Me Kilai Rawarawa Noda Veivakavulici
1. Ena rawa ni matata qai yaga vakacava na noda veivakavulici?
1 Me yaga noda veivakavulici, e bibi me kilai rawarawa. Eda na “maqosa” cake sara ena veivakavulici ke da vakatotomuri Jisu na Qasenivuli Levu.—2 Tim. 4:2, NW; Joni 13:13.
2. Na cava e okati ena veivakavulici e kilai rawarawa, cava na kena yaga?
2 Vosa e Kilai Rawarawa: Tu tu yadua na ivunau me bau yacova na titobu ni veika a cauraki ena iVunau ena Ulunivanua, ia na veika titobu ya era sereki ga vakarawarawa. (Maciu wase 5-7) O ira na vakarogoci Jisu era ‘kurabuitaka na nona veivakavulici.’ E uqeti ira mada ga na ovisa era talai mera lai vesuki koya, ra mani tukuna kina: “E sega e dua na tamata sa vosa me vaka na tamata oqo.” (Maciu 7:28, 29; Joni 7:46) Na vosa eda cavuta e sega ni tukuni me vereverea qai dredre, se tukuni vakamatailalai na vosa vakatautauvata me qai vakabauti kina na ka dina eda vakavulica. Ena matata na ka dina e vakavulici ke vakayagataki ga na vosa e kilai rawarawa.
3. Na cava e rawa ni sivia kina nodra vakamacala eso, cava me caka me kua ni yaco qori?
3 Kua ni Sivia na Ka o Tukuna: E dau kauaitaki ira na vakarorogo o Jisu ni vakasamataka na levu ni ka me vakavulici ira kina ena dua na gauna. (Joni 16:12) Nida vunau vei ira na wekada, tataleitaki, se o ira na gone, meda dau kauaitaki ira, da yalorawarawa tale ga. Ke ra vakarorogo vinaka mada ga, meda qarauna me kua ni sivia na ka eda tukuna, ni o ira na yalomalumalumu era na tosoya tiko ga nodra sasaga mera kilai Jiova na Kalou dina.—Joni 17:3; 1 Kor. 3:6.
4. E yaga vakacava noda vakamacalataka ga na tikina bibi, sega ni itukutuku matailalai?
4 Vakamacalataka ga na Tikina Bibi: E sega ni sivia na ka e tukuna o Jisu ni kila ena vakadredretaka ga na kena kilai. Nona tukuna ni “o ira kece na tu ena ibulubulu . . . mera tucake mai,” e dusia qo ni se sega ni kena gauna vua me vakamatailalaitaka na rua na inuinui me baleti ira na vakaturi. (Joni 5:28, 29) Meda vakamacalataka ga na tikina bibi nida caka vuli iVolatabu, da kua ni vakamacalataka na tikina e sega ni tiko ena ivola.
5. Eda na vakalougatataki vakacava ke kilai rawarawa noda veivakavulici?
5 Eda marau dina ni kilai rawarawa na veika e vakavulici keda kina o Jiova! (Maciu 11:25) Me kilai rawarawa mada ga na noda veivakavulici me vuavuaivinaka kina noda cakacaka vakaitalatala.