Nodra Vakavulici na Dautukutuku Vou Mera Vunau
1. Na cava e yacovi iko ena imatai ni gauna o lako kina ena cakacaka vakavunau?
1 O bau nanuma na imatai ni gauna o lako kina ena vunau e veivale? Rairai o a taqaya se rere. Sega ni vakabekataki ni o marau ni vukei iko na nomu qasenivuli se dua tale na dautukutuku drau a cakacaka vata. Ia qo ni o sa italatala maqosa, sa rawa ni o veivuke ena nodra vakavulici na dautukutuku vou mera vunau.
2. Na cava ena vinakati mera vulica na dautukutuku vou?
2 Era na vulica na dautukutuku vou na sala mera tekivutaka kina na veivosaki kei taukeinivale, na vakayagataki ni iVolatabu, veisikovi lesu kei na tekivutaki ni vuli iVolatabu. Mera vulica tale ga na iwalewale tale eso ni vunau, na vunau e salatu kei na vunau ena yalava ni bisinisi. Ena vukei ira vakalevu ena tikina qori na noda ivakaraitaki kei na veika eda vakatututaka.
3. Ena yaga vakacava vei ira na so na noda ivakaraitaki?
3 Veivakavulici ena Noda iVakaraitaki: A vakaraitaka na icakacaka ni vunau o Jisu vei ratou na nona tisaipeli. (Luke 8:1; 1 Pita 2:21) Ke o veinaki kei na dua na dautukutuku vou mo drau cakacaka vata, vakarautaka e dua na ivakamacala ena rawa ni muria o dautukutuku. De dua mo vakayagataka ga na kena e tu ena noda ivola. O rawa ni cakava na imatai ni rua na vale me rogoca o dautukutuku na ka o tukuna. Ni drau biubiu mai na dua na vale, o rawa ni taroga na nona nanuma ena laulau ni nomu ivakamacala. Qo ena kila kina na yaga ni noda cakacaka vakavunau vata kei ira tale eso, ena rawarawa tale ga me ciqoma na nomu vakatutu ni vakamacala oti ena dua na vale.
4. Eda na vukea vakacava e dua na dautukutuku vou nida rogoca oti nona ivakamacala?
4 Vakatutu: A vakamacalataka tale ga vei ratou nona tisaipeli o Jisu na ka me ratou cakava ni ratou vunau. (Maciu 10:5-14) E rawa tale ga nida cakava qori meda vukei ira kina na dautukutuku vou. Ena gauna e vosa kina, meda vakarogoci koya vinaka. Nida sa biuta na vale, meda kua ni tusuka ni vakacaucautaki koya mai vu ni lomada, ke vaka sara mada ga ena vinakati me vakavinakataki nona ivakamacala. Ni bera nida vakatututaka e dua na ka, rogoca tale mada nona ivakamacala ena ikarua ni vale e vosa kina de sa na vinaka cake. De a taqaya beka ena imatai ni vale e vosa kina. Meda nanuma tiko ni duidui na ka era rawata na dautukutuku yadua, qai levu na mataqali sala me caka kina e dua na ka.—1 Kor. 12:4-7.
5. Na cava meda tukuna nida vakaliuliu meda vakatura eso na ka?
5 Ena so na gauna ena kerea nomu vakatutu na dautukutuku vou. Ia ke sega ni cakava qori, mo vakaliuliu mo vukei koya. Ena rawa vakacava ni caka vakamatau qo? Eso na dautukutuku matua era tukuna qo, “Au via vakatututaka ga e dua na ka.” se, “Na cava o nanuma ena ivakamacala ya?” Se da rawa ni tukuna, “Ena gauna au se qai dautukutuku kina e dredre meu . . . , ia au raica qo e veivuke vakalevu. . . . ” Ena yaga ena so na gauna meda vakayagataka na ivola na Reasoning. Me kua ni levu na ka eda tukuna, vukei koya na dautukutuku vou ena dua ga nona ivakamacala.
6. Me baleta na cakacaka vakavunau, e “vagatai” vakacava na ‘kaukamea ena kaukamea’?
6 Vagatai na Kaukamea ena Kaukamea;:Na daukaulotu matua o Timoci, a vakauqeti koya o Paula me gumatua tiko ga ena veivakavulici, me toso tale ga vakayalo. (1 Tim. 4:13, 15) De dua sa dede sara noda tekivu lako ena cakacaka vakavunau, ia meda toroya cake tiko ga na iwalewale ni noda vunau. Meda vuli vei ira na dautukutuku eda vunau vata, o ira sara mada ga era sega ni matau ena cakacaka qo, da qai tu vakarau meda veivuke, vakauasivi o ira na dautukutuku vou me rawa nira italatala maqosa ni itukutuku vinaka.—Vkai. 27:17.