E Vakavulici Keda o Jiova Meda Vunau
1. Na cava tale e cakava o Jiova ena itavi e lesia vei keda?
1 Ni lesia vei keda o Jiova e dua na itavi, e vakavulici keda tale ga ena ka meda cakava. Me kena ivakaraitaki, gauna a tukuna kina vei Noa me taya e dua na waqa, na ka se sega vakadua ni cakava ena nona bula, a tukuna tale ga vua o Jiova na kena itata. (Vkte. 6:14-16) Ni lesi na ivakatawa ni sipi yalomalumalumu o Mosese me vosa vei ira na qase ni Isireli kei Fero, a vakadeitaka vua o Jiova: “Ka’u na tiko kei na gusumu, ka vakavulici iko e na ka mo kaya.” (Lako 4:12) Nida lesi gona meda vunautaka na itukutuku vinaka, e vakavulici keda tale ga o Jiova ena iwalewale meda vunau kina. E vakavulici keda ena Koronivuli ni Vuli Vunau kei na Soqoni ni Cakacaka. Ena yaga vakacava vei keda na veivakavulici qori?
2. Na cava mo cakava me yaga kina vei iko na Koronivuli ni Vuli Vunau?
2 Koronivuli ni Vuli Vunau: Mo vakarautaka e liu na ulutaga ena rogoci ena koronivuli ni bera ni o lako ena soqoni. Ni o rogoca na sala e vakamacalataka kina e dua na gonevuli na usutu e vosa kina, ena vagatara sara na iwalewale ni nomu veivakavulici. (Vkai. 27:17) Dau kauta mai ena soqoni na nomu ivola Vuli Vunau, o rawa ni volavola tale ga kina. Ni oti e dua na itavi ena vakamacala vakalekaleka o ivakatawa ni koronivuli ni vakayagataka na ivola Vuli Vunau, toqarukutaka eso na tikina bibi o na via vakayagataka, vola na tikina yaga ena vanua lala ena tutu ni nomu ivola. Ena yaga sara vakalevu vei iko na koronivuli ke o vakaitavi kina. O sa curu ena koronivuli? Ni o lesi ena dua na itavi, vakavakarau vinaka qai cakacaka ena tikina o vakasalataki kina. Vakayagataka sara na ka o vulica ena cakacaka vakaitalatala.
3. Na cava meda cakava me yaga kina vei keda na Soqoni ni Cakacaka?
3 Soqoni ni Cakacaka: Ena kasa vei keda na vakatutu ena soqoni qo, ke da wilika rawa na ivola ena veivosakitaki da qai vakavakarau meda saumitaro. E levu tale era na vakaitavi ke lekaleka ga na noda ivakamacala. Vakarogoca vinaka na vakatasuasua qai vakayagataka eso na tikina o nanuma ni na laulau ena nomu cakacaka vakaitalatala. Maroroya eso na ulutaga ena Noda Cakacaka Vakaitalatala ena yaga ena cakacaka vakavunau.
4. Na cava meda vakararavi kina vua na noda Qasenivuli Lagilagi?
4 A sega ni rawarawa na nodrau ilesilesi o Noa kei Mosese, e va tale ga qori na noda ilesilesi meda vunautaka na itukutuku vinaka e veiyasa i vuravura. (Maciu 24:14) Ia ke da vakararavi vua na noda Qasenivuli Lagilagi o Jiova da qai vakayagataka na veika e vakavulici keda kina, ena vuavuaivinaka na noda sasaga.—Aisea 30:20, NW.