O sa Madila Tiko Beka ena “Vosa Savasava”?
“Ni’u na qai vukica na nodra vosa na veimataqali me vosa savasava, me ra masu kecega ki na yaca i Jiova.”—SEFA. 3:9.
1. Na isolisoli talei cava e vakalougatataki keda kina o Jiova?
E SEGA ni tauyavutaka ga na tamata na isolisoli ni vosa, e vakalougatataki keda kina na Dauveibuli, o Jiova. (Lako 4:11, 12) A solia na Kalou na isolisoli qori vua na imatai ni tamata o Atama, me bulia tale ga kina e so na vosa vou, me levu kina na vosa e rawa ni vakayagataka. (Vkte. 2:19, 20, 23) Sa dua dina na isolisoli talei! Eda veivosaki rawa kina kei na Tamada vakalomalagi, da qai vakacaucautaka na yacana lagilagi.
2. Na cava era sa duidui vosa kina na tamata?
2 A kilai e dua ga na vosa ena imatai ni 17 na senitiuri a bula kina na kawatamata, ni “dua vata ga na kena vosa.” (Vkte. 11:1) Oti a qai veisau ena gauna e talaidredre kina o Nimiroti. Era talaidredre na tamata ena ivakasala i Jiova ena nodra soqoni vata ena vanua e qai vakatokai me o Pepeli, nira via lai kumukumuni vata toka ga ena dua na vanua. Era tara e dua na vale cecere me ‘rogo kina na yacadra,’ sega ni vakalagilagi kina o Jiova. A qai vakasesea o Jiova na vosa era vakayagataka taumada, mani duidui kina na vosa era vosataka. E vu gona ni nodra veiseyaki e vuravura.—Wilika Vakatekivu 11:4-8.
3. Na cava e yaco ni vakasesea o Jiova na nodra vosa na dau talaidredre e Pepeli?
3 Era tukuna e so ni sa vosataki tu nikua e sivia na 6,800 na vosa e vuravura. E duidui na tuvai ni vakasama ena vosa kece qori. Ena gauna a vakasesea kina o Jiova na nodra vosa na dau talaidredre qori, kena irairai ni a vakavuna mera guilecava vakadua na vosa era vosataka tu eliu. E biuta ina nodra vakasama e so na vosa vou, e veisautaka tale ga na nodra tuva na vakasama ena nodra vosa, qai vakavoutaka na ituvatuva ni vosa. Sa rauta me vakatokai na vanua e tara toka kina na vale cecere me Pepeli, kena ibalebale na “Veilecayaki”! (Vkte. 11:9) Ia na iVolatabu duadua ga e vakaibalebale na kena ivakamacala me baleta na vuna e duidui kina na vosa e vuravura nikua.
Vosa Vou e Savasava
4. Na cava e parofisaitaka o Jiova ni na yaco ena noda gauna?
4 E sega ni vakabekataki ni vakasakiti na veika e tukuni ena iVolatabu ni cakava na Kalou e Pepeli, ia e dua na ka sa yaco tiko ena noda gauna e talei qai bibi cake sara. E parofisaitaka o Jiova ena vuku i Sefanaia na nona parofita: “Ni’u na qai vukica na nodra vosa na veimataqali me vosa savasava, me ra masu kecega ki na yaca i Jiova, ka me ra qaravi koya e na lomavata.” (Sefa. 3:9) Na “vosa savasava” cava oya? Eda na madila kina vakacava?
5. Na cava na vosa savasava, na cava e sa yaco ena vuku ni vosa vou qo?
5 Na vosa savasava e okati tiko kina na ka dina vakaivolatabu me baleta na Kalou o Jiova kei na nona inaki. E okati ena “vosa” qori na kilaka dodonu me baleta na Matanitu ni Kalou, na sala ena vakacerecerea kina na yaca i Jiova, tokona nona veiliutaki cecere, kei na veivakalougatataki tawamudu ena vakila kina na tamata yalodina. Na cava e sa yaco ena vuku ni vosa vou qo? E tukuni nida na “masu kecega ki na yaca i Jiova” eda qai “qaravi koya e na lomavata.” Ni vakatauvatani kei na ka e yaco mai Pepeli, na veisau ina vosa savasava qo e vakalagilagi kina na yaca i Jiova qai vakaduavatataki kina nona tamata.
