Era duavata qai vakila na vakacegu na veika buli kece ni veiliutaki na Kalou

Cava Eda Vinakata Kina na Matanitu ni Kalou?

Ena itekitekivu ni bula ni kawatamata e dua ga na noda iLiuliu, oya na Dauveibuli o Jiova. E vakaraitaka na loloma ena nona veiliutaki. Kena ivakaraitaki, e tara e dua na were totoka o Iteni me bula kina na kawatamata, e vakarautaka tale ga vei ira e levu na kakana. Kuria ya, e lesia tale ga vei ira e dua na itavi mera qarava. (Vakatekivu 1:28, 29; 2:8, 15) Era na vakila na kawatamata na vakacegu, ke ra talairawarawa ena nona veiliutaki vakayalololoma na Kalou.

Taura tu o Atama na vuanikau vakatabui e solia vua o Ivi. — Rau cata na imatai ni tamata me nodrau iLiuliu na Kalou

E kaya na iVolatabu ni vakalewa nona veiliutaki na Kalou e dua na agilosi talaidredre, e qai vakatokai me o Setani na Tevoro. E kaya nira na marau na kawatamata ke ra sega ni muria na veidusimaki ni Kalou kei na nona veiliutaki. Ka ni rarawa ni rau rogoca na imatai ni noda itubutubu o Atama kei Ivi na ka e tukuna o Setani, rau talaidredre tale ga ena veiliutaki ni Kalou.—Vakatekivu 3:1-6; Vakatakila 12:9.

Ena vuku ni nodrau talaidredre o Atama kei Ivi ena veiliutaki ni Kalou, rau sa sega ni bula ena Parataisi, rau sega tale ga ni bula tawamudu. (Vakatekivu 3:17-19) Era vakaleqai tale ga na luvedrau ena nodrau vakatulewa. Nona ivalavala ca gona o Atama, e kaya kina na iVolatabu ni “curu kina e vuravura na ivalavala ca, kei na mate ena vuku ni ivalavala ca.” (Roma 5:12) Na ivalavala ca qori e vakavuna e dua tale na leqa: ‘Ni veiliutaki na tamata e tini ga ina leqa.’ (Dauvunau 8:9) Kena ibalebale, ena yaco ga na leqa ke ra liutaki ira ga na tamata.

TEKIVU NA VEILIUTAKI VAKATAMATA

Duri tu ena dokadoka o Nimiroti, e dakuna era tara vale tiko kina eso. — Talaidredre o Nimiroti vei Jiova

E tukuna na iVolatabu na imatai ni tamata me veiliutaki o Nimiroti, e qai talaidredre ina veiliutaki i Jiova. Me tekivu ena gauna e veiliutaki kina o Nimiroti, era vakayagataka cala na iliuliu nodra itutu vakaveiliutaki. E kaya kina o Tui Solomoni ena 3,000 na yabaki sa oti: “Au raica na wainimatadra na vakasaurarataki ia e sega ni dua me vakacegui ira. E tu na kaukaua vei ira na vakasaurarataki ira.”—Dauvunau 4:1.

E va tale ga qori nikua. Kena ivakaraitaki ena 2009, e kaya e dua na ivola ni Matabose kei Vuravura, ni “dua na ka e vakavuna tiko na veika ca ena noda itikotiko,” oya na ca ni veiliutaki.

YAVALA NA KALOU!

E vinakati gona e vuravura eso na iliuliu vinaka kei na matanitu e vinaka cake na kena veiliutaki. Qori sara ga na ka e yalataka tu na Dauveibuli!

iYaloyalo: iTinitini ni veiliutaki na matanitu vakatamata. 1. Dabe tiko e dua na yalewa ni Esia ena tolonisala duka, qai keveti luvena e tagi tiko. 2. Davo tu e dua na turaga e valenibula. 3. Vanavana tiko na sotia ena buca ni valu. 4. Era kaikaila ra qai taura tu na drotini o ira na vakaduiduile. 5. Rau duri tu na veitinani ena taudaku ni nodrau vale, rau raica ni sa kavoro tu na iloilo ni nodrau katuba ni vale. 6. Laurai ena dua na siti ni kumukumuni tu na kubou me vaka na o ena vale ni buli iyaya, kei na wa ni livaliva. — O ira mada ga na matanitu vinaka era sega ni walia rawa tiko noda leqa

Sa vakarautaka na Kalou e dua na Matanitu me sosomitaka na veiliutaki vakatamata, qai dei “tu ga me tawamudu.” (Taniela 2:44) Qori na Matanitu era masulaka tiko e vica vata na milioni na lewenivanua. (Maciu 6:9, 10) Ena sega ni veiliutaki duadua ga na Kalou ena matanitu qori. Ia sa lesia na kena iLiuliu e dua a bula tale ga e vuravura. O cei gona e lesia na Kalou?