Rawa ni o Dua na Qasenivuli!
1. Na itavi dokai cava e vakacolati vei keda na dautukutuku ni Matanitu?
1 Dua na taba ni cakacaka vakaitalatala e vakavu marau vakalevu na noda vakavulica e dua ena ka dina. Noda raica nona taleitaka na itukutuku ni Matanitu ni Kalou kei na noda vukea me toro voleka vua na Turaga cecere ni lomalagi kei na vuravura, e dua na ka meda mareqeta. (Jeme. 4:8) Meda saga kece na dautukutuku ni Matanitu ni Kalou meda vakavulica e dua e via kana vakayalo da qai raica na veisau levu e cakava ena nona bula, nona ivakarau ni rai kei na itovo.—Maciu 28:19, 20, VV.
2. Na cava era lomalomarua kina e so ena caka vuli iVolatabu, era na walia vakacava na leqa qo?
2 Vakararavi Vei Jiova: Ena veigauna sa oti, era nanuma na tamata yalodina nira sega ni rawa ni cakava na itavi e lesi ira kina o Jiova. Ia nira vakararavi vei Jiova, a rawa vei Mosese, Jeremaia, Emosi, kei ira e so tale na tamata tauvanua mera valuta na nodra vakatitiqa se tawa nuidei ra qai vakayacora na cakacaka bibi duadua. (Lako 4:10-12; Jere. 1:6, 7; Emosi 7:14, 15) A “doudou” tale ga na yapositolo o Paula. A rawata vakacava? E kaya ena “vuku ni neitou Kalou.” (1 Ces. 2:2) Io, meda nuitaki Jiova me vukei, vakavukui, qai vakaukauataki keda ena noda veivakavulici ena iVolatabu.—Aisea 41:10; 1 Kor. 1:26, 27; 1 Pita 4:11.
3, 4. Na porokaramu cava ni vuli e yaga ena noda vakavulica na Vosa ni Kalou?
3 Ciqoma na Veivakavulici: O Jiova na noda Dauveivakavulici Levu e tuvanaka e dua na porokaramu ni veivakavulici vakayalo me rawa nida qasenivuli maqosa. (Aisea 54:13; 2 Tim. 3:16, 17) Meda vakayagataka vinaka sara na ituvatuva qo me toro cake kina noda kila na iVolatabu kei na noda vakavinakataka tiko ga na iwalewale ni noda vakavulica na ka dina vakaivolatabu. Qo sara ga na inaki ni Koronivuli ni Vuli Vunau kei na Soqoni ni Cakacaka. Ia eda vakavulici ena soqoni kece ni ivavakoso meda veivakavulici ena Vosa ni Kalou.
4 Saga mo kila e so na iwalewale rawarawa ga mo vakavulica kina na ka dina titobu vakayalo. E vakamacalataki ena ivola Vuli Vunau, tabana e 227: “E dodonu me matata mada vei iko na ka o na vakamacalataka ke o vinakata me lai matata vei ira na rogoci iko.” Ena dei ena noda vakasama na veitikina bibi ena yaga ena dua na gauna emuri ke da dau vakamacala ena gauna ni soqoni. O koya gona, ni o vakavakarau vinaka, o na nuidei ni na vinaka cake tiko ga na iwalewale ni nomu veivakavulici.
5. Na veivakavulici cava tale e vakarautaki ena ivavakoso ena yaga meda dua na qasenivuli maqosa?
5 E laurai ena itekivu ni ulutaga qo nira veivukei na italatala lotu vaKarisito ena nodra cakacaka vata ena veivakatisaipelitaki. (Luke 10:1) Ke rawa, saga mo lako ena Vuli iVolatabu kei ira na dautukutuku matua, okati kina o ira na painia, qase ni ivavakoso, kei na ivakatawa dauveilakoyaki. Vakasamataka na sala era vakayagataka kina na iyaloyalo, vosa vakatautauvata rawarawa kei na so tale na iwalewale ena noda ivola ni vuli nira vakamacalataka na ka dina ena iVolatabu. Rawa ni o tarogi ira ena ka mo cakava mo dua kina na qasenivuli maqosa. (Vkai. 1:5; 27:17) Vakavinavinakataka na veivakavulici kece qori ni vu mai vua na Kalou.—2 Kor. 3:5.
6. Meda qasenivuli ni Vosa ni Kalou, na cava meda cakava?
6 Mo vakararavi vei Jiova, me yaga vei iko na veivakavulici e vakarautaka. Masulaka na nomu toso vakayalo. (Same 25:4, 5) O na vakila tale ga na marau ni o vakavulica e dua me qasenivuli ni Vosa ni Kalou me vakataki iko ga!