Ka Meda Cakava Mera Vuli iVolatabu Kina na Dau Taura na iVoladraudrau
1. Na cava noda isausau ni soli ivoladraudrau?
1 Eda dau veisoliyaka vakalevu ena siga Vakarauwai Na Vale ni Vakatawa kei na Awake! Ia oqo na imatai ga ni kalawa meda vakatakila kina na ka dina vei ira na tamata yalomalumalumu. Oqo e so na vakatutu ni kena soli na ivola Kaya na iVolatabu ena veisikovi lesu me tekivu sara kina na vuli iVolatabu. Rawa nida veiveisautaka na vakatutu oqo me ganita noda dui yalava, da qai tukuna ena noda vosa ga. E rawa nida vakayagataka e dua tale na vakatutu eda kila ni na laulau.
2. Rawa vakacava nida vakayagataka na tabana 4-6 ni ivola Kaya na iVolatabu meda tekivutaka kina na vuli iVolatabu?
2 Vakayagataka na iMatai ni Vica na Tabana: Oqo e dua na vakatutu e rawa nida tukuna nida veisikovi lesu: “Na ivoladraudrau au biuta toka vei kemuni e vakabibitaka na iVolatabu. Ni rogoca mada se cava e bibi kina na wili iVolatabu.” Wilika na Aisea 48:17, 18; Joni 17:3; se dua tale na tikinivolatabu veiganiti. Ni o sa vakaraitaka oti vei itaukeinivale na ivola Kaya na iVolatabu, o rawa ni tomana:
◼ “E tukuni tu ena iVolatabu na inuinui vinaka me baleta na veigauna e se bera mai.” Vakaraitaka sara vei itaukeinivale na tabana 4-5 qai taroga, “Na vosa ni yalayala cava e tabaki tu oqo o vinakata sara ga me vakayacori?” Vakamuai koya sara ena wase e vakamacalataki kina na yalayala oqori, drau qai veivosakitaka e dua se rua na parakaravu ke vakadonuya o itaukeinivale.
◼ Se rawa ni o kaya, “Na iVolatabu e sauma na taro bibi ena noda bula.” Cega sara vei itaukeinivale na tabana 6 qai taroga se dau vaqaqa tu beka na taro era tu ena ruku ni tabana oqori. Cega sara na wase ena sauma na taro e sa digia o itaukeinivale, qai veivosakitaka e dua se rua na kena parakaravu.
◼ Se o rawa ni vakaraitaka na ulutaga ena lewenivola qai taroga na wase e vinakata me veivosakitaki. Cega na wase oqori, qai vakaraitaka vakalekaleka vua na icakacaka ni vuli.
3. Eda na tekivutaka vakacava na vuli iVolatabu nida solia na ivoladraudrau me baleta (a) na ituvaki torosobu kei vuravura? (b) na vuvale? (c) na dina ni iVolatabu?
3 Bera ni O Biubiu, Taro: Dua tale na iwalewale, oya meda kotora e dua na yavu ni veisiko e tarava. Ni sa taura na ivoladraudrau o itaukeinivale, taroga e dua na taro qai yalataka mo na sauma ena veisiko e tarava. Meda vakadeitaka na gauna eda na sikovi ira kina, da qai dina kina. (Maciu 5:37) Nida sa lesuvi ira, da taroga tale vei itaukeinivale na taro eda a taroga ena imatai ni noda veisiko, da wilika qai vakamacalataka na kena isau mai na ivola Kaya na iVolatabu. Solia e dua na nona ivola me rawa ni vakamuri keda tiko. Oqo e so na kena ivakaraitaki:
◼ Ke o solia na ivoladraudrau me baleta na ituvaki torosobu kei vuravura, o rawa ni kaya, “Daru qai veivosakitaka ena noqu veisiko e tarava na isau vakaivolatabu ni taro oqo, Na veisau cava ena vakayacora na Kalou e vuravura?” Vakayagataka na tabana 4-5 ni o veisikovi lesu. Se o rawa ni taroga, “E inaki beka ni Kalou na kena dau yaco na leqa tubukoso?” Ni o sikovi koya, cega na parakaravu 7-8 ni wase 1.
◼ Ke o solia na ivoladraudrau me baleta na vuvale, o rawa ni taroga, “Na cava e rawa ni cakava na lewe ni vuvale yadua me vakilai kina na bula marau ena vuvale?” Ni o sikovi koya lesu, veivosakitaka na parakaravu 4 ni wase 14.
◼ Ke o solia na ivoladraudrau me baleta na dina ni iVolatabu, rawa ni o taroga me yavu ni nomu veisiko e tarava, “E donu vinaka beka vakasaenisi na veika e cavuti ena iVolatabu?” Ni o sa sikovi koya, veivosakitaka na parakaravu 8 ni wase 2.
4. Na cava meda cakava ke sega ni taura na ivola Kaya na iVolatabu o itaukeinivale?
4 Ni voleka ni oti na nomudrau veivosaki, taroga e dua tale na taro me saumi ena veisiko e tarava. Ni sa vakadeitaki na nona vuli, drau tekivu tale mai ena imatai ni wase ni ivola Kaya na iVolatabu. Ia vakacava ke sega ni taura na ivola na itaukeinivale? E se rawa tiko ga ni o kauta vua na ivoladraudrau vovou kece, drau qai tomana tiko ga nomudrau veitalanoa vakaivolatabu. Ni toso na gauna e rawa ni qai vinakata tale ga me vulica na iVolatabu.
5. Na cava na noda inaki levu ni soli ivoladraudrau?
5 Rawa gona ni uqeti ira e so tale Na Vale ni Vakatawa kei na Awake! mera vulica kina na ka dina mai na iVolatabu. Meda saga gona vagumatua meda tekivuna e dua na vuli iVolatabu vei ira na dau taura noda ivoladraudrau. Nida cakava oqo eda sa muria tiko kina na ivakaro i Jisu meda ‘caka tisaipeli . . . da qai veivakavulici.’—Maciu 28:19, 20, VV.