Vulici ni Vosa Savasava
6, 7. (a) Na cava e okati ena vulici ni dua na vosa vou, e yaga vakacava ena vulici ni vosa savasava? (b) Na cava eda na vakadeuca?
6 Ni dua e vulica na vosa vou me madila kina, e sega ni rauta me nanuma wale ga na vosa vovou. Ena vulica tale ga na ivakarau ni rai vou kei na nona tuva na vakasama ena vosa ya. Na matata kei na lasa ni ka e tukuni ena dua na vosa ena rairai duidui ena dua tale na vosa. Na icavucavuti ni rorogo vou ena gadrevi ga kina me veisau na kena vakayagataki na gacagaca ni domo, me vaka na yame. E vaka tale ga qori nida vulica na vosa savasava ni ka dina ena iVolatabu. E sega ni rauta me vulici ga e so na yavu ni ivakavuvuli vakaivolatabu. Mo kila vinaka na vosa qo, e bibi mo na veisautaka na nomu rai kei na vakasama.—Wilika Roma 12:2; Efeso 4:23.
7 Eda na kila vinaka vakacava na vosa savasava? Eda na madila tale ga kina vakacava? Me vaka ga na vulici ni so tale na vosa, e tiko tale ga na iwalewale e dau vakayagataki meda qai maqosa kina na vosataka na vosa dina ena iVolatabu. Meda vakadeuca mada e so na iwalewale rawarawa era vulica kina na vosa vou e so, kei na sala ena yaga kina ina noda vulica na vosa vou vakaivakatakarakara.
Madila ena Vosa Savasava
8, 9. Na cava meda cakava kevaka eda via vulica na vosa savasava, na cava e bibi kina?
8 Mo dau vakarorogo vinaka. Ena gauna e cavuti kina e dua na vosa vou, ena vulagi ina kena irogorogo o koya se qai rogoca vakadua. (Aisea 33:19) Ia ni vakarorogo matua, sa na tekivu kila na vosa yadua e cavuti kei na veiveisau ni domo. Eda uqeti gona: “O koya oqo, e dodonu me da vakananuma vakalevu sara kina na ka eda a rogoca, de dua na siga e yali kina vei keda.” (Iper. 2:1) E dau uqeti ira na nona imuri o Jisu: “O koya sa vakadaligana me rogoca.” (Maciu 11:15; 13:43; Mari. 4:23; Luke 14:35) Io, e bibi meda “rogoca mada, ka kila sara” na ibalebale ni veika e tukuni meda kila vinaka kina na vosa savasava.—Maciu 15:10, VV; Mari. 7:14.
9 Nida vakarorogo e vinakati me coba dei tiko na noda vakasama ina ka e tukuni, ena yaga dina na sasaga qori. (Luke 8:18) Eda dau cakava beka qori ena gauna ni soqoni vaKarisito, se dau gole tani tu noda vakasama? E bibi meda saga matua me coba dei noda vakasama ena veika e dau talaucaki mai. Kevaka eda vakawalena na tikina qo eda na sega ni kila na ka e tukuni tiko.—Iper. 5:11.
10, 11. (a) Na cava tale e bibi meda cakava mai na noda dau vakarorogo ga? (b) Na cava e okati ena noda vosataka na vosa savasava?
