Vakacaucautaki Jiova e Veisiga

1. Na cava e uqeti meda cakava, na vuna?

¹ A tukuna o Tui Tevita ni na tawamudu na nona vakacaucautaki Jiova “e na veisiga kecega.” (Same 145:​2, 7, 21) E tiko tale ga na vuna meda vakacaucautaki Jiova kina e veisiga.​​—⁠Same 37:10; 145:​14, 18; 2 Pita 3:​13.

2. E rawa vakacava nira vakacaucautaki Jiova e veisiga na vuvale?

² Ena Vuvale: E levu na ivola veiuqeti e rawa nida vakayagataka me veivosakitaki kina na veika vakayalo nida dikeva na tikinivolatabu ni veisiga, nida Sokalou Vakavuvale, se da vakavakarau ena soqoni. E kena ivalavala vei ira e levu mera dabe vata vakavuvale ena dua mada ga na gauna ni kana e veisiga. E dau taladrodro kina na veitalanoa, e gauna vinaka tale ga me vakacaucautaki kina o Jiova. Na nodra veitalanoataka na itubutubu kei ira na luvedra eso na ulutaga, ena yaga sara vakalevu ena nodra vakavulici na gone “e na vunau kei nai vakavuvuli ni Turaga [“o Jiova,” NW].”​​—⁠Efeso 6:4; Vkru. 6:​5-7.

3. Na gauna cava eda rawa ni vakacaucautaki Jiova kina vakamataveitacini?

³ Ena iVavakoso: E gauna vinaka meda vakacaucautaki Jiova kina vakamataveitacini na cakacaka vakavunau kei na soqoni. (Vkai. 15:30; Fpai. 4:8; Iper. 13:15) Nida lomani Jiova, ena sega ni dredre meda okata ena noda veitalanoa na noda vakavinavinakataka mai vu ni lomada na nona yalovinaka.​​—⁠Same 106:⁠1.

4. Na gauna cava tale eda rawa ni vakacaucautaki Jiova kina?

⁴ Nida Vosa Vei Ira na Tawavakabauta: Ke da sega ni rawa ni lai cakacaka vakavunau e veisiga, se rawa ga nida tukuni Jiova vakalekaleka kei na nona inaki vei ira noda itokani vakacakacaka, icaba e koronivuli, kei ira eda tiko veitikivi. E rawa nira vakanuinui kina na yalomalumalumu ina gauna vinaka se bera mai. (Same 27:14; 1 Pita 3:​15) E dua na tacida a vunau vua e dua na marama e rau vodo vata tiko ena waqavuka. Na ka e rogoca na marama ya e uqeti koya qai vakacegui koya, mani solia vua na tacida na nona naba ni talevoni kei na vanua e tiko kina me rau veiqiriti se rau qai sota ena dua tale na gauna. Ni tubu cake tiko ga na leqa e vuravura qai cacamatua na ivakarau ni bula, eda na vunautaka tiko ga na tamata i Jiova “nai rogorogo vinaka ni ka vinaka” vei ira era via rogoca. Era na rawa ni vakanuinui tale ga ina gauna vinaka se bera mai, ra qai vakacaucautaki Jiova.​​—⁠Aisea 52:7; Roma 15:⁠11.

5. Na cava eda via vakacaucautaki Jiova kina, cava na kena yaga?

⁵ Sa wacava nona marau o Jiova nira vakacaucautaki koya e veisiga na nona tamata! Me vakataki ira ga na nona ibulibuli laurai tale eso era wavoliti keda, e rawa nida vakacaucautaki Jiova e veisiga ena vuvale, ena ivavakoso, nida vosa tale ga vei ira era se sega ni vakacaucautaki Jiova.​​—⁠Same 19:​1-4.