Eda iVakadinadina ena Veigauna
1. Na cava eda vulica ena nona vunau o Jisu vua na marama a sotava ena ikeli wai?
1 E oca qai karamaca o Jisu ni taubale voli me vica na aua. Eratou lai voli kakana na nona tisaipeli, mani vakacegu toka o Jisu ena yasa ni ikeli wai ena saula ni dua na siti e Samaria. E sega ni mai vunau e kea o Jisu, e lako siviti Samaria tiko ga ena nona igolegole i Kalili me lai tomana e kea nona vunau. Ia a sega ni tu suka o Jisu me vunau vua na marama a mai taki wai. (Joni 4:5-14) Na vuna? E vakaraitaka ena veigauna o Jisu ni dua o koya na ‘ivakadinadina yalodina, daudina’ i Jiova. (Vkta. 3:14) Me vakataki Jisu, eda ivakadinadina tale ga i Jiova ena veigauna.—1 Pita 2:21.
2. Eda na rawa vakacava ni vunau tawalokuci?
2 Tu Vakarau: Eda na tu vakarau na vunau tawalokuci ke da dau kauta tu na ivola meda solia. E dau tu vakarawarawa vei ira e levu na dautukutuku na ivolacebaceba mera solia vei ira na cakacaka ena sitoa, igunugunu ni benisini, kei na so tale era sotava ena dua na siga. (Dauv. 11:6) Ena gauna kece e gole kina e dua na ganeda ina dua tale na vanua, e dau kauta tu e dua na iVolatabu lailai kei na Ka e Kaya na iVolatabu. E dau saga tale ga me tekivuna na veivosaki kei ira era dabe tikivi koya.
3. Eda na tekivuna rawa vakacava na veivosaki?
3 Tekivu ni Veivosaki: Nida vunau tawalokuci, e sega ni tukuni meda vakamacalataka e dua na usutu vakaivolatabu ena gauna ga eda tekivu kina. O Jisu a sega ni tekivuna nona vosa vua na marama ni Samaria ena nona tukuna ni o koya na Mesaia. A kerea ga me dua na mena wai, ia a qai via kila e levu na ka na marama ya. (Joni 4:7-9) E vakadinadinataka e dua na ganeda ni dau tekivuna rawa tale ga na veivosaki ena iwalewale qori. Ni tarogi ke marautaka na solevutaki ni dua na olodei, e sega ni dau tukuna na ganeda ni sega ni solevutaka na olodei baleta ni dua na iVakadinadina i Jiova. Ia e dau tukuna, “E noqu vakatulewa meu kua ni solevutaka.” E dau via kila sara ga o koya e taro na vuna e va kina ya nona vakatulewa, mani vunau rawa kina na ganeda vua.
4. Na cava e uqeti iko kina na Maciu 28:18-20?
4 Sa oti nona gumatuataka o Jisu nona cakacaka vakaitalatala e vuravura, ia e se kauai tiko ga ena kena vakayacori na cakacaka vakavunau ena ivalavala vata ga a cakava kina. (Maciu 28:18-20) Koya gona me vakataki Jisu ga na noda iVakaraitaki, meda dua tale ga na iVakadinadina e tu vakarau ena veigauna me tukuna na ka e vakabauta.—Iper. 10:23.