10 Mo dau vakatotomuri ira na madila ena vosa. Era dau uqeti na gonevuli era vulica tiko na vosa vou mera vakarorogo vinaka, mera saga tale ga mera vakatotomuri ira na madila ena icavucavuti kei na rorogo ni domo ena vosa ya. Era na sega kina ni muria na itautau ni vosa ena rairai tatao kina nodra veivosaki e muri. Ena vakasama vata qori, e dodonu meda vuli vei ira era kenadau “ena veivakavulici” ena vosa vou. (2 Tim. 4:2, VV) Kerea nodra veidusimaki e so tale qai yalorawarawa ni o vakadodonutaki ke o cala.—Wilika Iperiu 12:5, 6, 11.
11 E okati ena noda vosataka na vosa savasava na noda vakabauta na ka dina kei na noda vakavuvulitaka vei ira e so tale, wili tale ga kina na noda veisautaka noda ivalavala me salavata kei na Lawa ni Kalou vaka kina na nona ivakavuvuli. Ena yaga vakalevu ena tikina qo na noda vakatotomuria na nodra ivakaraitaki e so tale. Qo e okati kina na noda vakatotomuria na nodra vakabauta kei na nodra gugumatua, vaka kina na nona ivakarau ni bula kece o Jisu. (1 Kor. 11:1; Iper. 12:2; 13:7) Kevaka eda cakava qori eda na duavata na tamata ni Kalou, qai tautauvata na itautau ni vosa savasava eda vosataka.—1 Kor. 4:16, 17.
12. E yaga vakacava ena vulici ni vosa vou na kena dei ena noda vakasama na ka e vulici?
12 Me dei ena nomu vakasama na ka o vulica. E bibi mera na nanuma na gonevuli e levu na ka vou era vulica. Qo e okati kina na vosa kei na ivosavosa vou. Na noda katona dei na lotu vaKarisito ena noda vakasama na ka eda vulica ena yaga ina noda madila ena vosa savasava. Ena vinaka meda nanuma dei na veitaravi ni yaca ni ivola ena iVolatabu. E so e nodra isausau mera wiligusutaka e so na tikinivolatabu kei na kena e baleta e so na usutu bibi. Era raica e so tale ni yaga mera nanuma dei na sere ena noda ivolanisere, na yaca ni yavusa e Isireli kei na yacadratou na 12 na yapositolo, vaka kina na itovo era umani ena vua ni yalo tabu. Levu na Isireli ena gauna makawa era dau katona e lomadra na same. Ena noda gauna qo, e wiligusutaka e dua na gonetagane e se qai yabaki ono na vosa yadua e volai ena sivia na 80 na tikinivolatabu. Eda rawa beka ni vakayagataka vinaka tale ga na iwalewale yaga qori?
13. Na cava e rui bibi kina na tokaruataki ni ka?
13 Ni tokaruataki na ka e vulici, ena yaga vakalevu ina kena dau nanumi, e tiki bibi tale ga ni noda vuli na lotu vaKarisito na noda vakasalataki wasoma. E kaya na yapositolo o Pita: “O koya gona oqo au sa dau nakita voli ga kina me’u vakauqeti kemuni mo ni dau nanuma na veika oqo, e dina ga ni ko ni sa kilai ira tu ka ko ni sa vakataudeitaki tu e na i vakavuvuli dina sa tu vei kemuni.” (2 Pita 1:12, VV) Na cava na yaga ni kena dau tokaruataki vei keda na ka? E vakalevutaka noda kilaka, ena sega kina ni qiqo noda rai, qai vaqaqacotaka na ka eda nakita dei oya meda talairawarawa tiko ga vei Jiova. (Same 119:129) Na noda dau taleva na ivakatagedegede kei na ivakavuvuli ni Kalou e yaga ena noda vakalewa na noda ivalavala, eda na sega kina ni “daurogoca ka guilecava.” (Jeme. 1:22-25) Ena uqeti na lomada ena so tale na ka, da qai sega ni madila ena vosa savasava ke da sega ni dau vakananuma na ka dina.
