Laulau na Veisikovi Lesu Nida Vakavakarau
1. Ena vakarabailevutaki vakacava na nodra veivakatisaipelitaki na lotu vaKarisito taumada?
1 A vakarautaki ratou vinaka nona tisaipeli o Jisu me laulau kina nodratou “vunautaka nai tukutuku-vinaka ni matanitu.” (Maciu 4:23; 9:35) E vakayacora qo ena nodratou se tiko voli ga e Palesitaina. Ni bera ni lesu tale i lomalagi, e vakaraitaka o Jisu ni na rabailevu na cakacaka vakavunau me rawa nira ‘qisi [na tamata] mera nona tisaipeli.’—Maciu 28:19, 20, VV.
2. Na cava ena gadrevi me caka nida talairawarawa ena ivakaro i Jisu meda caka “tisaipeli”?
2 Ena gadrevi ena cakacaka qo na nodra sikovi lesu na taleitaka na itukutuku vinaka ni Matanitu ni Kalou kei na nodra vakavulici ena veika kece ga e vakarota o Karisito. Me laulau na veisikovi lesu, ena vinakati meda vakavakarau vinaka.
3. Ena vakayacori vakacava na veisikovi lesu?
3 Vakavakarau: E vuqa na dautukutuku era dau taroga toka e dua na taro ni oti ga na imatai ni veisiko, ra qai yalataka mera na lai sauma ena dua tale na siga. Era raica ni tekivutaki rawa na vuli iVolatabu ena nodra veitalanoataka e so na tikina mai na ivola Kaya na iVolatabu.
4. Cava na vuna meda kua ni waraka sara kina na ilavelave vou ni Vale ni Vakatawa nida veisikovi lesu?
4 Sega ni gadrevi meda waraka sara na itabataba vou ni Vale ni Vakatawa meda qai lai veisikovi lesu. Rairai eda na rawa ni uqeta na tataleitaki ena noda veivosakitaka ga na ilavelave sa tu rawa vei ira na itaukeinivale.
5. Na cava na kena yaga me tiko na nomu inaki ni o veisikovi lesu?
5 Tiko Nomu iNaki: Ni bera ni o lesu, railesuva na ka drau a veivosakitaka qai kila deivaki se cava sara mada e nomu inaki. Kena ivakaraitaki, ni o sa lesu tale, veitalanoataka e dua na tikina mai na ivola o a biuta tu e liu. Se, laiva toka mai e dua tale na ivola e lewena na ivakamacala e via tautauvata ga kei na kena drau a veitalanoataka ena imatai ni nomu veisiko. Ke o laiva toka e dua na taro ena imatai ni gauna, sega ni vakabekataki ni o na via sauma sara ga. Ni o cavuta e dua na tikinivolatabu, me nomu inaki mo na wilika sara ga mai na iVolatabu.
6. Na cava me noda isausau nida veisikovi lesu?
6 Noda iSausau: Me noda isausau meda caka vuli iVolatabu. A sureta e dua na turaga me vuli iVolatabu e dua na tacida ni veisikovi lesu, ia a sega ni taleitaka na turaga ya. Sa qai lesu tale na tacida qo ni kauta Na Vale ni Vakatawa vou qai kaya, “Ni keimami se tiko qo, keimami sauma tiko e dua na taro vakaivolatabu vei ira na tamata ena siga nikua.” Mani vakarogoca sara na nona ivakamacala na turaga ya, qai wilika vua e dua na tikinivolatabu kei na parakaravu veiganiti mai na dua na ivola e dau vakayagataki me caka kina na vuli iVolatabu. E lai vakavuna qo me tomana tiko ga nona vuli iVolatabu na turaga ya.
7. E yaga vakacava na vakavakarau vinaka meda tekivutaka kina e dua na vuli iVolatabu?
7 E yaga dina na vakavakarau vinaka nida veisikovi lesu. Eda na kunea kina na marau, ena ka dokai tale ga nida tubera e dua “sa vakarau tu” me rawata na bula tawamudu.—Caka. 13:48.