Tolu na Sala mo Vakavinakataka Kina na Nomu Veivakavulici

1. Na cava meda vakavinakataka tiko ga kina na noda veivakavulici?

¹ O keda kece na lotu vaKarisito eda qasenivuli. Ke da mani vunau, veisikovi lesu se caka vuli iVolatabu, eda vakasavu itukutuku tiko. Na itukutuku tale ga eda vakasavuya e vakasakiti duadua. Eda vakatakila tiko na rarama ni “iVolatabu” ni rawa kina ni “vakavukui” ira na tamata mera “vakabulai.” (2 Tim. 3:15) Dua dina na itavi dokai! Qo e tolu na sala meda rawa ni vakavinakataka kina na noda veivakavulici.

2. Na cava meda cakava me rawarawa kina na noda veivakavulici?

² Rawarawa: Nida sa kila vinaka e dua na ulutaga, ena rawarawa sara meda guilecava ni ulutaga qo ena rawa mada ga ni dredre vei ira era sega ni kila. Nida caka vuli iVolatabu tiko, kua ni kuria eso tale na ivakamacala e sega na betena. E vinaka ga mo vakabibitaka na tikina bibi. Sega ni tukuni ni o koya e qasenivuli vinaka e dau levu na nona ivakamacala. (Vkai. 10:19) Bibi gona meda wilika ga na tikinivolatabu e veiganiti. Ni wiliki oti na tikinivolatabu, mo vakabibitaka ga na tikina e sema kei na ulutaga o vosa tiko kina. Na ivunau ena Ulunivanua, e volatukutukutaki ena Maciu wase 5 kina 7, e vakamacalataki kina na ka dina, ia e laurai kina ni rawarawa na veivakavulici i Jisu qai vakayagataka ga eso na vosa e digitaki vinaka.

3. Na cava e yaga kina na ivakatautauvata? Na mataqali ivakatautauvata cava e yaga duadua?

³ iVakatautauvata: Na vosa vakatautauvata e uqeta na noda vakasama, ivakarau ni yaloda qai rawarawa ni nanumi. Kua ni nanuma mo dua sara na dautalanoa mo qai kenadau ena vakayagataki ni ivakatautauvata. O Jisu e dau vakayagataka ga na ivakatautauvata lekaleka, sega tale ga nira vakavu veilecayaki. (Maciu 7:3-5; 18:2-4) Ena rawa tale ga ni yaga ke droinitaki na iyaloyalo. Na nomu vakavakarau vinaka ena vukea mo vakasamataka vinaka na ivakatautauvata mo vakayagataka.

4. Ena yaga vakacava na noda vakayagataka na taro?

⁴ Taro: Na taro ena uqeta na vakasama i gonevuli. Mo kua ni vakusai gonevuli ni o taroga oti na taro. Ke totolo nomu sauma na taro o na sega ni kila na loma i gonevuli. Ke mani cala nona isaunitaro, mo taro ga eso tale na taro me vakamuai koya ina isaunitaro dodonu, kua ga ni vakacala na ka e tukuna. (Maciu 17:24-27) Sega ni dua vei keda e kenadau sara ena veivakavulici. Qori na vuna e uqeti keda kina na iVolatabu meda qarauna vinaka noda veivakavulici. Nida cakava qori eda na vakila na kena yaga me tawamudu kei ira tale ga era vakarogoci keda.—1 Tim. 4:16.