14. Na cava meda cakava me yaga kina na noda vulica tiko na vosa savasava?
14 Mo dau wiliwili vakadomoilevu. E so era dau via vulica lo ga vakataki ira e dua na vosa vou, ia e sega ni kena icakacaka vinaka qori. Nida vulica na vosa savasava, ena vinakati ena so na gauna meda “wilika toka e cake” me dei ina noda vakasama. (Wilika Same 1:1, 2.a) Nida cakava qori ena kasa vei keda na veika eda wilika. Ena vosa vakaIperiu, na matavosa “wilika toka e cake” e rawa ni semati tale ga ina noda vakasamataka vakatitobu. Me vaka na kena dau yaga na kakana eda kania kevaka eda mama vinaka, eda na kila vinaka tale ga na ka eda wilika kevaka eda dau vakasamataka vakatitobu. Vakacava, e dau veirauti vinaka na gauna eda lokuca meda vakasamataka kina vakatitobu na veika eda vulica? Sa dodonu ga meda vakasamataka vakatitobu na veika eda dau wilika ena iVolatabu.
15. Eda na vulica vakacava na “ituvatuva ni vosa” e vakayagataki ena vosa savasava?
15 Dau vakalewa na ituvatuva ni vosa. Ni vakacagau tiko na noda vuli, ena yaga meda vulica na ituvatuva ni vosa, na kena tuvai vaka yatuvosa kei na lawa ni vosa vou. Nida kila na ituvatuva ni vosa, eda na qai cavuta vakavinaka. Na vosa kece e tiko na kena ituvatuva ni vosa yadudua, na vosa savasava tale ga ni ka dina ena iVolatabu e tiko na kena “[i]vakarau [“ituvatuva,” NW] ni vosa dina.” (2 Tim. 1:13) E bibi meda vakatotomuria “na ituvatuva” oya.
16. Na leqa cava e rawa ni yaco, na cava na kena iwali?
16 Me toso tiko ga nomu vulica na vosa. Ena rairai vulica na vosa e dua me bau cavuta toka kina e so na vosa rawarawa ni veisiga, ia e qai sega ni tosoya na nona vuli. E rawa tale ga ni yaco qori vei ira na vulica tiko na vosa savasava. (Wilika Iperiu 5:11-14.) Na cava na iwali ni leqa qori? Mo saga mo vulica e levu tale na ka me baleta na vosa savasava. “Koya oqo me da qai laiva nai vakatekivu ni vakavuvuli kei Karisito me da toro cake me da matua sara; me da kakua ni tauyavutaka tale e na veivutuni e na vuku ni valavala eda mate kina, e na vakabauta talega na Kalou, ai vakavuvuli ni veipapitaisotaki, kei na veitabaki liga, kei na nodra tu cake talega, ko ira na mate, kei na lewa ka sega ni mudu.”—Iper. 6:1, 2.
17. Na cava e bibi kina me caka wasoma na vuli? Vakatauvatana.
17 Me tiko na nomu ituvatuva dei ni vuli. Na vuli leleka e caka wasoma e vinaka cake mai na kena e balavu qai vakavudua. E bibi mo vuli ni yadra vinaka tu nomu vakasama qai sega ni vakawelei rawarawa. Na vulici ni dua na vosa vou e vaka na ta gaunisala e loma ni veikau. Kevaka ga e taubaletaki wasoma na gaunisala sa caramaki tu qori, ena rawarawa sara na ilakolako. Ia ena tubua na sala ke sega ni muri ena dua na gauna balavu. E bibi gona me wasoma qai dei na ivakarau ni veika e dau caka! (Tani. 6:16, 20) E bibi mo masulaka “ka yadrava tiko kina e na gumatua kece” na nomu vosataka na vosa savasava ni ka dina vakaivolatabu.—Efeso 6:18.
