawa nida maqosa ena veivakavulici.—1 Pita 2:21.
2. Na cava ena uqeti keda meda bucina na loloma a vakaraitaka o Jisu?
2 Lomani Ira;:E uqeti Jisu nona lomani ira dina na tamata. (Mari. 6:30-34) Levu era tu ena noda yalava era “rarawa” ra qai gadreva tu na ka dina. (Roma 8:22) Noda raica na ituvaki vakaloloma era tu kina kei na noda kila ni kauaitaki ira o Jiova, ena uqeti keda meda gumatua na vunau. (2 Pita 3:9) Era na kauaitaka tale ga na itukutuku eda kauta tiko yani ke ra raica nida kauaitaki ira dina.
3. Gauna cava e dau vunau kina o Jisu?
3 Vosa ena Gauna Veiganiti Kece: A vakayagataka vinaka o Jisu na gauna veiganiti kece me vunautaka na itukutuku vinaka. (Maciu 4:23; 9:9; Joni 4:7-10) Meda va tale ga oya ena noda vakarautaki keda vinaka meda wasea na ka dina nida cakava tiko na ka eda dau cakava e veisiga. So era dau kauta tu nodra iVolatabu kei na so na ivola mera vunau e valenicakacaka, e koronivuli, nira gole tiko ena dua na vanua, lai volivoli, kei na so tale.
4. Rawa vakacava ni usutu ni noda vunau na Matanitu ni Kalou?
4 Liu Tiko ga na Matanitu ni Kalou: Na usutu ni nona vunau o Jisu na kena kacivaki na itukutuku vinaka ni Matanitu ni Kalou. (Luke 4:43) Dina ga ni so na gauna eda sega ni cavuta na Matanitu ni Kalou ena gauna eda vakamacala kina vei itaukeinivale, ia eda kila ni qo na ka meda vukei ira kina mera raica na kena bibi. Eda na rairai vakamacalataka ni ka ca e sa yaco tu qo e vakaraitaka nida sa bula tu ena iotioti ni veisiga, ia meda nanuma tiko ni ka bibi duadua noda kacivaka “nai tukutuku vinaka ni veika vinaka.”—Roma 10:15.
5. Meda vakayagataka vakacava na iVolatabu me laulau kina noda cakacaka vakavunau?
5 Nuitaka na Vosa ni Kalou: Dau vakayagataka o Jisu na iVolatabu me tokona na ka e vakatavulica. E sega ni cakava e dua na ka ena nona kaukaua ga. (Joni 7:16, 18) E ka bibi sara ga ena nona bula na Vosa ni Kalou, qai vakayagataka ena gauna e temaki koya kina o Setani. (Maciu 4:1-4) Me rawa tale ga ni laulau noda veivakavulici, e dodonu meda wilika e veisiga na iVolatabu da qai dikevi keda kina. (Roma 2:21) Meda cavuta na tikinivolatabu meda sauma kina nodra taro na itaukeinivale, da qai wilika sara ke gadrevi meda cakava vaka kina. Eda vinakata mera kila na itaukeinivale nida sega ni tukuna tiko noda nanuma ga, ia na ka sara ga e tukuna na Kalou mai na nona Vosa.
6. Na cava e cakava o Jisu me tara kina na lomadra na vakarorogo?
6 Tara na Loma ni Tamata: “E sega e dua na tamata sa vosa me vaka na tamata oqo.” (Joni 7:46) Qo na ka era kaya na ovisa vei ira na bete levu kei ira na Farisi ena vuku ni nodra a sega ni vesuki Jisu mai. E sega ni dau tukuna wale ga na ka dina o Jisu, na ka e vakavulica e tara sara ga na loma ni tamata. (Luke 24:32) E dau vakayagataka ena nona vosa vakatautauvata na ka e dau yaco e veisiga me rawa ni kilai na ibalebale ni ka e tukuna tiko. (Maciu 13:34) E sega tale ga ni tukuna na ka mera sega ni taqea rawa na vakarorogo. (Joni 16:12) E dau vakaliuci Jiova tu ga, sega ni vakaliuci koya. Rawa tale ga nida qasenivuli vinaka me vakataki Jisu ke da dau kauaitaka na ka eda ‘vakavulica.’—1 Tim. 4:16.
7. Na cava e dei tu ga kina ena cakacaka vakavunau o Jisu?
7 Dei Tu ga Dina ni Tusaqati: Dina ga ni levu na cakacaka mana a mai cakava o Jisu, ia e levu era sega ni vakabauti koya. (Luke 10:13) O iratou mada ga na wekana eratou a nanuma ni “sa lialia.” (Mari. 3:21) Ia e dei tu ga o Jisu. E donu tu ga na nona rai baleta ni kila na itukutuku dina e wasea tiko e rawa ni sereki ira se vakabulai ira na rogoca. (Joni 8:32) Io, na veivuke ga i Jiova eda na dei tiko kina, da na sega ni datuvu.—2 Kor. 4:1.
8, 9. Eda na vakadamurimuri Jisu vakacava nida vakuai keda meda kacivaka na itukutuku vinaka?
8 Vakuai Keda Meda Vakaitavi Vakalevu: A vakuai koya mai na iyau vakayago o Jisu me vakaliuca na cakacaka vakavunau. (Maciu 8:20) E gumatua na vunau, so na gauna e dau lai yaco sara ni sa kala na siga. (Mari. 6:35, 36) E kila o Jisu ni yalani ga na gauna me vakayacora kina na cakacaka a talai mai kina. Ni “sa vakalekalekataki na gauna,” e dodonu meda solia sara ga noda gauna, kaukaua, kei na ka e tu vei keda meda vakadamurimuria kina na cakacaka a mai cakava o Jisu.—1 Kor. 7:29-31.
9 Era maqosa ena veivakavulici na lotu vaKarisito ena imatai ni senitiuri baleta nira vuli sara ga vei Jisu. (Caka. 4:13) Rawa tale ga nida vakayacora vinaka na cakacaka qo ke da vakadamurimuria na qasenivuli levu o Jisu.—2 Tim. 4:5.