Vakavakarau Vinaka Sara ina iVakananumi

E ka marautaki vei keda na imuri i Karisito, ka dokai tale ga meda vakavakarau vinaka sara ina iVakananumi ni nona mate o Jisu Karisito! (Luke 22:19) Na cava me caka nida vakavakarau ina iVakananumi?

◼ Gauna kei na Vanua: Me kilai vakamatata na gauna kei na vanua ena caka kina na iVakananumi. Ke vica na ivavakoso era vakayagataka na Kingdom Hall, e bibi meda yaco totolo yani, meda kua ni veibilibili nida sa biubiu baleta ni lekaleka ga na gauna eda veisau kina. Meda qarauna me kua na veisugusugu ena matanikatuba levu, gaunisala kei na vanua ni vakele motoka.

◼ Veisureti: Era sa taura beka na ivola ni veisureti na dautukutuku kece, ra kila tale ga na kena ivakamacala e loma? Sa vakatasuasuataki na kena soli? O cei soti me sureti? Me veisoliyaki kece na ivola ni veisureti.

◼ Sala ni Veilakoyaki: De so na tataleitaki kei na mataveitacini era na vinakata mera usani ina iVakananumi se so tale na ka ni veivuke era na gadreva. Sa tuvanaki beka e dua na ka mera vukei kina?

◼ Madrai kei na Waini: Me kua ni veisoliyaki na madrai kei na waini ni se bera ni dromu na matanisiga. Me vakarautaki na kena kau na madrai kei na waini vua e dua na lumuti sa malumalumu ena sega ni tiko ena soqoni. Me vakarautaki na madrai kei na waini veiganiti e dau vakayagataki.​​—⁠Raica Na Vale ni Vakatawa 15 Feperueri, 2003, tabana e 14-15, parakaravu 14, 17.

◼ Kingdom Hall: “Me samaki vinaka vakailiu na Kingdom Hall. Ni bera na soqoni, me tuvai rawa na veleti, bilo, na teveli, kei na kena iubi e veiganiti ena vanua e dodonu me biu kina. Ke vakayagataki e dua tale na vanua ni soqoni, me na laurai e dua na misini kei na gusunivosa vinaka, mera na rogoca kece na vakarorogo na ivunau. Mera lesi na dauveivuke ra qai dusimaki rawa ena sala matau mera na cakava kina nodra itavi, ra vakadreti mera muria na ituvatuva sa tuvanaki, me rakorako tale ga qai maqosa na nodra isulu kei na kedra irairai.

Ni soqo bibi duadua vei keda yadua, vakaivavakoso tale ga na vakananumi ni nona mate vakaisoro o Jisu Karisito, ena vinakati meda vakavakarau vinaka sara. O Jiova ena vakalougatataki ira na vakavinavinakataka mai vu ni lomadra na nona vakarautaka vei keda na nona mai mate vakaisoro na luvena lomani o Jisu Karisito.