18. Na cava meda vosataka kina e veigauna na vosa savasava?
18 Mo dau vosataka! E so era vulica tiko e dua na vosa vou era tu suka ni vosataka nira madua se lomaleqa de cala na ka era cavuta. Ia ena vakaberaberataka nodra toso qori. Koya gona na vulici ni dua na vosa vou ena dina kina e dua na ivosavosa makawa, ‘na levu ga ni nomu vakatovotovotaka na ka na kena vinaka.’ Na levu ga ni nona vosataka e dua na tamata na vosa vou e vulica tiko, ena sega ni madua me vakayagataka ena veivosaki. E bibi kina meda vosataka na vosa savasava ena veigauna. “Ni sa vakadinata na tamata e na vu ni yalona me sa vakadonui kina, ia na gusuna sa vakatusa kina me bula.” (Roma 10:10) Eda sega wale ga ni ‘vakatusai’ keda e matanalevu nida papitaiso, eda vakayacora tale ga qori nida tukuni Jiova e veigauna, okati kina ena cakacaka vakavunau. (Maciu 28:19, 20; Iper. 13:15) Na soqoni vaKarisito ena vakavulici keda me matata, qai kua ni talimagimagi nida vakamacalataka na vosa savasava.—Wilika Iperiu 10:23-25.
Duavata ni Vakacaucautaki Jiova ena Vosa Savasava
19, 20. (a) Na cakacaka vakasakiti cava era vakayacora tiko nikua na iVakadinadina i Jiova? (b) Na cava o sa nakita dei tu?
19 Ena dua dina na ka vakasakiti ke da tiko e Jerusalemi ena mataka ni Sigatabu, ena ika6 ni siga ni vula o Sivan (Me/June) ena 33 S.K.! Ni voleka na ciwa na kaloko ena mataka ni siga oya, “ra sa vakatekivu me vosataka na vosa tani eso” era soqoni tiko ena dua na tabavale e cake. (Caka. 2:4) Sa sega ni soli vei keda na tamata ni Kalou nikua na isolisoli qori. (1 Kor. 13:8) Ia eda se kacivaka tiko ga na iVakadinadina i Jiova na itukutuku vinaka ni Matanitu ni Kalou ena sivia na 430 na duidui vosa.
20 Se mani vosa cava eda vosataka e veisiga, eda marau nida duavata tiko ena vosataka na vosa savasava ni ka dina ena iVolatabu! E veibasai sara qori kei na veika a yaco mai Pepeli. E vaka ga nida vakacaucautaka tiko na yaca i Jiova ena dua ga na vosa. (1 Kor. 1:10) Me noda inakinaki mada ga me tawamudu na noda ‘veiqaravi ena lomavata’ kei ira na tacida e vuravura raraba, nida vulica meda madila ena vosa savasava, me lagiti kina na Tamada vakalomalagi o Jiova.—Wilika Same 150:1-6.
[iVakamacala e ra]
a Same 1:1, 2 (NW): “Ena marau o koya sa sega ni muria na nodra ivakasala na tamata ca kei na nodra itovo na ivalavala ca, se galeleti ira na dauveivakalialiai. Ena marautaka na Lawa i Jiova qai wilika toka e cake ena siga kei na bogi.
O na Sauma Vakacava?
• Na cava na vosa savasava?
• Na cava e okati ena noda vosataka na vosa savasava?
• Eda na madila vakacava ena vosa savasava?
[Kato ena tabana e 23]
Saga Mo Madila ni Vosataka na Vosa Savasava ena Nomu
◆ dau vakarorogo vinaka.
◆ dau vakatotomuri ira na madila ena vosa.
◆ dau vakasamataka dei na ka o vulica qai tokaruataka.
Jeme. 1:22-25; 2 Pita 1:12, VV
◆ dau wiliwili vakadomoilevu.
Same 1:1, 2, NW
◆ dau vakalewa na “ituvatuva ni vosa.”
◆ toso tiko ga ena nomu vulica na vosa.
◆ ituvatuva dei ni vuli.
◆ vosataka.
[iYaloyalo ena tabana e 24]
Era duavata na vosataka na vosa savasava na tamata i Jiova