Vakavinavinakataki Jiova ena Vunau Tawalokuci
1 Era qara na dauveiqaravi yalodina i Jiova e vuqa na sala mera vakavinavinakataki koya kina e veisiga. (Same 96:2, 3; Iper. 13:15) Dua na sala eda rawa ni cakava kina oqo nida vunau tawalokuci. E vuqa vei ira era qaravi Jiova tiko nikua era vakavinavinakataka, ni nodra ciqoma na itukutuku vinaka ni Matanitu ni Kalou e vu mai na kena a wasei vei ira ena vunau tawalokuci.
2 Nida vunau tawalokuci mada ga vua e lewe dua, oqo e rawa ni dolava na sala vei ira tale e so mera rogoca na itukutuku vinaka ni Matanitu ni Kalou. Kena ivakaraitaki na nodrau veitalanoa o Jisu kei na yalewa ni Samaria ena ikeliwai i Jekope, e lai vakavuna kina vei ira e so tale mera taleitaka na itukutuku vinaka. (Joni 4:6-30, 39-42) Ni rau vesu tu e Filipai o Paula kei Sailasa, rau vunau vua na ivakatawa ni valeniveivesu, yaco kina me ratou ciqoma vakavuvale na ka dina.—Caka. 16:25-34.
3 Vanua ni Vunau: Na vanua cava soti eda rawa ni vunau kina? E so era vunau nira volivoli, vodo basi se nira wawa mera laurai vakavuniwai. E so tale era vunau ena gauna ni vakasigalevu e koronivuli se na vanua ni cakacaka. Ke laurai tu vakarawarawa na noda ivola vakaivolatabu, oqo e rawa tale ga ni uqeti ira e so mera vakataroga na noda vakabauta.—1 Pita 3:15.
4 Tekivu Vakacava?: E dua na goneyalewa lailai yabaki vitu e dau mamadua e rogoca ena soqoni na bibi ni vunau. Ena gauna rau lai volivoli kina kei tinana a tawana ena nona kato e rua na brochure. Ni se sauma tiko o tinana na veika erau volia, a solia sara na goneyalewa lailai oqo na brochure vua e dua na marama, a qai ciqoma ena marau. Ni tarogi se rawa vakacava vua me solia ena doudou na brochure vua na marama oya, e kaya na goneyalewa mamadua oqo: “Au kaya lo ga, Dua, Rua, Tolu, Solia! Au mani solia sara!”
5 Nida vunau tawalokuci ena gadrevi vei keda na yalo e tiko vua na goneyalewa lailai oya. Cava e rawa ni vukei keda? Meda masulaka me tiko vei keda na doudou meda rawa ni vosa kina. (1 Ces. 2:2) Meda vakasamataka tiko e dua na taro se dua na ulutaga eda na via tukuna me tekivu kina e dua na veivosaki. Qai nuitaka ni na vakalougatataka o Jiova na noda sasaga.—Luke 12:11, 12.
6 Nida vunau tawalokuci e veisiga e vakavinavinakataki kina o Jiova, e solia tale ga vei keda na marau. Ena rawa sara ga ni vakamua e dua ina sala ni bula tawamudu.